५ गाथी कौशिकः। अग्निः, १, ५ विश्वे देवाः। त्रिष्टुप्।
अ॒ग्निमु॒षस॑म॒श्विना॑ दधि॒क्रां व्यु॑ष्टिषु हवते॒ वह्नि॑रु॒क्थैः ।
सु॒ज्योति॑षो नः शृण्वन्तु दे॒वाः स॒जोष॑सो अध्व॒रं वा॑वशा॒नाः ॥१॥
अग्ने॒ त्री ते॒ वाजि॑ना॒ त्री ष॒धस्था॑ ति॒स्रस्ते॑ जि॒ह्वा ऋ॑तजात पू॒र्वीः ।
ति॒स्र उ॑ ते त॒न्वो॑ दे॒ववा॑ता॒स्ताभि॑र्नः पाहि॒ गिरो॒ अप्र॑युच्छन् ॥२॥
अग्ने॒ भूरी॑णि॒ तव॑ जातवेदो॒ देव॑ स्वधावो॒ऽमृत॑स्य॒ नाम॑ ।
याश्च॑ मा॒या मा॒यिनां॑ विश्वमिन्व॒ त्वे पू॒र्वीः सं॑द॒धुः पृ॑ष्टबन्धो ॥३॥
अ॒ग्निर्ने॒ता भग॑ इव क्षिती॒नां दैवी॑नां दे॒व ऋ॑तु॒पा ऋ॒तावा॑ ।
स वृ॑त्र॒हा स॒नयो॑ वि॒श्ववे॑दा॒: पर्ष॒द् विश्वाति॑ दुरि॒ता गृ॒णन्त॑म् ॥४॥
द॒धि॒क्राम॒ग्निमु॒षसं॑ च दे॒वीं बृह॒स्पतिं॑ सवि॒तारं॑ च दे॒वम् ।
अ॒श्विना॑ मि॒त्रावरु॑णा॒ भगं॑ च॒ वसू॑न् रु॒द्राँ आ॑दि॒त्याँ इ॒ह हु॑वे ॥५॥
५ gāthī kauśikaḥ | agniḥ, १, ५ viśve devāḥ | triṣṭup | a॒gnimu॒ṣasa॑ma॒śvinā॑ dadhi॒krāṃ vyu॑ṣṭiṣu havate॒ vahni॑ru॒kthaiḥ | su॒jyoti॑ṣo naḥ śṛṇvantu de॒vāḥ sa॒joṣa॑so adhva॒raṃ vā॑vaśā॒nāḥ || १ || agne॒ trī te॒ vāji॑nā॒ trī ṣa॒dhasthā॑ ti॒sraste॑ ji॒hvā ṛ॑tajāta pū॒rvīḥ | ti॒sra u॑ te ta॒nvo॑ de॒vavā॑tā॒stābhi॑rnaḥ pāhi॒ giro॒ apra॑yucchan || २ || agne॒ bhūrī॑ṇi॒ tava॑ jātavedo॒ deva॑ svadhāvo॒’mṛta॑sya॒ nāma॑ | yāśca॑ mā॒yā mā॒yināṃ॑ viśvaminva॒ tve pū॒rvīḥ saṃ॑da॒dhuḥ pṛ॑ṣṭabandho || ३ || a॒gnirne॒tā bhaga॑ iva kṣitī॒nāṃ daivī॑nāṃ de॒va ṛ॑tu॒pā ṛ॒tāvā॑ | sa vṛ॑tra॒hā sa॒nayo॑ vi॒śvave॑dā॒: parṣa॒d viśvāti॑ duri॒tā gṛ॒ṇanta॑m || ४ || da॒dhi॒krāma॒gnimu॒ṣasaṃ॑ ca de॒vīṃ bṛha॒spatiṃ॑ savi॒tāraṃ॑ ca de॒vam | a॒śvinā॑ mi॒trāvaru॑ṇā॒ bhagaṃ॑ ca॒ vasū॑n ru॒drām̐ ā॑di॒tyām̐ i॒ha hu॑ve || ५ ||