५ गाथी कौशिकः। अग्निः, ४ पुरीष्या अग्नयः । त्रिष्टुप्, ४ अनुष्टुप्।
अ॒यं सो अ॒ग्निर्यस्मि॒न् त्सोम॒मिन्द्र॑: सु॒तं द॒धे ज॒ठरे॑ वावशा॒नः ।
स॒ह॒स्रिणं॒ वाज॒मत्यं॒ न सप्तिं॑ सस॒वान् त्सन् त्स्तू॑यसे जातवेदः ॥१॥
अग्ने॒ यत् ते॑ दि॒वि वर्च॑: पृथि॒व्यां यदोष॑धीष्व॒प्स्वा य॑जत्र ।
येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षा॑: ॥२॥
अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ ऊ॑चिषे॒ धिष्ण्या॒ ये ।
या रो॑च॒ने प॒रस्ता॒त् सूर्य॑स्य॒ याश्चा॒वस्ता॑दुप॒तिष्ठ॑न्त॒ आप॑: ॥३॥
पु॒री॒ष्या॑सो अ॒ग्नय॑: प्राव॒णेभि॑: स॒जोष॑सः ।
जु॒षन्तां॑ य॒ज्ञम॒द्रुहो॑ऽनमी॒वा इषो॑ म॒हीः ॥४॥
इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑: सू॒नुस्तन॑यो वि॒जावा ऽग्ने॒ सा ते॑ सुम॒तिर्भू॑त्व॒स्मे ॥५॥
५ gāthī kauśikaḥ | agniḥ, ४ purīṣyā agnayaḥ | triṣṭup, ४ anuṣṭup | a॒yaṃ so a॒gniryasmi॒n tsoma॒mindra॑: su॒taṃ da॒dhe ja॒ṭhare॑ vāvaśā॒naḥ | sa॒ha॒sriṇaṃ॒ vāja॒matyaṃ॒ na saptiṃ॑ sasa॒vān tsan tstū॑yase jātavedaḥ || १ || agne॒ yat te॑ di॒vi varca॑: pṛthi॒vyāṃ yadoṣa॑dhīṣva॒psvā ya॑jatra | yenā॒ntari॑kṣamu॒rvā॑ta॒tantha॑ tve॒ṣaḥ sa bhā॒nura॑rṇa॒vo nṛ॒cakṣā॑: || २ || agne॑ di॒vo arṇa॒macchā॑ jigā॒syacchā॑ de॒vām̐ ū॑ciṣe॒ dhiṣṇyā॒ ye | yā ro॑ca॒ne pa॒rastā॒t sūrya॑sya॒ yāścā॒vastā॑dupa॒tiṣṭha॑nta॒ āpa॑: || ३ || pu॒rī॒ṣyā॑so a॒gnaya॑: prāva॒ṇebhi॑: sa॒joṣa॑saḥ | ju॒ṣantāṃ॑ ya॒jñama॒druho॑’namī॒vā iṣo॑ ma॒hīḥ || ४ || iḷā॑magne puru॒daṃsaṃ॑ sa॒niṃ goḥ śa॑śvatta॒maṃ hava॑mānāya sādha | syānna॑: sū॒nustana॑yo vi॒jāvā ’gne॒ sā te॑ suma॒tirbhū॑tva॒sme || ५ ||