९ गाथिनो विश्वामित्रः, ७ आत्मा। १-३ वैश्वानरोऽग्निः, ४-६ मरुतः, ७-८ आत्मा (अग्निर्वा), ९ विश्वामित्रोपध्यायः।१-६ जगती, ७-९ त्रिष्टुप्।
वै॒श्वा॒न॒रं मन॑सा॒ग्निं नि॒चाय्या॑ ह॒विष्म॑न्तो अनुष॒त्यं स्व॒र्विद॑म् ।
सु॒दानुं॑ दे॒वं र॑थि॒रं व॑सू॒यवो॑ गी॒र्भी र॒ण्वं कु॑शि॒कासो॑ हवामहे ॥१॥
तं शु॒भ्रम॒ग्निमव॑से हवामहे वैश्वान॒रं मा॑त॒रिश्वा॑नमु॒क्थ्य॑म् ।
बृह॒स्पतिं॒ मनु॑षो दे॒वता॑तये॒ विप्रं॒ श्रोता॑र॒मति॑थिं रघु॒ष्यद॑म् ॥२॥
अश्वो॒ न क्रन्द॒ञ्जनि॑भि॒: समि॑ध्यते वैश्वान॒रः कु॑शि॒केभि॑र्यु॒गेयु॑गे ।
स नो॑ अ॒ग्निः सु॒वीर्यं॒ स्वश्व्यं॒ दधा॑तु॒ रत्न॑म॒मृते॑षु॒ जागृ॑विः ॥३॥
प्र य॑न्तु॒ वाजा॒स्तवि॑षीभिर॒ग्नय॑: शु॒भे सम्मि॑श्ला॒: पृष॑तीरयुक्षत ।
बृ॒ह॒दुक्षो॑ म॒रुतो॑ वि॒श्ववे॑दस॒: प्र वे॑पयन्ति॒ पर्व॑ताँ॒ अदा॑भ्याः ॥४॥
अ॒ग्नि॒श्रियो॑ म॒रुतो॑ वि॒श्वकृ॑ष्टय॒ आ त्वे॒षमु॒ग्रमव॑ ईमहे व॒यम् ।
ते स्वा॒निनो॑ रु॒द्रिया॑ व॒र्षनि॑र्णिजः सिं॒हा न हे॒षक्र॑तवः सु॒दान॑वः ॥५॥
व्रातं॑व्रातं ग॒णंग॑णं सुश॒स्तिभि॑र॒ग्नेर्भामं॑ म॒रुता॒मोज॑ ईमहे ।
पृष॑दश्वासो अनव॒भ्ररा॑धसो॒ गन्ता॑रो य॒ज्ञं वि॒दथे॑षु॒ धीरा॑: ॥६॥
अ॒ग्निर॑स्मि॒ जन्म॑ना जा॒तवे॑दा घृ॒तं मे॒ चक्षु॑र॒मृतं॑ म आ॒सन् ।
अ॒र्कस्त्रि॒धातू॒ रज॑सो वि॒मानोऽज॑स्रो घ॒र्मो ह॒विर॑स्मि॒ नाम॑ ॥७॥
त्रि॒भिः प॒वित्रै॒रपु॑पो॒द्ध्य१र्कं हृ॒दा म॒तिं ज्योति॒रनु॑ प्रजा॒नन् ।
वर्षि॑ष्ठं॒ रत्न॑मकृत स्व॒धाभि॒रादिद् द्यावा॑पृथि॒वी पर्य॑पश्यत् ॥८॥
श॒तधा॑र॒मुत्स॒मक्षी॑यमाणं विप॒श्चितं॑ पि॒तरं॒ वक्त्वा॑नाम् ।
मे॒ळिं मद॑न्तं पि॒त्रोरु॒पस्थे॒ तं रो॑दसी पिपृतं सत्य॒वाच॑म् ॥९॥
९ gāthino viśvāmitraḥ, ७ ātmā | १-३ vaiśvānaro’gniḥ, ४-६ marutaḥ, ७-८ ātmā (agnirvā), ९ viśvāmitropadhyāyaḥ | १-६ jagatī, ७-९ triṣṭup | vai॒śvā॒na॒raṃ mana॑sā॒gniṃ ni॒cāyyā॑ ha॒viṣma॑nto anuṣa॒tyaṃ sva॒rvida॑m | su॒dānuṃ॑ de॒vaṃ ra॑thi॒raṃ va॑sū॒yavo॑ gī॒rbhī ra॒ṇvaṃ ku॑śi॒kāso॑ havāmahe || १ || taṃ śu॒bhrama॒gnimava॑se havāmahe vaiśvāna॒raṃ mā॑ta॒riśvā॑namu॒kthya॑m | bṛha॒spatiṃ॒ manu॑ṣo de॒vatā॑taye॒ vipraṃ॒ śrotā॑ra॒mati॑thiṃ raghu॒ṣyada॑m || २ || aśvo॒ na kranda॒ñjani॑bhi॒: sami॑dhyate vaiśvāna॒raḥ ku॑śi॒kebhi॑ryu॒geyu॑ge | sa no॑ a॒gniḥ su॒vīryaṃ॒ svaśvyaṃ॒ dadhā॑tu॒ ratna॑ma॒mṛte॑ṣu॒ jāgṛ॑viḥ || ३ || pra ya॑ntu॒ vājā॒stavi॑ṣībhira॒gnaya॑: śu॒bhe sammi॑ślā॒: pṛṣa॑tīrayukṣata | bṛ॒ha॒dukṣo॑ ma॒ruto॑ vi॒śvave॑dasa॒: pra ve॑payanti॒ parva॑tām॒̐ adā॑bhyāḥ || ४ || a॒gni॒śriyo॑ ma॒ruto॑ vi॒śvakṛ॑ṣṭaya॒ ā tve॒ṣamu॒gramava॑ īmahe va॒yam | te svā॒nino॑ ru॒driyā॑ va॒rṣani॑rṇijaḥ siṃ॒hā na he॒ṣakra॑tavaḥ su॒dāna॑vaḥ || ५ || vrātaṃ॑vrātaṃ ga॒ṇaṃga॑ṇaṃ suśa॒stibhi॑ra॒gnerbhāmaṃ॑ ma॒rutā॒moja॑ īmahe | pṛṣa॑daśvāso anava॒bhrarā॑dhaso॒ gantā॑ro ya॒jñaṃ vi॒dathe॑ṣu॒ dhīrā॑: || ६ || a॒gnira॑smi॒ janma॑nā jā॒tave॑dā ghṛ॒taṃ me॒ cakṣu॑ra॒mṛtaṃ॑ ma ā॒san | a॒rkastri॒dhātū॒ raja॑so vi॒māno’ja॑sro gha॒rmo ha॒vira॑smi॒ nāma॑ || ७ || tri॒bhiḥ pa॒vitrai॒rapu॑po॒ddhya१rkaṃ hṛ॒dā ma॒tiṃ jyoti॒ranu॑ prajā॒nan | varṣi॑ṣṭhaṃ॒ ratna॑makṛta sva॒dhābhi॒rādid dyāvā॑pṛthi॒vī parya॑paśyat || ८ || śa॒tadhā॑ra॒mutsa॒makṣī॑yamāṇaṃ vipa॒ścitaṃ॑ pi॒taraṃ॒ vaktvā॑nām | me॒ḷiṃ mada॑ntaṃ pi॒troru॒pasthe॒ taṃ ro॑dasī pipṛtaṃ satya॒vāca॑m || ९ ||