९ गाथिनो विश्वामित्रः। इन्द्रः। गायत्री।
इन्द्र॑ त्वा वृष॒भं व॒यं सु॒ते सोमे॑ हवामहे । स पा॑हि॒ मध्वो॒ अन्ध॑सः ॥१॥
इन्द्र॑ क्रतु॒विदं॑ सु॒तं सोमं॑ हर्य पुरुष्टुत । पिबा वृ॑षस्व॒ तातृ॑पिम् ॥२॥
इन्द्र॒ प्र णो॑ धि॒तावा॑नं य॒ज्ञं विश्वे॑भिर्दे॒वेभि॑: । ति॒र स्त॑वान विश्पते ॥३॥
इन्द्र॒ सोमा॑: सु॒ता इ॒मे तव॒ प्र य॑न्ति सत्पते । क्षयं॑ च॒न्द्रास॒ इन्द॑वः ॥४॥
द॒धि॒ष्वा ज॒ठरे॑ सु॒तं सोम॑मिन्द्र॒ वरे॑ण्यम् । तव॑ द्यु॒क्षास॒ इन्द॑वः ॥५॥
गिर्व॑णः पा॒हि न॑: सु॒तं मधो॒र्धारा॑भिरज्यसे । इन्द्र॒ त्वादा॑त॒मिद्यश॑: ॥६॥
अ॒भि द्यु॒म्नानि॑ व॒निन॒ इन्द्रं॑ सचन्ते॒ अक्षि॑ता । पी॒त्वी सोम॑स्य वावृधे ॥७॥
अ॒र्वा॒वतो॑ न॒ आ ग॑हि परा॒वत॑श्च वृत्रहन् । इ॒मा जु॑षस्व नो॒ गिर॑: ॥८॥
यद॑न्त॒रा प॑रा॒वत॑मर्वा॒वतं॑ च हू॒यसे॑ । इन्द्रे॒ह तत॒ आ ग॑हि ॥९॥
९ gāthino viśvāmitraḥ | indraḥ | gāyatrī | indra॑ tvā vṛṣa॒bhaṃ va॒yaṃ su॒te some॑ havāmahe | sa pā॑hi॒ madhvo॒ andha॑saḥ || १ || indra॑ kratu॒vidaṃ॑ su॒taṃ somaṃ॑ harya puruṣṭuta | pibā vṛ॑ṣasva॒ tātṛ॑pim || २ || indra॒ pra ṇo॑ dhi॒tāvā॑naṃ ya॒jñaṃ viśve॑bhirde॒vebhi॑: | ti॒ra sta॑vāna viśpate || ३ || indra॒ somā॑: su॒tā i॒me tava॒ pra ya॑nti satpate | kṣayaṃ॑ ca॒ndrāsa॒ inda॑vaḥ || ४ || da॒dhi॒ṣvā ja॒ṭhare॑ su॒taṃ soma॑mindra॒ vare॑ṇyam | tava॑ dyu॒kṣāsa॒ inda॑vaḥ || ५ || girva॑ṇaḥ pā॒hi na॑: su॒taṃ madho॒rdhārā॑bhirajyase | indra॒ tvādā॑ta॒midyaśa॑: || ६ || a॒bhi dyu॒mnāni॑ va॒nina॒ indraṃ॑ sacante॒ akṣi॑tā | pī॒tvī soma॑sya vāvṛdhe || ७ || a॒rvā॒vato॑ na॒ ā ga॑hi parā॒vata॑śca vṛtrahan | i॒mā ju॑ṣasva no॒ gira॑: || ८ || yada॑nta॒rā pa॑rā॒vata॑marvā॒vataṃ॑ ca hū॒yase॑ | indre॒ha tata॒ ā ga॑hi || ९ ||