EeseDharmaSanātana Library
909मण्डल 10 · सूक्त 72
9 shlokदे॒वानां॒ नु व॒यं जाना॒ प्र वो॑चाम विप॒न्यया॑ । उ॒क्थेषु॑ श॒स्यमा॑नेषु॒ यः पश्या॒दुत्त॑रे यु॒गे ॥१॥
de॒vānāṃ॒ nu va॒yaṃ jānā॒ pra vo॑cāma vipa॒nyayā॑ | u॒ktheṣu॑ śa॒syamā॑neṣu॒ yaḥ paśyā॒dutta॑re yu॒ge || १ ||
ब्रह्म॑ण॒स्पति॑रे॒ता सं क॒र्मार॑ इवाधमत् । दे॒वानां॑ पू॒र्व्ये यु॒गेऽस॑त॒: सद॑जायत ॥२॥
brahma॑ṇa॒spati॑re॒tā saṃ ka॒rmāra॑ ivādhamat | de॒vānāṃ॑ pū॒rvye yu॒ge’sa॑ta॒: sada॑jāyata || २ ||
दे॒वानां॑ यु॒गे प्र॑थ॒मेऽस॑त॒: सद॑जायत । तदाशा॒ अन्व॑जायन्त॒ तदु॑त्ता॒नप॑द॒स्परि॑ ॥३॥
de॒vānāṃ॑ yu॒ge pra॑tha॒me’sa॑ta॒: sada॑jāyata | tadāśā॒ anva॑jāyanta॒ tadu॑ttā॒napa॑da॒spari॑ || ३ ||
भूर्ज॑ज्ञ उत्ता॒नप॑दो भु॒व आशा॑ अजायन्त । अदि॑ते॒र्दक्षो॑ अजायत॒ दक्षा॒द्वदि॑ति॒: परि॑ ॥४॥
bhūrja॑jña uttā॒napa॑do bhu॒va āśā॑ ajāyanta | adi॑te॒rdakṣo॑ ajāyata॒ dakṣā॒dvadi॑ti॒: pari॑ || ४ ||
अदि॑ति॒र्ह्यज॑निष्ट॒ दक्ष॒ या दु॑हि॒ता तव॑ । तां दे॒वा अन्व॑जायन्त भ॒द्रा अ॒मृत॑बन्धवः ॥५॥
adi॑ti॒rhyaja॑niṣṭa॒ dakṣa॒ yā du॑hi॒tā tava॑ | tāṃ de॒vā anva॑jāyanta bha॒drā a॒mṛta॑bandhavaḥ || ५ ||
यद्दे॑वा अ॒दः स॑लि॒ले सुसं॑रब्धा॒ अति॑ष्ठत । अत्रा॑ वो॒ नृत्य॑तामिव ती॒व्रो रे॒णुरपा॑यत ॥६॥
yadde॑vā a॒daḥ sa॑li॒le susaṃ॑rabdhā॒ ati॑ṣṭhata | atrā॑ vo॒ nṛtya॑tāmiva tī॒vro re॒ṇurapā॑yata || ६ ||
यद्दे॑वा॒ यत॑यो यथा॒ भुव॑ना॒न्यपि॑न्वत । अत्रा॑ समु॒द्र आ गू॒ळ्हमा सूर्य॑मजभर्तन ॥७॥
yadde॑vā॒ yata॑yo yathā॒ bhuva॑nā॒nyapi॑nvata | atrā॑ samu॒dra ā gū॒ḷhamā sūrya॑majabhartana || ७ ||
अ॒ष्टौ पु॒त्रासो॒ अदि॑ते॒र्ये जा॒तास्त॒न्व१स्परि॑ । दे॒वाँ उप॒ प्रैत्स॒प्तभि॒: परा॑ मार्ता॒ण्डमा॑स्यत् ॥८॥
a॒ṣṭau pu॒trāso॒ adi॑te॒rye jā॒tāsta॒nva१spari॑ | de॒vām̐ upa॒ praitsa॒ptabhi॒: parā॑ mārtā॒ṇḍamā॑syat || ८ ||
स॒प्तभि॑: पु॒त्रैरदि॑ति॒रुप॒ प्रैत्पू॒र्व्यं यु॒गम् । प्र॒जायै॑ मृ॒त्यवे॑ त्व॒त्पुन॑र्मार्ता॒ण्डमाभ॑रत् ॥९॥
sa॒ptabhi॑: pu॒trairadi॑ti॒rupa॒ praitpū॒rvyaṃ yu॒gam | pra॒jāyai॑ mṛ॒tyave॑ tva॒tpuna॑rmārtā॒ṇḍamābha॑rat || ९ ||