११ गाथिनो विश्वामित्रः। इन्द्रः। त्रिष्टुप्।
तिष्ठा॒ हरी॒ रथ॒ आ यु॒ज्यमा॑ना या॒हि वा॒युर्न नि॒युतो॑ नो॒ अच्छ॑ ।
पिबा॒स्यन्धो॑ अ॒भिसृ॑ष्टो अ॒स्मे इन्द्र॒ स्वाहा॑ ररि॒मा ते॒ मदा॑य ॥१॥
उपा॑जि॒रा पु॑रुहू॒ताय॒ सप्ती॒ हरी॒ रथ॑स्य धू॒र्ष्वा यु॑नज्मि ।
द्र॒वद् यथा॒ सम्भृ॑तं वि॒श्वत॑श्चि॒दुपे॒मं य॒ज्ञमा व॑हात॒ इन्द्र॑म् ॥२॥
उपो॑ नयस्व॒ वृष॑णा तपु॒ष्पोतेम॑व॒ त्वं वृ॑षभ स्वधावः ।
ग्रसे॑ता॒मश्वा॒ वि मु॑चे॒ह शोणा॑ दि॒वेदि॑वे स॒दृशी॑रद्धि धा॒नाः ॥३॥
ब्रह्म॑णा ते ब्रह्म॒युजा॑ युनज्मि॒ हरी॒ सखा॑या सध॒माद॑ आ॒शू ।
स्थि॒रं रथं॑ सु॒खमि॑न्द्राधि॒तिष्ठ॑न् प्रजा॒नन् वि॒द्वाँ उप॑ याहि॒ सोम॑म् ॥४॥
मा ते॒ हरी॒ वृष॑णा वी॒तपृ॑ष्ठा॒ नि री॑रम॒न्यज॑मानासो अ॒न्ये ।
अ॒त्याया॑हि॒ शश्व॑तो व॒यं तेऽरं॑ सु॒तेभि॑: कृणवाम॒ सोमै॑: ॥५॥
तवा॒यं सोम॒स्त्वमेह्य॒र्वाङ् श॑श्वत्त॒मं सु॒मना॑ अ॒स्य पा॑हि ।
अ॒स्मिन् य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इन्दु॑मिन्द्र ॥६॥
स्ती॒र्णं ते॑ ब॒र्हिः सु॒त इ॑न्द्र॒ सोम॑: कृ॒ता धा॒ना अत्त॑वे ते॒ हरि॑भ्याम् ।
तदो॑कसे पुरु॒शाका॑य॒ वृष्णे॑ म॒रुत्व॑ते॒ तुभ्यं॑ रा॒ता ह॒वींषि॑ ॥७॥
इ॒मं नर॒: पर्व॑ता॒स्तुभ्य॒माप॒: समि॑न्द्र॒ गोभि॒र्मधु॑मन्तमक्रन् ।
तस्या॒गत्या॑ सु॒मना॑ ऋष्व पाहि प्रजा॒नन् वि॒द्वान्प॒थ्या॒३ अनु॒ स्वाः ॥८॥
याँ आभ॑जो म॒रुत॑ इन्द्र॒ सोमे॒ ये त्वामव॑र्ध॒न्नभ॑वन् ग॒णस्ते॑ ।
तेभि॑रे॒तं स॒जोषा॑ वावशा॒नो॒३ऽग्नेः पि॑ब जि॒ह्वया॒ सोम॑मिन्द्र ॥९॥
इन्द्र॒ पिब॑ स्व॒धया॑ चित् सु॒तस्या॒ऽग्नेर्वा॑ पाहि जि॒ह्वया॑ यजत्र ।
अ॒ध्व॒र्योर्वा॒ प्रय॑तं शक्र॒ हस्ता॒द्धोतु॑र्वा य॒ज्ञं ह॒विषो॑ जुषस्व ॥१०॥॥
शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥११॥॥
११ gāthino viśvāmitraḥ | indraḥ | triṣṭup | tiṣṭhā॒ harī॒ ratha॒ ā yu॒jyamā॑nā yā॒hi vā॒yurna ni॒yuto॑ no॒ accha॑ | pibā॒syandho॑ a॒bhisṛ॑ṣṭo a॒sme indra॒ svāhā॑ rari॒mā te॒ madā॑ya || १ || upā॑ji॒rā pu॑ruhū॒tāya॒ saptī॒ harī॒ ratha॑sya dhū॒rṣvā yu॑najmi | dra॒vad yathā॒ sambhṛ॑taṃ vi॒śvata॑ści॒dupe॒maṃ ya॒jñamā va॑hāta॒ indra॑m || २ || upo॑ nayasva॒ vṛṣa॑ṇā tapu॒ṣpotema॑va॒ tvaṃ vṛ॑ṣabha svadhāvaḥ | grase॑tā॒maśvā॒ vi mu॑ce॒ha śoṇā॑ di॒vedi॑ve sa॒dṛśī॑raddhi dhā॒nāḥ || ३ || brahma॑ṇā te brahma॒yujā॑ yunajmi॒ harī॒ sakhā॑yā sadha॒māda॑ ā॒śū | sthi॒raṃ rathaṃ॑ su॒khami॑ndrādhi॒tiṣṭha॑n prajā॒nan vi॒dvām̐ upa॑ yāhi॒ soma॑m || ४ || mā te॒ harī॒ vṛṣa॑ṇā vī॒tapṛ॑ṣṭhā॒ ni rī॑rama॒nyaja॑mānāso a॒nye | a॒tyāyā॑hi॒ śaśva॑to va॒yaṃ te’raṃ॑ su॒tebhi॑: kṛṇavāma॒ somai॑: || ५ || tavā॒yaṃ soma॒stvamehya॒rvāṅ śa॑śvatta॒maṃ su॒manā॑ a॒sya pā॑hi | a॒smin ya॒jñe ba॒rhiṣyā ni॒ṣadyā॑ dadhi॒ṣvemaṃ ja॒ṭhara॒ indu॑mindra || ६ || stī॒rṇaṃ te॑ ba॒rhiḥ su॒ta i॑ndra॒ soma॑: kṛ॒tā dhā॒nā atta॑ve te॒ hari॑bhyām | tado॑kase puru॒śākā॑ya॒ vṛṣṇe॑ ma॒rutva॑te॒ tubhyaṃ॑ rā॒tā ha॒vīṃṣi॑ || ७ || i॒maṃ nara॒: parva॑tā॒stubhya॒māpa॒: sami॑ndra॒ gobhi॒rmadhu॑mantamakran | tasyā॒gatyā॑ su॒manā॑ ṛṣva pāhi prajā॒nan vi॒dvānpa॒thyā॒३ anu॒ svāḥ || ८ || yām̐ ābha॑jo ma॒ruta॑ indra॒ some॒ ye tvāmava॑rdha॒nnabha॑van ga॒ṇaste॑ | tebhi॑re॒taṃ sa॒joṣā॑ vāvaśā॒no॒३’gneḥ pi॑ba ji॒hvayā॒ soma॑mindra || ९ || indra॒ piba॑ sva॒dhayā॑ cit su॒tasyā॒’gnervā॑ pāhi ji॒hvayā॑ yajatra | a॒dhva॒ryorvā॒ praya॑taṃ śakra॒ hastā॒ddhotu॑rvā ya॒jñaṃ ha॒viṣo॑ juṣasva || १० || || śu॒naṃ hu॑vema ma॒ghavā॑na॒mindra॑ma॒smin bhare॒ nṛta॑maṃ॒ vāja॑sātau | śṛ॒ṇvanta॑mu॒gramū॒taye॑ sa॒matsu॒ ghnantaṃ॑ vṛ॒trāṇi॑ saṃ॒jitaṃ॒ dhanā॑nām || ११ || ||