EeseDharmaSanātana Library
911मण्डल 10 · सूक्त 74
6 shlokवसू॑नां वा चर्कृष॒ इय॑क्षन्धि॒या वा॑ य॒ज्ञैर्वा॒ रोद॑स्योः ।
अर्व॑न्तो वा॒ ये र॑यि॒मन्त॑: सा॒तौ व॒नंअ वा॒ ये सु॒श्रुणं॑ सु॒श्रुतो॒ धुः ॥१॥
vasū॑nāṃ vā carkṛṣa॒ iya॑kṣandhi॒yā vā॑ ya॒jñairvā॒ roda॑syoḥ | arva॑nto vā॒ ye ra॑yi॒manta॑: sā॒tau va॒naṃa vā॒ ye su॒śruṇaṃ॑ su॒śruto॒ dhuḥ || १ ||
हव॑ एषा॒मसु॑रो नक्षत॒ द्यां श्र॑वस्य॒ता मन॑सा निंसत॒ क्षाम् ।
चक्षा॑णा॒ यत्र॑ सुवि॒ताय॑ दे॒वा द्यौर्न वारे॑भिः कृ॒णव॑न्त॒ स्वैः ॥२॥
hava॑ eṣā॒masu॑ro nakṣata॒ dyāṃ śra॑vasya॒tā mana॑sā niṃsata॒ kṣām | cakṣā॑ṇā॒ yatra॑ suvi॒tāya॑ de॒vā dyaurna vāre॑bhiḥ kṛ॒ṇava॑nta॒ svaiḥ || २ ||
इ॒यमे॑षाम॒मृता॑नां॒ गीः स॒र्वता॑ता॒ ये कृ॒पण॑न्त॒ रत्न॑म् ।
धियं॑ च य॒ज्ञं च॒ साध॑न्त॒स्ते नो॑ धान्तु वस॒व्य१मसा॑मि ॥३॥
i॒yame॑ṣāma॒mṛtā॑nāṃ॒ gīḥ sa॒rvatā॑tā॒ ye kṛ॒paṇa॑nta॒ ratna॑m | dhiyaṃ॑ ca ya॒jñaṃ ca॒ sādha॑nta॒ste no॑ dhāntu vasa॒vya१masā॑mi || ३ ||
आ तत्त॑ इन्द्रा॒यव॑: पनन्ता॒ऽभि य ऊ॒र्वं गोम॑न्तं॒ तितृ॑त्सान् ।
स॒कृ॒त्स्वं१ ये पु॑रुपु॒त्रां म॒हीं स॒हस्र॑धारां बृह॒तीं दुदु॑क्षन् ॥४॥
ā tatta॑ indrā॒yava॑: panantā॒’bhi ya ū॒rvaṃ goma॑ntaṃ॒ titṛ॑tsān | sa॒kṛ॒tsvaṃ१ ye pu॑rupu॒trāṃ ma॒hīṃ sa॒hasra॑dhārāṃ bṛha॒tīṃ dudu॑kṣan || ४ ||
शची॑व॒ इन्द्र॒मव॑से कृणुध्व॒मना॑नतं द॒मय॑न्तं पृत॒न्यून् ।
ऋ॒भु॒क्षणं॑ म॒घवा॑नं सुवृ॒क्तिं भर्ता॒ यो वज्रं॒ नर्यं॑ पुरु॒क्षुः ॥५॥
śacī॑va॒ indra॒mava॑se kṛṇudhva॒manā॑nataṃ da॒maya॑ntaṃ pṛta॒nyūn | ṛ॒bhu॒kṣaṇaṃ॑ ma॒ghavā॑naṃ suvṛ॒ktiṃ bhartā॒ yo vajraṃ॒ naryaṃ॑ puru॒kṣuḥ || ५ ||
यद्वा॒वान॑ पुरु॒तमं॑ पुरा॒षाळा वृ॑त्र॒हेन्द्रो॒ नामा॑न्यप्राः ।
अचे॑ति प्रा॒सह॒स्पति॒स्तुवि॑ष्मा॒न्यदी॑मु॒श्मसि॒ कर्त॑वे॒ कर॒त्तत् ॥६॥
yadvā॒vāna॑ puru॒tamaṃ॑ purā॒ṣāḷā vṛ॑tra॒hendro॒ nāmā॑nyaprāḥ | ace॑ti prā॒saha॒spati॒stuvi॑ṣmā॒nyadī॑mu॒śmasi॒ karta॑ve॒ kara॒ttat || ६ ||