EeseDharmaSanātana Library
926मण्डल 10 · सूक्त 89
18 shlokइन्द्रं॑ स्तवा॒ नृत॑मं॒ यस्य॑ म॒ह्ना वि॑बबा॒धे रो॑च॒ना वि ज्मो अन्ता॑न् ।
आ यः प॒प्रौ च॑र्षणी॒धृद्वरो॑भि॒: प्र सिन्धु॑भ्यो रिरिचा॒नो म॑हि॒त्वा ॥१॥
indraṃ॑ stavā॒ nṛta॑maṃ॒ yasya॑ ma॒hnā vi॑babā॒dhe ro॑ca॒nā vi jmo antā॑n | ā yaḥ pa॒prau ca॑rṣaṇī॒dhṛdvaro॑bhi॒: pra sindhu॑bhyo riricā॒no ma॑hi॒tvā || १ ||
स सूर्य॒: पर्यु॒रू वरां॒स्येन्द्रो॑ ववृत्या॒द्रथ्ये॑व च॒क्रा ।
अति॑ष्ठन्तमप॒स्यं१ न सर्गं॑ कृ॒ष्णा तमां॑सि॒ त्विष्या॑ जघान ॥२॥
sa sūrya॒: paryu॒rū varāṃ॒syendro॑ vavṛtyā॒drathye॑va ca॒krā | ati॑ṣṭhantamapa॒syaṃ१ na sargaṃ॑ kṛ॒ṣṇā tamāṃ॑si॒ tviṣyā॑ jaghāna || २ ||
स॒मा॒नम॑स्मा॒ अन॑पावृदर्च क्ष्म॒या दि॒वो अस॑मं॒ ब्रह्म॒ नव्य॑म् ।
वि यः पृ॒ष्ठेव॒ जनि॑मान्य॒र्य इन्द्र॑श्चि॒काय॒ न सखा॑यमी॒षे ॥३॥
sa॒mā॒nama॑smā॒ ana॑pāvṛdarca kṣma॒yā di॒vo asa॑maṃ॒ brahma॒ navya॑m | vi yaḥ pṛ॒ṣṭheva॒ jani॑mānya॒rya indra॑ści॒kāya॒ na sakhā॑yamī॒ṣe || ३ ||
इन्द्रा॑य॒ गिरो॒ अनि॑शितसर्गा अ॒पः प्रेर॑यं॒ सग॑रस्य बु॒ध्नात् ।
यो अक्षे॑णेव च॒क्रिया॒ शची॑भि॒र्विष्व॑क्त॒स्तम्भ॑ पृथि॒वीमु॒त द्याम् ॥४॥
indrā॑ya॒ giro॒ ani॑śitasargā a॒paḥ prera॑yaṃ॒ saga॑rasya bu॒dhnāt | yo akṣe॑ṇeva ca॒kriyā॒ śacī॑bhi॒rviṣva॑kta॒stambha॑ pṛthi॒vīmu॒ta dyām || ४ ||
आपा॑न्तमन्युस्तृ॒पल॑प्रभर्मा॒ धुनि॒: शिमी॑वा॒ञ्छरु॑माँ ऋजी॒षी ।
सोमो॒ विश्वा॑न्यत॒सा वना॑नि॒ नार्वागिन्द्रं॑ प्रति॒माना॑नि देभुः ॥५॥
āpā॑ntamanyustṛ॒pala॑prabharmā॒ dhuni॒: śimī॑vā॒ñcharu॑mām̐ ṛjī॒ṣī | somo॒ viśvā॑nyata॒sā vanā॑ni॒ nārvāgindraṃ॑ prati॒mānā॑ni debhuḥ || ५ ||
न यस्य॒ द्यावा॑पृथि॒वी न धन्व॒ नान्तरि॑क्षं॒ नाद्र॑य॒: सोमो॑ अक्षाः ।
यद॑स्य म॒न्युर॑धिनी॒यमा॑नः शृ॒णाति॑ वी॒ळु रु॒जति॑ स्थि॒राणि॑ ॥६॥
na yasya॒ dyāvā॑pṛthi॒vī na dhanva॒ nāntari॑kṣaṃ॒ nādra॑ya॒: somo॑ akṣāḥ | yada॑sya ma॒nyura॑dhinī॒yamā॑naḥ śṛ॒ṇāti॑ vī॒ḷu ru॒jati॑ sthi॒rāṇi॑ || ६ ||
ज॒घान॑ वृ॒त्रं स्वधि॑ति॒र्वने॑व रु॒रोज॒ पुरो॒ अर॑द॒न्न सिन्धू॑न् ।
बि॒भेद॑ गि॒रिं नव॒मिन्न कु॒म्भमा गा इन्द्रो॑ अकृणुत स्व॒युग्भि॑: ॥७॥
ja॒ghāna॑ vṛ॒traṃ svadhi॑ti॒rvane॑va ru॒roja॒ puro॒ ara॑da॒nna sindhū॑n | bi॒bheda॑ gi॒riṃ nava॒minna ku॒mbhamā gā indro॑ akṛṇuta sva॒yugbhi॑: || ७ ||
त्वं ह॒ त्यदृ॑ण॒या इ॑न्द्र॒ धीरो॒ऽसिर्न पर्व॑ वृजि॒ना शृ॑णासि ।
प्र ये मि॒त्रस्य॒ वरु॑णस्य॒ धाम॒ युजं॒ न जना॑ मि॒नन्ति॑ मि॒त्रम् ॥८॥
tvaṃ ha॒ tyadṛ॑ṇa॒yā i॑ndra॒ dhīro॒’sirna parva॑ vṛji॒nā śṛ॑ṇāsi | pra ye mi॒trasya॒ varu॑ṇasya॒ dhāma॒ yujaṃ॒ na janā॑ mi॒nanti॑ mi॒tram || ८ ||
प्र ये मि॒त्रं प्रार्य॒मणं॑ दु॒रेवा॒: प्र सं॒गिर॒: प्र वरु॑णं मि॒नन्ति॑ ।
न्य१मित्रे॑षु व॒धमि॑न्द्र॒ तुम्रं॒ वृष॒न्वृषा॑णमरु॒षं शि॑शीहि ॥९॥
pra ye mi॒traṃ prārya॒maṇaṃ॑ du॒revā॒: pra saṃ॒gira॒: pra varu॑ṇaṃ mi॒nanti॑ | nya१mitre॑ṣu va॒dhami॑ndra॒ tumraṃ॒ vṛṣa॒nvṛṣā॑ṇamaru॒ṣaṃ śi॑śīhi || ९ ||
इन्द्रो॑ दि॒व इन्द्र॑ ईशे पृथि॒व्या इन्द्रो॑ अ॒पामिन्द्र॒ इत्पर्व॑तानाम् ।
इन्द्रो॑ वृ॒धामिन्द्र॒ इन्मेधि॑राणा॒मिन्द्र॒: क्षेमे॒ योगे॒ हव्य॒ इन्द्र॑: ॥१०॥
indro॑ di॒va indra॑ īśe pṛthi॒vyā indro॑ a॒pāmindra॒ itparva॑tānām | indro॑ vṛ॒dhāmindra॒ inmedhi॑rāṇā॒mindra॒: kṣeme॒ yoge॒ havya॒ indra॑: || १० ||
प्राक्तुभ्य॒ इन्द्र॒: प्र वृ॒धो अह॑भ्य॒: प्रान्तरि॑क्षा॒त्प्र स॑मु॒द्रस्य॑ धा॒सेः ।
प्र वात॑स्य॒ प्रथ॑स॒: प्र ज्मो अन्ता॒त्प्र सिन्धु॑भ्यो रिरिचे॒ प्र क्षि॒तिभ्य॑: ॥११॥
prāktubhya॒ indra॒: pra vṛ॒dho aha॑bhya॒: prāntari॑kṣā॒tpra sa॑mu॒drasya॑ dhā॒seḥ | pra vāta॑sya॒ pratha॑sa॒: pra jmo antā॒tpra sindhu॑bhyo ririce॒ pra kṣi॒tibhya॑: || ११ ||
प्र शोशु॑चत्या उ॒षसो॒ न के॒तुर॑सि॒न्वा ते॑ वर्ततामिन्द्र हे॒तिः ।
अश्मे॑व विध्य दि॒व आ सृ॑जा॒नस्तपि॑ष्ठेन॒ हेष॑सा॒ द्रोघ॑मित्रान् ॥१२॥
pra śośu॑catyā u॒ṣaso॒ na ke॒tura॑si॒nvā te॑ vartatāmindra he॒tiḥ | aśme॑va vidhya di॒va ā sṛ॑jā॒nastapi॑ṣṭhena॒ heṣa॑sā॒ drogha॑mitrān || १२ ||
अन्वह॒ मासा॒ अन्विद्वना॒न्यन्वोष॑धी॒रनु॒ पर्व॑तासः ।
अन्विन्द्रं॒ रोद॑सी वावशा॒ने अन्वापो॑ अजिहत॒ जाय॑मानम् ॥१३॥
anvaha॒ māsā॒ anvidvanā॒nyanvoṣa॑dhī॒ranu॒ parva॑tāsaḥ | anvindraṃ॒ roda॑sī vāvaśā॒ne anvāpo॑ ajihata॒ jāya॑mānam || १३ ||
कर्हि॑ स्वि॒त्सा त॑ इन्द्र चे॒त्यास॑द॒घस्य॒ यद्भि॒नदो॒ रक्ष॒ एष॑त् ।
मि॒त्र॒क्रुवो॒ यच्छस॑ने॒ न गाव॑: पृथि॒व्या आ॒पृग॑मु॒या शय॑न्ते ॥१४॥
karhi॑ svi॒tsā ta॑ indra ce॒tyāsa॑da॒ghasya॒ yadbhi॒nado॒ rakṣa॒ eṣa॑t | mi॒tra॒kruvo॒ yacchasa॑ne॒ na gāva॑: pṛthi॒vyā ā॒pṛga॑mu॒yā śaya॑nte || १४ ||
श॒त्रू॒यन्तो॑ अ॒भि ये न॑स्तत॒स्रे महि॒ व्राध॑न्त ओग॒णास॑ इन्द्र ।
अ॒न्धेना॒मित्रा॒स्तम॑सा सचन्तां सुज्यो॒तिषो॑ अ॒क्तव॒स्ताँ अ॒भि ष्यु॑: ॥१५॥
śa॒trū॒yanto॑ a॒bhi ye na॑stata॒sre mahi॒ vrādha॑nta oga॒ṇāsa॑ indra | a॒ndhenā॒mitrā॒stama॑sā sacantāṃ sujyo॒tiṣo॑ a॒ktava॒stām̐ a॒bhi ṣyu॑: || १५ ||
पु॒रूणि॒ हि त्वा॒ सव॑ना॒ जना॑नां॒ ब्रह्मा॑णि॒ मन्द॑न्गृण॒तामृषी॑णाम् ।
इ॒मामा॒घोष॒न्नव॑सा॒ सहू॑तिं ति॒रो विश्वाँ॒ अर्च॑तो याह्य॒र्वाङ् ॥१६॥
pu॒rūṇi॒ hi tvā॒ sava॑nā॒ janā॑nāṃ॒ brahmā॑ṇi॒ manda॑ngṛṇa॒tāmṛṣī॑ṇām | i॒māmā॒ghoṣa॒nnava॑sā॒ sahū॑tiṃ ti॒ro viśvām॒̐ arca॑to yāhya॒rvāṅ || १६ ||
ए॒वा ते॑ व॒यमि॑न्द्र भुञ्जती॒नां वि॒द्याम॑ सुमती॒नां नवा॑नाम् ।
वि॒द्याम॒ वस्तो॒रव॑सा गृ॒णन्तो॑ वि॒श्वामि॑त्रा उ॒त त॑ इन्द्र नू॒नम् ॥१७॥
e॒vā te॑ va॒yami॑ndra bhuñjatī॒nāṃ vi॒dyāma॑ sumatī॒nāṃ navā॑nām | vi॒dyāma॒ vasto॒rava॑sā gṛ॒ṇanto॑ vi॒śvāmi॑trā u॒ta ta॑ indra nū॒nam || १७ ||
शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥१८॥
śu॒naṃ hu॑vema ma॒ghavā॑na॒mindra॑ma॒sminbhare॒ nṛta॑maṃ॒ vāja॑sātau | śṛ॒ṇvanta॑mu॒gramū॒taye॑ sa॒matsu॒ ghnantaṃ॑ vṛ॒trāṇi॑ saṃ॒jitaṃ॒ dhanā॑nām || १८ ||