८ गाथिनो विश्वामित्रः। इन्द्रः। त्रिष्टुप्।
आ या॑ह्य॒र्वाङुप॑ वन्धुरे॒ष्ठास्तवेदनु॑ प्र॒दिव॑: सोम॒पेय॑म् ।
प्रि॒या सखा॑या॒ वि मु॒चोप॑ ब॒र्हिस्त्वामि॒मे ह॑व्य॒वाहो॑ हवन्ते ॥१॥
आ या॑हि पू॒र्वीरति॑ चर्ष॒णीराँ अ॒र्य आ॒शिष॒ उप॑ नो॒ हरि॑भ्याम् ।
इ॒मा हि त्वा॑ म॒तय॒: स्तोम॑तष्टा॒ इन्द्र॒ हव॑न्ते स॒ख्यं जु॑षा॒णाः ॥२॥
आ नो॑ य॒ज्ञं न॑मो॒वृधं॑ स॒जोषा॒ इन्द्र॑ देव॒ हरि॑भिर्याहि॒ तूय॑म् ।
अ॒हं हि त्वा॑ म॒तिभि॒र्जोह॑वीमि घृ॒तप्र॑याः सध॒मादे॒ मधू॑नाम् ॥३॥
आ च॒ त्वामे॒ता वृष॑णा॒ वहा॑तो॒ हरी॒ सखा॑या सु॒धुरा॒ स्वङ्गा॑ ।
धा॒नाव॒दिन्द्र॒: सव॑नं जुषा॒णः सखा॒ सख्यु॑: शृणव॒द् वन्द॑नानि ॥४॥
कु॒विन्मा॑ गो॒पां कर॑से॒ जन॑स्य कु॒विद् राजा॑नं मघवन्नृजीषिन् ।
कु॒विन्म॒ ऋषिं॑ पपि॒वांसं॑ सु॒तस्य॑ कु॒विन्मे॒ वस्वो॑ अ॒मृत॑स्य॒ शिक्षा॑: ॥५॥
आ त्वा॑ बृ॒हन्तो॒ हर॑यो युजा॒ना अ॒र्वागि॑न्द्र सध॒मादो॑ वहन्तु ।
प्र ये द्वि॒ता दि॒व ऋ॒ञ्जन्त्याता॒: सुस॑म्मृष्टासो वृष॒भस्य॑ मू॒राः ॥६॥
इन्द्र॒ पिब॒ वृष॑धूतस्य॒ वृष्ण॒ आ यं ते॑ श्ये॒न उ॑श॒ते ज॒भार॑ ।
यस्य॒ मदे॑ च्या॒वय॑सि॒ प्र कृ॒ष्टीर्यस्य॒ मदे॒ अप॑ गो॒त्रा व॒वर्थ॑ ॥७॥
शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥८॥
८ gāthino viśvāmitraḥ | indraḥ | triṣṭup | ā yā॑hya॒rvāṅupa॑ vandhure॒ṣṭhāstavedanu॑ pra॒diva॑: soma॒peya॑m | pri॒yā sakhā॑yā॒ vi mu॒copa॑ ba॒rhistvāmi॒me ha॑vya॒vāho॑ havante || १ || ā yā॑hi pū॒rvīrati॑ carṣa॒ṇīrām̐ a॒rya ā॒śiṣa॒ upa॑ no॒ hari॑bhyām | i॒mā hi tvā॑ ma॒taya॒: stoma॑taṣṭā॒ indra॒ hava॑nte sa॒khyaṃ ju॑ṣā॒ṇāḥ || २ || ā no॑ ya॒jñaṃ na॑mo॒vṛdhaṃ॑ sa॒joṣā॒ indra॑ deva॒ hari॑bhiryāhi॒ tūya॑m | a॒haṃ hi tvā॑ ma॒tibhi॒rjoha॑vīmi ghṛ॒tapra॑yāḥ sadha॒māde॒ madhū॑nām || ३ || ā ca॒ tvāme॒tā vṛṣa॑ṇā॒ vahā॑to॒ harī॒ sakhā॑yā su॒dhurā॒ svaṅgā॑ | dhā॒nāva॒dindra॒: sava॑naṃ juṣā॒ṇaḥ sakhā॒ sakhyu॑: śṛṇava॒d vanda॑nāni || ४ || ku॒vinmā॑ go॒pāṃ kara॑se॒ jana॑sya ku॒vid rājā॑naṃ maghavannṛjīṣin | ku॒vinma॒ ṛṣiṃ॑ papi॒vāṃsaṃ॑ su॒tasya॑ ku॒vinme॒ vasvo॑ a॒mṛta॑sya॒ śikṣā॑: || ५ || ā tvā॑ bṛ॒hanto॒ hara॑yo yujā॒nā a॒rvāgi॑ndra sadha॒mādo॑ vahantu | pra ye dvi॒tā di॒va ṛ॒ñjantyātā॒: susa॑mmṛṣṭāso vṛṣa॒bhasya॑ mū॒rāḥ || ६ || indra॒ piba॒ vṛṣa॑dhūtasya॒ vṛṣṇa॒ ā yaṃ te॑ śye॒na u॑śa॒te ja॒bhāra॑ | yasya॒ made॑ cyā॒vaya॑si॒ pra kṛ॒ṣṭīryasya॒ made॒ apa॑ go॒trā va॒vartha॑ || ७ || śu॒naṃ hu॑vema ma॒ghavā॑na॒mindra॑ma॒smin bhare॒ nṛta॑maṃ॒ vāja॑sātau | śṛ॒ṇvanta॑mu॒gramū॒taye॑ sa॒matsu॒ ghnantaṃ॑ vṛ॒trāṇi॑ saṃ॒jitaṃ॒ dhanā॑nām || ८ ||