११ गाथिनो विश्वामित्रः। आप्रीसूक्तं (१ इध्मः समिद्धोऽग्निर्वा, २ तनूनपात्, ३ इळः, ४ बर्हिः, ५ देवीर्द्वारः, ६ उषासनक्ता, ७ दैव्यो होतारौ प्रचेतसौ, ८ तिस्रो देव्यःसरस्वतीळाभारत्यः, ९ त्वष्टा, १० वनस्पतिः, ११ स्वाहाकृतयः)। त्रिष्टुप् ।
स॒मित्स॑मित् सु॒मना॑ बोध्य॒स्मे शु॒चाशु॑चा सुम॒तिं रा॑सि॒ वस्व॑: ।
आ दे॑व दे॒वान् य॒जथा॑य वक्षि॒ सखा॒ सखी॑न् त्सु॒मना॑ यक्ष्यग्ने ॥१॥
यं दे॒वास॒स्त्रिरह॑न्ना॒यज॑न्ते दि॒वेदि॑वे॒ वरु॑णो मि॒त्रो अ॒ग्निः ।
सेमं य॒ज्ञं मधु॑मन्तं कृधी न॒स्तनू॑नपाद् घृ॒तयो॑निं वि॒धन्त॑म् ॥२॥
प्र दीधि॑तिर्वि॒श्ववा॑रा जिगाति॒ होता॑रमि॒ळः प्र॑थ॒मं यज॑ध्यै ।
अच्छा॒ नमो॑भिर्वृष॒भं व॒न्दध्यै॒ स दे॒वान् य॑क्षदिषि॒तो यजी॑यान् ॥३॥
ऊ॒र्ध्वो वां॑ गा॒तुर॑ध्व॒रे अ॑कार्यू॒र्ध्वा शो॒चींषि॒ प्रस्थि॑ता॒ रजां॑सि ।
दि॒वो वा॒ नाभा॒ न्य॑सादि॒ होता॑ स्तृणी॒महि॑ दे॒वव्य॑चा॒ वि ब॒र्हिः ॥४॥
स॒प्त हो॒त्राणि॒ मन॑सा वृणा॒ना इन्व॑न्तो॒ विश्वं॒ प्रति॑ यन्नृ॒तेन॑ ।
नृ॒पेश॑सो वि॒दथे॑षु॒ प्र जा॒ता अ॒भी॒३मं य॒ज्ञं वि च॑रन्त पू॒र्वीः ॥५॥
आ भन्द॑माने उ॒षसा॒ उपा॑के उ॒त स्म॑येते त॒न्वा॒३ विरू॑पे ।
यथा॑ नो मि॒त्रो वरु॑णो॒ जुजो॑ष॒दिन्द्रो॑ म॒रुत्वाँ॑ उ॒त वा॒ महो॑भिः ॥६॥
दैव्या॒ होता॑रा प्रथ॒मा न्यृ॑ञ्जे स॒प्त पृ॒क्षास॑: स्व॒धया॑ मदन्ति ।
ऋ॒तं शंस॑न्त ऋ॒तमित् त आ॑हु॒रनु॑ व्र॒तं व्र॑त॒पा दीध्या॑नाः ॥७॥
आ भार॑ती॒ भार॑तीभिः स॒जोषा॒ इळा॑ दे॒वैर्म॑नु॒ष्ये॑भिर॒ग्निः ।
सर॑स्वती सारस्व॒तेभि॑र॒र्वाक् तिस्रो दे॒वीर्ब॒र्हिरेदं स॑दन्तु ॥८॥
तन्न॑स्तु॒रीप॒मध॑ पोषयि॒त्नु देव॑ त्वष्ट॒र्वि र॑रा॒णः स्य॑स्व ।
यतो॑ वी॒रः क॑र्म॒ण्य॑: सु॒दक्षो॑ यु॒क्तग्रा॑वा॒ जाय॑ते दे॒वका॑मः ॥९॥
वन॑स्प॒तेऽव॑ सृ॒जोप॑ दे॒वान॒ग्निर्ह॒विः श॑मि॒ता सू॑दयाति ।
सेदु॒ होता॑ स॒त्यत॑रो यजाति॒ यथा॑ दे॒वानां॒ जनि॑मानि॒ वेद॑ ॥१०॥
आ या॑ह्यग्ने समिधा॒नो अ॒र्वाङिन्द्रे॑ण दे॒वैः स॒रथं॑ तु॒रेभि॑: ।
ब॒र्हिर्न॑ आस्ता॒मदि॑तिः सुपु॒त्रा स्वाहा॑ दे॒वा अ॒मृता॑ मादयन्ताम् ॥११॥
११ gāthino viśvāmitraḥ | āprīsūktaṃ (१ idhmaḥ samiddho’gnirvā, २ tanūnapāt, ३ iḷaḥ, ४ barhiḥ, ५ devīrdvāraḥ, ६ uṣāsanaktā, ७ daivyo hotārau pracetasau, ८ tisro devyaḥsarasvatīḷābhāratyaḥ, ९ tvaṣṭā, १० vanaspatiḥ, ११ svāhākṛtayaḥ) | triṣṭup | sa॒mitsa॑mit su॒manā॑ bodhya॒sme śu॒cāśu॑cā suma॒tiṃ rā॑si॒ vasva॑: | ā de॑va de॒vān ya॒jathā॑ya vakṣi॒ sakhā॒ sakhī॑n tsu॒manā॑ yakṣyagne || १ || yaṃ de॒vāsa॒striraha॑nnā॒yaja॑nte di॒vedi॑ve॒ varu॑ṇo mi॒tro a॒gniḥ | semaṃ ya॒jñaṃ madhu॑mantaṃ kṛdhī na॒stanū॑napād ghṛ॒tayo॑niṃ vi॒dhanta॑m || २ || pra dīdhi॑tirvi॒śvavā॑rā jigāti॒ hotā॑rami॒ḷaḥ pra॑tha॒maṃ yaja॑dhyai | acchā॒ namo॑bhirvṛṣa॒bhaṃ va॒ndadhyai॒ sa de॒vān ya॑kṣadiṣi॒to yajī॑yān || ३ || ū॒rdhvo vāṃ॑ gā॒tura॑dhva॒re a॑kāryū॒rdhvā śo॒cīṃṣi॒ prasthi॑tā॒ rajāṃ॑si | di॒vo vā॒ nābhā॒ nya॑sādi॒ hotā॑ stṛṇī॒mahi॑ de॒vavya॑cā॒ vi ba॒rhiḥ || ४ || sa॒pta ho॒trāṇi॒ mana॑sā vṛṇā॒nā inva॑nto॒ viśvaṃ॒ prati॑ yannṛ॒tena॑ | nṛ॒peśa॑so vi॒dathe॑ṣu॒ pra jā॒tā a॒bhī॒३maṃ ya॒jñaṃ vi ca॑ranta pū॒rvīḥ || ५ || ā bhanda॑māne u॒ṣasā॒ upā॑ke u॒ta sma॑yete ta॒nvā॒३ virū॑pe | yathā॑ no mi॒tro varu॑ṇo॒ jujo॑ṣa॒dindro॑ ma॒rutvām̐॑ u॒ta vā॒ maho॑bhiḥ || ६ || daivyā॒ hotā॑rā pratha॒mā nyṛ॑ñje sa॒pta pṛ॒kṣāsa॑: sva॒dhayā॑ madanti | ṛ॒taṃ śaṃsa॑nta ṛ॒tamit ta ā॑hu॒ranu॑ vra॒taṃ vra॑ta॒pā dīdhyā॑nāḥ || ७ || ā bhāra॑tī॒ bhāra॑tībhiḥ sa॒joṣā॒ iḷā॑ de॒vairma॑nu॒ṣye॑bhira॒gniḥ | sara॑svatī sārasva॒tebhi॑ra॒rvāk tisro de॒vīrba॒rhiredaṃ sa॑dantu || ८ || tanna॑stu॒rīpa॒madha॑ poṣayi॒tnu deva॑ tvaṣṭa॒rvi ra॑rā॒ṇaḥ sya॑sva | yato॑ vī॒raḥ ka॑rma॒ṇya॑: su॒dakṣo॑ yu॒ktagrā॑vā॒ jāya॑te de॒vakā॑maḥ || ९ || vana॑spa॒te’va॑ sṛ॒jopa॑ de॒vāna॒gnirha॒viḥ śa॑mi॒tā sū॑dayāti | sedu॒ hotā॑ sa॒tyata॑ro yajāti॒ yathā॑ de॒vānāṃ॒ jani॑māni॒ veda॑ || १० || ā yā॑hyagne samidhā॒no a॒rvāṅindre॑ṇa de॒vaiḥ sa॒rathaṃ॑ tu॒rebhi॑: | ba॒rhirna॑ āstā॒madi॑tiḥ supu॒trā svāhā॑ de॒vā a॒mṛtā॑ mādayantām || ११ ||