EeseDharmaSanātana Library
900मण्डल 10 · सूक्त 63
17 shlokप॒रा॒वतो॒ ये दिधि॑षन्त॒ आप्यं॒ मनु॑प्रीतासो॒ जनि॑मा वि॒वस्व॑तः ।
य॒याते॒र्ये न॑हु॒ष्य॑स्य ब॒र्हिषि॑ दे॒वा आस॑ते॒ ते अधि॑ ब्रुवन्तु नः ॥१॥
pa॒rā॒vato॒ ye didhi॑ṣanta॒ āpyaṃ॒ manu॑prītāso॒ jani॑mā vi॒vasva॑taḥ | ya॒yāte॒rye na॑hu॒ṣya॑sya ba॒rhiṣi॑ de॒vā āsa॑te॒ te adhi॑ bruvantu naḥ || १ ||
विश्वा॒ हि वो॑ नम॒स्या॑नि॒ वन्द्या॒ नामा॑नि देवा उ॒त य॒ज्ञिया॑नि वः ।
ये स्थ जा॒ता अदि॑तेर॒द्भ्यस्परि॒ ये पृ॑थि॒व्यास्ते म॑ इ॒ह श्रु॑ता॒ हव॑म् ॥२॥
viśvā॒ hi vo॑ nama॒syā॑ni॒ vandyā॒ nāmā॑ni devā u॒ta ya॒jñiyā॑ni vaḥ | ye stha jā॒tā adi॑tera॒dbhyaspari॒ ye pṛ॑thi॒vyāste ma॑ i॒ha śru॑tā॒ hava॑m || २ ||
येभ्यो॑ मा॒ता मधु॑म॒त्पिन्व॑ते॒ पय॑: पी॒यूषं॒ द्यौरदि॑ति॒रद्रि॑बर्हाः ।
उ॒क्थशु॑ष्मान्वृषभ॒रान्त्स्वप्न॑स॒स्ताँ आ॑दि॒त्याँ अनु॑ मदा स्व॒स्तये॑ ॥३॥
yebhyo॑ mā॒tā madhu॑ma॒tpinva॑te॒ paya॑: pī॒yūṣaṃ॒ dyauradi॑ti॒radri॑barhāḥ | u॒kthaśu॑ṣmānvṛṣabha॒rāntsvapna॑sa॒stām̐ ā॑di॒tyām̐ anu॑ madā sva॒staye॑ || ३ ||
नृ॒चक्ष॑सो॒ अनि॑मिषन्तो अ॒र्हणा॑ बृ॒हद्दे॒वासो॑ अमृत॒त्वमा॑नशुः ।
ज्यो॒तीर॑था॒ अहि॑माया॒ अना॑गसो दि॒वो व॒र्ष्माणं॑ वसते स्व॒स्तये॑ ॥४॥
nṛ॒cakṣa॑so॒ ani॑miṣanto a॒rhaṇā॑ bṛ॒hadde॒vāso॑ amṛta॒tvamā॑naśuḥ | jyo॒tīra॑thā॒ ahi॑māyā॒ anā॑gaso di॒vo va॒rṣmāṇaṃ॑ vasate sva॒staye॑ || ४ ||
स॒म्राजो॒ ये सु॒वृधो॑ य॒ज्ञमा॑य॒युरप॑रिह्वृता दधि॒रे दि॒वि क्षय॑म् ।
ताँ आ वि॑वास॒ नम॑सा सुवृ॒क्तिभि॑र्म॒हो आ॑दि॒त्याँ अदि॑तिं स्व॒स्तये॑ ॥५॥
sa॒mrājo॒ ye su॒vṛdho॑ ya॒jñamā॑ya॒yurapa॑rihvṛtā dadhi॒re di॒vi kṣaya॑m | tām̐ ā vi॑vāsa॒ nama॑sā suvṛ॒ktibhi॑rma॒ho ā॑di॒tyām̐ adi॑tiṃ sva॒staye॑ || ५ ||
को व॒: स्तोमं॑ राधति॒ यं जुजो॑षथ॒ विश्वे॑ देवासो मनुषो॒ यति॒ ष्ठन॑ ।
को वो॑ऽध्व॒रं तु॑विजाता॒ अरं॑ कर॒द्यो न॒: पर्ष॒दत्यंह॑: स्व॒स्तये॑ ॥६॥
ko va॒: stomaṃ॑ rādhati॒ yaṃ jujo॑ṣatha॒ viśve॑ devāso manuṣo॒ yati॒ ṣṭhana॑ | ko vo॑’dhva॒raṃ tu॑vijātā॒ araṃ॑ kara॒dyo na॒: parṣa॒datyaṃha॑: sva॒staye॑ || ६ ||
येभ्यो॒ होत्रां॑ प्रथ॒मामा॑ये॒जे मनु॒: समि॑द्धाग्नि॒र्मन॑सा स॒प्त होतृ॑भिः ।
त आ॑दित्या॒ अभ॑यं॒ शर्म॑ यच्छत सु॒गा न॑: कर्त सु॒पथा॑ स्व॒स्तये॑ ॥७॥
yebhyo॒ hotrāṃ॑ pratha॒māmā॑ye॒je manu॒: sami॑ddhāgni॒rmana॑sā sa॒pta hotṛ॑bhiḥ | ta ā॑dityā॒ abha॑yaṃ॒ śarma॑ yacchata su॒gā na॑: karta su॒pathā॑ sva॒staye॑ || ७ ||
य ईशि॑रे॒ भुव॑नस्य॒ प्रचे॑तसो॒ विश्व॑स्य स्था॒तुर्जग॑तश्च॒ मन्त॑वः ।
ते न॑: कृ॒तादकृ॑ता॒देन॑स॒स्पर्य॒द्या दे॑वासः पिपृता स्व॒स्तये॑ ॥८॥
ya īśi॑re॒ bhuva॑nasya॒ prace॑taso॒ viśva॑sya sthā॒turjaga॑taśca॒ manta॑vaḥ | te na॑: kṛ॒tādakṛ॑tā॒dena॑sa॒sparya॒dyā de॑vāsaḥ pipṛtā sva॒staye॑ || ८ ||
भरे॒ष्विन्द्रं॑ सु॒हवं॑ हवामहेंऽहो॒मुचं॑ सु॒कृतं॒ दैव्यं॒ जन॑म् ।
अ॒ग्निं मि॒त्रं वरु॑णं सा॒तये॒ भगं॒ द्यावा॑पृथि॒वी म॒रुत॑: स्व॒स्तये॑ ॥९॥
bhare॒ṣvindraṃ॑ su॒havaṃ॑ havāmaheṃ’ho॒mucaṃ॑ su॒kṛtaṃ॒ daivyaṃ॒ jana॑m | a॒gniṃ mi॒traṃ varu॑ṇaṃ sā॒taye॒ bhagaṃ॒ dyāvā॑pṛthi॒vī ma॒ruta॑: sva॒staye॑ || ९ ||
सु॒त्रामा॑णं पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम् ।
दैवीं॒ नावं॑ स्वरि॒त्रामना॑गस॒मस्र॑वन्ती॒मा रु॑हेमा स्व॒स्तये॑ ॥१०॥
su॒trāmā॑ṇaṃ pṛthi॒vīṃ dyāma॑ne॒hasaṃ॑ su॒śarmā॑ṇa॒madi॑tiṃ su॒praṇī॑tim | daivīṃ॒ nāvaṃ॑ svari॒trāmanā॑gasa॒masra॑vantī॒mā ru॑hemā sva॒staye॑ || १० ||
विश्वे॑ यजत्रा॒ अधि॑ वोचतो॒तये॒ त्राय॑ध्वं नो दु॒रेवा॑या अभि॒ह्रुत॑: ।
स॒त्यया॑ वो दे॒वहू॑त्या हुवेम शृण्व॒तो दे॑वा॒ अव॑से स्व॒स्तये॑ ॥११॥
viśve॑ yajatrā॒ adhi॑ vocato॒taye॒ trāya॑dhvaṃ no du॒revā॑yā abhi॒hruta॑: | sa॒tyayā॑ vo de॒vahū॑tyā huvema śṛṇva॒to de॑vā॒ ava॑se sva॒staye॑ || ११ ||
अपामी॑वा॒मप॒ विश्वा॒मना॑हुति॒मपारा॑तिं दुर्वि॒दत्रा॑मघाय॒तः ।
आ॒रे दे॑वा॒ द्वेषो॑ अ॒स्मद्यु॑योतनो॒रु ण॒: शर्म॑ यच्छता स्व॒स्तये॑ ॥१२॥
apāmī॑vā॒mapa॒ viśvā॒manā॑huti॒mapārā॑tiṃ durvi॒datrā॑maghāya॒taḥ | ā॒re de॑vā॒ dveṣo॑ a॒smadyu॑yotano॒ru ṇa॒: śarma॑ yacchatā sva॒staye॑ || १२ ||
अरि॑ष्ट॒: स मर्तो॒ विश्व॑ एधते॒ प्र प्र॒जाभि॑र्जायते॒ धर्म॑ण॒स्परि॑ ।
यमा॑दित्यासो॒ नय॑था सुनी॒तिभि॒रति॒ विश्वा॑नि दुरि॒ता स्व॒स्तये॑ ॥१३॥
ari॑ṣṭa॒: sa marto॒ viśva॑ edhate॒ pra pra॒jābhi॑rjāyate॒ dharma॑ṇa॒spari॑ | yamā॑dityāso॒ naya॑thā sunī॒tibhi॒rati॒ viśvā॑ni duri॒tā sva॒staye॑ || १३ ||
यं दे॑वा॒सोऽव॑थ॒ वाज॑सातौ॒ यं शूर॑साता मरुतो हि॒ते धने॑ ।
प्रा॒त॒र्यावा॑णं॒ रथ॑मिन्द्र सान॒सिमरि॑ष्यन्त॒मा रु॑हेमा स्व॒स्तये॑ ॥१४॥
yaṃ de॑vā॒so’va॑tha॒ vāja॑sātau॒ yaṃ śūra॑sātā maruto hi॒te dhane॑ | prā॒ta॒ryāvā॑ṇaṃ॒ ratha॑mindra sāna॒simari॑ṣyanta॒mā ru॑hemā sva॒staye॑ || १४ ||
स्व॒स्ति न॑: प॒थ्या॑सु॒ धन्व॑सु स्व॒स्त्य१प्सु वृ॒जने॒ स्व॑र्वति ।
स्व॒स्ति न॑: पुत्रकृ॒थेषु॒ योनि॑षु स्व॒स्ति रा॒ये म॑रुतो दधातन ॥१५॥
sva॒sti na॑: pa॒thyā॑su॒ dhanva॑su sva॒stya१psu vṛ॒jane॒ sva॑rvati | sva॒sti na॑: putrakṛ॒theṣu॒ yoni॑ṣu sva॒sti rā॒ye ma॑ruto dadhātana || १५ ||
स्व॒स्तिरिद्धि प्रप॑थे॒ श्रेष्ठा॒ रेक्ण॑स्वत्य॒भि या वा॒ममेति॑ ।
सा नो॑ अ॒मा सो अर॑णे॒ नि पा॑तु स्वावे॒शा भ॑वतु दे॒वगो॑पा ॥१६॥
sva॒stiriddhi prapa॑the॒ śreṣṭhā॒ rekṇa॑svatya॒bhi yā vā॒mameti॑ | sā no॑ a॒mā so ara॑ṇe॒ ni pā॑tu svāve॒śā bha॑vatu de॒vago॑pā || १६ ||
ए॒वा प्ल॒तेः सू॒नुर॑वीवृधद्वो॒ विश्व॑ आदित्या अदिते मनी॒षी ।
ई॒शा॒नासो॒ नरो॒ अम॑र्त्ये॒नाऽस्ता॑वि॒ जनो॑ दि॒व्यो गये॑न ॥१७॥
e॒vā pla॒teḥ sū॒nura॑vīvṛdhadvo॒ viśva॑ ādityā adite manī॒ṣī | ī॒śā॒nāso॒ naro॒ ama॑rtye॒nā’stā॑vi॒ jano॑ di॒vyo gaye॑na || १७ ||