६ गाथिनो विश्वामित्रः। अग्निः।१-२, ६ गायत्री, ३ उष्णिक्, ४ त्रिष्टुप्, ५ जगती।
अग्ने॑ जु॒षस्व॑ नो ह॒विः पु॑रो॒ळाशं॑ जातवेदः । प्रा॒त॒:सा॒वे धि॑यावसो ॥१॥
पु॒रो॒ळा अ॑ग्ने पच॒तस्तुभ्यं॑ वा घा॒ परि॑ष्कृतः । तं जु॑षस्व यविष्ठ्य ॥२॥
अग्ने॑ वी॒हि पु॑रो॒ळाश॒माहु॑तं ति॒रोअ॑ह्न्यम् । सह॑सः सू॒नुर॑स्यध्व॒रे हि॒तः ॥३॥
माध्यं॑दिने॒ सव॑ने जातवेदः पुरो॒ळाश॑मि॒ह क॑वे जुषस्व ।
अग्ने॑ य॒ह्वस्य॒ तव॑ भाग॒धेयं॒ न प्र मि॑नन्ति वि॒दथे॑षु॒ धीरा॑: ॥४॥
अग्ने॑ तृ॒तीये॒ सव॑ने॒ हि कानि॑षः पुरो॒ळाशं॑ सहसः सून॒वाहु॑तम् ।
अथा॑ दे॒वेष्व॑ध्व॒रं वि॑प॒न्यया॒ धा रत्न॑वन्तम॒मृते॑षु॒ जागृ॑विम् ॥५॥
अग्ने॑ वृधा॒न आहु॑तिं पुरो॒ळाशं॑ जातवेदः । जु॒षस्व॑ ति॒रोअ॑ह्न्यम् ॥६॥
६ gāthino viśvāmitraḥ | agniḥ | १-२, ६ gāyatrī, ३ uṣṇik, ४ triṣṭup, ५ jagatī | agne॑ ju॒ṣasva॑ no ha॒viḥ pu॑ro॒ḷāśaṃ॑ jātavedaḥ | prā॒ta॒:sā॒ve dhi॑yāvaso || १ || pu॒ro॒ḷā a॑gne paca॒tastubhyaṃ॑ vā ghā॒ pari॑ṣkṛtaḥ | taṃ ju॑ṣasva yaviṣṭhya || २ || agne॑ vī॒hi pu॑ro॒ḷāśa॒māhu॑taṃ ti॒roa॑hnyam | saha॑saḥ sū॒nura॑syadhva॒re hi॒taḥ || ३ || mādhyaṃ॑dine॒ sava॑ne jātavedaḥ puro॒ḷāśa॑mi॒ha ka॑ve juṣasva | agne॑ ya॒hvasya॒ tava॑ bhāga॒dheyaṃ॒ na pra mi॑nanti vi॒dathe॑ṣu॒ dhīrā॑: || ४ || agne॑ tṛ॒tīye॒ sava॑ne॒ hi kāni॑ṣaḥ puro॒ḷāśaṃ॑ sahasaḥ sūna॒vāhu॑tam | athā॑ de॒veṣva॑dhva॒raṃ vi॑pa॒nyayā॒ dhā ratna॑vantama॒mṛte॑ṣu॒ jāgṛ॑vim || ५ || agne॑ vṛdhā॒na āhu॑tiṃ puro॒ḷāśaṃ॑ jātavedaḥ | ju॒ṣasva॑ ti॒roa॑hnyam || ६ ||