५ गाथी कौशिकः। अग्निः। त्रिष्टुप्।
अ॒ग्निं होता॑रं॒ प्र वृ॑णे मि॒येधे॒ गृत्सं॑ क॒विं वि॑श्व॒विद॒ममू॑रम् ।
स नो॑ यक्षद् दे॒वता॑ता॒ यजी॑यान् रा॒ये वाजा॑य वनते म॒घानि॑ ॥१॥
प्र ते॑ अग्ने ह॒विष्म॑तीमिय॒र्म्यच्छा॑ सुद्यु॒म्नां रा॒तिनीं॑ घृ॒ताची॑म् ।
प्र॒द॒क्षि॒णिद् दे॒वता॑तिमुरा॒णः सं रा॒तिभि॒र्वसु॑भिर्य॒ज्ञम॑श्रेत् ॥२॥
स तेजी॑यसा॒ मन॑सा॒ त्वोत॑ उ॒त शि॑क्ष स्वप॒त्यस्य॑ शि॒क्षोः ।
अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्व॑: ॥३॥
भूरी॑णि॒ हि त्वे द॑धि॒रे अनी॒का ऽग्ने॑ दे॒वस्य॒ यज्य॑वो॒ जना॑सः ।
स आ व॑ह दे॒वता॑तिं यविष्ठ॒ शर्धो॒ यद॒द्य दि॒व्यं यजा॑सि ॥४॥
यत् त्वा॒ होता॑रम॒नज॑न् मि॒येधे॑ निषा॒दय॑न्तो य॒जथा॑य दे॒वाः ।
स त्वं नो॑ अग्नेऽवि॒तेह बो॒ध्यधि॒ श्रवां॑सि धेहि नस्त॒नूषु॑ ॥५॥
५ gāthī kauśikaḥ | agniḥ | triṣṭup | a॒gniṃ hotā॑raṃ॒ pra vṛ॑ṇe mi॒yedhe॒ gṛtsaṃ॑ ka॒viṃ vi॑śva॒vida॒mamū॑ram | sa no॑ yakṣad de॒vatā॑tā॒ yajī॑yān rā॒ye vājā॑ya vanate ma॒ghāni॑ || १ || pra te॑ agne ha॒viṣma॑tīmiya॒rmyacchā॑ sudyu॒mnāṃ rā॒tinīṃ॑ ghṛ॒tācī॑m | pra॒da॒kṣi॒ṇid de॒vatā॑timurā॒ṇaḥ saṃ rā॒tibhi॒rvasu॑bhirya॒jñama॑śret || २ || sa tejī॑yasā॒ mana॑sā॒ tvota॑ u॒ta śi॑kṣa svapa॒tyasya॑ śi॒kṣoḥ | agne॑ rā॒yo nṛta॑masya॒ prabhū॑tau bhū॒yāma॑ te suṣṭu॒taya॑śca॒ vasva॑: || ३ || bhūrī॑ṇi॒ hi tve da॑dhi॒re anī॒kā ’gne॑ de॒vasya॒ yajya॑vo॒ janā॑saḥ | sa ā va॑ha de॒vatā॑tiṃ yaviṣṭha॒ śardho॒ yada॒dya di॒vyaṃ yajā॑si || ४ || yat tvā॒ hotā॑rama॒naja॑n mi॒yedhe॑ niṣā॒daya॑nto ya॒jathā॑ya de॒vāḥ | sa tvaṃ no॑ agne’vi॒teha bo॒dhyadhi॒ śravāṃ॑si dhehi nasta॒nūṣu॑ || ५ ||