EeseDharmaSanātana Library
844मण्डल 10 · सूक्त 7
7 shlokस्व॒स्ति नो॑ दि॒वो अ॑ग्ने पृथि॒व्या वि॒श्वायु॑र्धेहि य॒जथा॑य देव ।
सचे॑महि॒ तव॑ दस्म प्रके॒तैरु॑रु॒ष्या ण॑ उ॒रुभि॑र्देव॒ शंसै॑: ॥१॥
sva॒sti no॑ di॒vo a॑gne pṛthi॒vyā vi॒śvāyu॑rdhehi ya॒jathā॑ya deva | sace॑mahi॒ tava॑ dasma prake॒tairu॑ru॒ṣyā ṇa॑ u॒rubhi॑rdeva॒ śaṃsai॑: || १ ||
इ॒मा अ॑ग्ने म॒तय॒स्तुभ्यं॑ जा॒ता गोभि॒रश्वै॑र॒भि गृ॑णन्ति॒ राध॑: ।
य॒दा ते॒ मर्तो॒ अनु॒ भोग॒मान॒ड्वसो॒ दधा॑नो म॒तिभि॑: सुजात ॥२॥
i॒mā a॑gne ma॒taya॒stubhyaṃ॑ jā॒tā gobhi॒raśvai॑ra॒bhi gṛ॑ṇanti॒ rādha॑: | ya॒dā te॒ marto॒ anu॒ bhoga॒māna॒ḍvaso॒ dadhā॑no ma॒tibhi॑: sujāta || २ ||
अ॒ग्निं म॑न्ये पि॒तर॑म॒ग्निमा॒पिम॒ग्निं भ्रात॑रं॒ सद॒मित्सखा॑यम् ।
अ॒ग्नेरनी॑कं बृह॒तः स॑पर्यं दि॒वि शु॒क्रं य॑ज॒तं सूर्य॑स्य ॥३॥
a॒gniṃ ma॑nye pi॒tara॑ma॒gnimā॒pima॒gniṃ bhrāta॑raṃ॒ sada॒mitsakhā॑yam | a॒gneranī॑kaṃ bṛha॒taḥ sa॑paryaṃ di॒vi śu॒kraṃ ya॑ja॒taṃ sūrya॑sya || ३ ||
सि॒ध्रा अ॑ग्ने॒ धियो॑ अ॒स्मे सनु॑त्री॒र्यं त्राय॑से॒ दम॒ आ नित्य॑होता ।
ऋ॒तावा॒ स रो॒हिद॑श्वः पुरु॒क्षुर्द्युभि॑रस्मा॒ अह॑भिर्वा॒मम॑स्तु ॥४॥
si॒dhrā a॑gne॒ dhiyo॑ a॒sme sanu॑trī॒ryaṃ trāya॑se॒ dama॒ ā nitya॑hotā | ṛ॒tāvā॒ sa ro॒hida॑śvaḥ puru॒kṣurdyubhi॑rasmā॒ aha॑bhirvā॒mama॑stu || ४ ||
द्युभि॑र्हि॒तं मि॒त्रमि॑व प्र॒योगं॑ प्र॒त्नमृ॒त्विज॑मध्व॒रस्य॑ जा॒रम् ।
बा॒हुभ्या॑म॒ग्निमा॒यवो॑ऽजनन्त वि॒क्षु होता॑रं॒ न्य॑सादयन्त ॥५॥
dyubhi॑rhi॒taṃ mi॒trami॑va pra॒yogaṃ॑ pra॒tnamṛ॒tvija॑madhva॒rasya॑ jā॒ram | bā॒hubhyā॑ma॒gnimā॒yavo॑’jananta vi॒kṣu hotā॑raṃ॒ nya॑sādayanta || ५ ||
स्व॒यं य॑जस्व दि॒वि दे॑व दे॒वान्किं ते॒ पाक॑: कृणव॒दप्र॑चेताः ।
यथाय॑ज ऋ॒तुभि॑र्देव दे॒वाने॒वा य॑जस्व त॒न्वं॑ सुजात ॥६॥
sva॒yaṃ ya॑jasva di॒vi de॑va de॒vānkiṃ te॒ pāka॑: kṛṇava॒dapra॑cetāḥ | yathāya॑ja ṛ॒tubhi॑rdeva de॒vāne॒vā ya॑jasva ta॒nvaṃ॑ sujāta || ६ ||
भवा॑ नो अग्नेऽवि॒तोत गो॒पा भवा॑ वय॒स्कृदु॒त नो॑ वयो॒धाः ।
रास्वा॑ च नः सुमहो ह॒व्यदा॑तिं॒ त्रास्वो॒त न॑स्त॒न्वो॒३ अप्र॑युच्छन् ॥७॥
bhavā॑ no agne’vi॒tota go॒pā bhavā॑ vaya॒skṛdu॒ta no॑ vayo॒dhāḥ | rāsvā॑ ca naḥ sumaho ha॒vyadā॑tiṃ॒ trāsvo॒ta na॑sta॒nvo॒३ apra॑yucchan || ७ ||