EeseDharmaSanātana Library
893मण्डल 10 · सूक्त 56
7 shlokइ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
सं॒वेश॑ने त॒न्व१श्चारु॑रेधि प्रि॒यो दे॒वानां॑ पर॒मे ज॒नित्रे॑ ॥१॥
i॒daṃ ta॒ ekaṃ॑ pa॒ra ū॑ ta॒ ekaṃ॑ tṛ॒tīye॑na॒ jyoti॑ṣā॒ saṃ vi॑śasva | saṃ॒veśa॑ne ta॒nva१ścāru॑redhi pri॒yo de॒vānāṃ॑ para॒me ja॒nitre॑ || १ ||
त॒नूष्टे॑ वाजिन्त॒न्वं१ नय॑न्ती वा॒मम॒स्मभ्यं॒ धातु॒ शर्म॒ तुभ्य॑म् ।
अह्रु॑तो म॒हो ध॒रुणा॑य दे॒वान्दि॒वी॑व॒ ज्योति॒: स्वमा मि॑मीयाः ॥२॥
ta॒nūṣṭe॑ vājinta॒nvaṃ१ naya॑ntī vā॒mama॒smabhyaṃ॒ dhātu॒ śarma॒ tubhya॑m | ahru॑to ma॒ho dha॒ruṇā॑ya de॒vāndi॒vī॑va॒ jyoti॒: svamā mi॑mīyāḥ || २ ||
वा॒ज्य॑सि॒ वाजि॑नेना सुवे॒नीः सु॑वि॒तः स्तोमं॑ सुवि॒तो दिवं॑ गाः ।
सु॒वि॒तो धर्म॑ प्रथ॒मानु॑ स॒त्या सु॑वि॒तो दे॒वान्त्सु॑वि॒तोऽनु॒ पत्म॑ ॥३॥
vā॒jya॑si॒ vāji॑nenā suve॒nīḥ su॑vi॒taḥ stomaṃ॑ suvi॒to divaṃ॑ gāḥ | su॒vi॒to dharma॑ pratha॒mānu॑ sa॒tyā su॑vi॒to de॒vāntsu॑vi॒to’nu॒ patma॑ || ३ ||
म॒हि॒म्न ए॑षां पि॒तर॑श्च॒नेशि॑रे दे॒वा दे॒वेष्व॑दधु॒रपि॒ क्रतु॑म् ।
सम॑विव्यचुरु॒त यान्यत्वि॑षु॒रैषां॑ त॒नूषु॒ नि वि॑विशु॒: पुन॑: ॥४॥
ma॒hi॒mna e॑ṣāṃ pi॒tara॑śca॒neśi॑re de॒vā de॒veṣva॑dadhu॒rapi॒ kratu॑m | sama॑vivyacuru॒ta yānyatvi॑ṣu॒raiṣāṃ॑ ta॒nūṣu॒ ni vi॑viśu॒: puna॑: || ४ ||
सहो॑भि॒र्विश्वं॒ परि॑ चक्रमू॒ रज॒: पूर्वा॒ धामा॒न्यमि॑ता॒ मिमा॑नाः ।
त॒नूषु॒ विश्वा॒ भुव॑ना॒ नि ये॑मिरे॒ प्रासा॑रयन्त पुरु॒ध प्र॒जा अनु॑ ॥५॥
saho॑bhi॒rviśvaṃ॒ pari॑ cakramū॒ raja॒: pūrvā॒ dhāmā॒nyami॑tā॒ mimā॑nāḥ | ta॒nūṣu॒ viśvā॒ bhuva॑nā॒ ni ye॑mire॒ prāsā॑rayanta puru॒dha pra॒jā anu॑ || ५ ||
द्विधा॑ सू॒नवोऽसु॑रं स्व॒र्विद॒मास्था॑पयन्त तृ॒तीये॑न॒ कर्म॑णा ।
स्वां प्र॒जां पि॒तर॒: पित्र्यं॒ सह॒ आव॑रेष्वदधु॒स्तन्तु॒मात॑तम् ॥६॥
dvidhā॑ sū॒navo’su॑raṃ sva॒rvida॒māsthā॑payanta tṛ॒tīye॑na॒ karma॑ṇā | svāṃ pra॒jāṃ pi॒tara॒: pitryaṃ॒ saha॒ āva॑reṣvadadhu॒stantu॒māta॑tam || ६ ||
ना॒वा न क्षोद॑: प्र॒दिश॑: पृथि॒व्याः स्व॒स्तिभि॒रति॑ दु॒र्गाणि॒ विश्वा॑ ।
स्वां प्र॒जां बृ॒हदु॑क्थो महि॒त्वाऽऽव॑रेष्वदधा॒दा परे॑षु ॥७॥
nā॒vā na kṣoda॑: pra॒diśa॑: pṛthi॒vyāḥ sva॒stibhi॒rati॑ du॒rgāṇi॒ viśvā॑ | svāṃ pra॒jāṃ bṛ॒hadu॑ktho mahi॒tvā’’va॑reṣvadadhā॒dā pare॑ṣu || ७ ||