EeseDharmaSanātana Library
913मण्डल 10 · सूक्त 76
8 shlokआ व॑ ऋञ्जस ऊ॒र्जां व्यु॑ष्टि॒ष्विन्द्रं॑ म॒रुतो॒ रोद॑सी अनक्तन ।
उ॒भे यथा॑ नो॒ अह॑नी सचा॒भुवा॒ सद॑:सदो वरिव॒स्यात॑ उ॒द्भिदा॑ ॥१॥
ā va॑ ṛñjasa ū॒rjāṃ vyu॑ṣṭi॒ṣvindraṃ॑ ma॒ruto॒ roda॑sī anaktana | u॒bhe yathā॑ no॒ aha॑nī sacā॒bhuvā॒ sada॑:sado variva॒syāta॑ u॒dbhidā॑ || १ ||
तदु॒ श्रेष्ठं॒ सव॑नं सुनोत॒नाऽत्यो॒ न हस्त॑यतो॒ अद्रि॑: सो॒तरि॑ ।
वि॒दद्ध्य१र्यो अ॒भिभू॑ति॒ पौंस्यं॑ म॒हो रा॒ये चि॑त्तरुते॒ यदर्व॑तः ॥२॥
tadu॒ śreṣṭhaṃ॒ sava॑naṃ sunota॒nā’tyo॒ na hasta॑yato॒ adri॑: so॒tari॑ | vi॒daddhya१ryo a॒bhibhū॑ti॒ pauṃsyaṃ॑ ma॒ho rā॒ye ci॑ttarute॒ yadarva॑taḥ || २ ||
तदिद्ध्य॑स्य॒ सव॑नं वि॒वेर॒पो यथा॑ पु॒रा मन॑वे गा॒तुमश्रे॑त् ।
गोअ॑र्णसि त्वा॒ष्ट्रे अश्व॑निर्णिजि॒ प्रेम॑ध्व॒रेष्व॑ध्व॒राँ अ॑शिश्रयुः ॥३॥
tadiddhya॑sya॒ sava॑naṃ vi॒vera॒po yathā॑ pu॒rā mana॑ve gā॒tumaśre॑t | goa॑rṇasi tvā॒ṣṭre aśva॑nirṇiji॒ prema॑dhva॒reṣva॑dhva॒rām̐ a॑śiśrayuḥ || ३ ||
अप॑ हत र॒क्षसो॑ भङ्गु॒राव॑त स्कभा॒यत॒ निॠ॑तिं॒ सेध॒ताम॑तिम् ।
आ नो॑ र॒यिं सर्व॑वीरं सुनोतन देवा॒व्यं॑ भरत॒ श्लोक॑मद्रयः ॥४॥
apa॑ hata ra॒kṣaso॑ bhaṅgu॒rāva॑ta skabhā॒yata॒ niṝ॑tiṃ॒ sedha॒tāma॑tim | ā no॑ ra॒yiṃ sarva॑vīraṃ sunotana devā॒vyaṃ॑ bharata॒ śloka॑madrayaḥ || ४ ||
दि॒वश्चि॒दा वोऽम॑वत्तरेभ्यो वि॒भ्वना॑ चिदा॒श्व॑पस्तरेभ्यः ।
वा॒योश्चि॒दा सोम॑रभस्तरेभ्यो॒ऽग्नेश्चि॑दर्च पितु॒कृत्त॑रेभ्यः ॥५॥
di॒vaści॒dā vo’ma॑vattarebhyo vi॒bhvanā॑ cidā॒śva॑pastarebhyaḥ | vā॒yości॒dā soma॑rabhastarebhyo॒’gneści॑darca pitu॒kṛtta॑rebhyaḥ || ५ ||
भु॒रन्तु॑ नो य॒शस॒: सोत्वन्ध॑सो॒ ग्रावा॑णो वा॒चा दि॒विता॑ दि॒वित्म॑ता ।
नरो॒ यत्र॑ दुह॒ते काम्यं॒ मध्वा॑घो॒षय॑न्तो अ॒भितो॑ मिथ॒स्तुर॑: ॥६॥
bhu॒rantu॑ no ya॒śasa॒: sotvandha॑so॒ grāvā॑ṇo vā॒cā di॒vitā॑ di॒vitma॑tā | naro॒ yatra॑ duha॒te kāmyaṃ॒ madhvā॑gho॒ṣaya॑nto a॒bhito॑ mitha॒stura॑: || ६ ||
सु॒न्वन्ति॒ सोमं॑ रथि॒रासो॒ अद्र॑यो॒ निर॑स्य॒ रसं॑ ग॒विषो॑ दुहन्ति॒ ते ।
दु॒हन्त्यूध॑रुप॒सेच॑नाय॒ कं नरो॑ ह॒व्या न म॑र्जयन्त आ॒सभि॑: ॥७॥
su॒nvanti॒ somaṃ॑ rathi॒rāso॒ adra॑yo॒ nira॑sya॒ rasaṃ॑ ga॒viṣo॑ duhanti॒ te | du॒hantyūdha॑rupa॒seca॑nāya॒ kaṃ naro॑ ha॒vyā na ma॑rjayanta ā॒sabhi॑: || ७ ||
ए॒ते न॑र॒: स्वप॑सो अभूतन॒ य इन्द्रा॑य सुनु॒थ सोम॑मद्रयः ।
वा॒मंवा॑मं वो दि॒व्याय॒ धाम्ने॒ वसु॑वसु व॒: पार्थि॑वाय सुन्व॒ते ॥८॥
e॒te na॑ra॒: svapa॑so abhūtana॒ ya indrā॑ya sunu॒tha soma॑madrayaḥ | vā॒maṃvā॑maṃ vo di॒vyāya॒ dhāmne॒ vasu॑vasu va॒: pārthi॑vāya sunva॒te || ८ ||