५ गाथिनो विश्वामित्रः। इन्द्रः। बृहती।
अ॒यं ते॑ अस्तु हर्य॒तः सोम॒ आ हरि॑भिः सु॒तः ।
जु॒षा॒ण इ॑न्द्र॒ हरि॑भिर्न॒ आ ग॒ह्या ति॑ष्ठ॒ हरि॑तं॒ रथ॑म् ॥१॥
ह॒र्यन्नु॒षस॑मर्चय॒: सूर्यं॑ ह॒र्यन्न॑रोचयः ।
वि॒द्वाँश्चि॑कि॒त्वान् ह॑र्यश्व वर्धस॒ इन्द्र॒ विश्वा॑ अ॒भि श्रिय॑: ॥२॥
द्यामिन्द्रो॒ हरि॑धायसं पृथि॒वीं हरि॑वर्पसम् ।
अधा॑रयद्ध॒रितो॒र्भूरि॒ भोज॑नं॒ ययो॑र॒न्तर्हरि॒श्चर॑त् ॥३॥
ज॒ज्ञा॒नो हरि॑तो॒ वृषा॒ विश्व॒मा भा॑ति रोच॒नम् ।
हर्य॑श्वो॒ हरि॑तं धत्त॒ आयु॑ध॒मा वज्रं॑ बा॒ह्वोर्हरि॑म् ॥४॥
इन्द्रो॑ ह॒र्यन्त॒मर्जु॑नं॒ वज्रं॑ शु॒क्रैर॒भीवृ॑तम् ।
अपा॑वृणो॒द्धरि॑भि॒रद्रि॑भिः सु॒तमुद् गा हरि॑भिराजत ॥५॥
५ gāthino viśvāmitraḥ | indraḥ | bṛhatī | a॒yaṃ te॑ astu harya॒taḥ soma॒ ā hari॑bhiḥ su॒taḥ | ju॒ṣā॒ṇa i॑ndra॒ hari॑bhirna॒ ā ga॒hyā ti॑ṣṭha॒ hari॑taṃ॒ ratha॑m || १ || ha॒ryannu॒ṣasa॑marcaya॒: sūryaṃ॑ ha॒ryanna॑rocayaḥ | vi॒dvām̐ści॑ki॒tvān ha॑ryaśva vardhasa॒ indra॒ viśvā॑ a॒bhi śriya॑: || २ || dyāmindro॒ hari॑dhāyasaṃ pṛthi॒vīṃ hari॑varpasam | adhā॑rayaddha॒rito॒rbhūri॒ bhoja॑naṃ॒ yayo॑ra॒ntarhari॒ścara॑t || ३ || ja॒jñā॒no hari॑to॒ vṛṣā॒ viśva॒mā bhā॑ti roca॒nam | harya॑śvo॒ hari॑taṃ dhatta॒ āyu॑dha॒mā vajraṃ॑ bā॒hvorhari॑m || ४ || indro॑ ha॒ryanta॒marju॑naṃ॒ vajraṃ॑ śu॒kraira॒bhīvṛ॑tam | apā॑vṛṇo॒ddhari॑bhi॒radri॑bhiḥ su॒tamud gā hari॑bhirājata || ५ ||