EeseDharmaSanātana Library
894मण्डल 10 · सूक्त 57
6 shlokमा प्र गा॑म प॒थो व॒यं मा य॒ज्ञादि॑न्द्र सो॒मिन॑: । मान्त स्थु॑र्नो॒ अरा॑तयः ॥१॥
mā pra gā॑ma pa॒tho va॒yaṃ mā ya॒jñādi॑ndra so॒mina॑: | mānta sthu॑rno॒ arā॑tayaḥ || १ ||
यो य॒ज्ञस्य॑ प्र॒साध॑न॒स्तन्तु॑र्दे॒वेष्वात॑तः । तमाहु॑तं नशीमहि ॥२॥
yo ya॒jñasya॑ pra॒sādha॑na॒stantu॑rde॒veṣvāta॑taḥ | tamāhu॑taṃ naśīmahi || २ ||
मनो॒ न्वा हु॑वामहे नाराशं॒सेन॒ सोमे॑न । पि॒तॄ॒णां च॒ मन्म॑भिः ॥३॥
mano॒ nvā hu॑vāmahe nārāśaṃ॒sena॒ some॑na | pi॒tṝ॒ṇāṃ ca॒ manma॑bhiḥ || ३ ||
आ त॑ एतु॒ मन॒: पुन॒: क्रत्वे॒ दक्षा॑य जी॒वसे॑ । ज्योक्च॒ सूर्यं॑ दृ॒शे ॥४॥
ā ta॑ etu॒ mana॒: puna॒: kratve॒ dakṣā॑ya jī॒vase॑ | jyokca॒ sūryaṃ॑ dṛ॒śe || ४ ||
पुन॑र्नः पितरो॒ मनो॒ ददा॑तु॒ दैव्यो॒ जन॑: । जी॒वं व्रातं॑ सचेमहि ॥५॥
puna॑rnaḥ pitaro॒ mano॒ dadā॑tu॒ daivyo॒ jana॑: | jī॒vaṃ vrātaṃ॑ sacemahi || ५ ||
व॒यं सो॑म व्र॒ते तव॒ मन॑स्त॒नूषु॒ बिभ्र॑तः । प्र॒जाव॑न्तः सचेमहि ॥६॥
va॒yaṃ so॑ma vra॒te tava॒ mana॑sta॒nūṣu॒ bibhra॑taḥ | pra॒jāva॑ntaḥ sacemahi || ६ ||