EeseDharmaSanātana Library
892मण्डल 10 · सूक्त 55
8 shlokदू॒रे तन्नाम॒ गुह्यं॑ परा॒चैर्यत्त्वा॑ भी॒ते अह्व॑येतां वयो॒धै ।
उद॑स्तभ्नाः पृथि॒वीं द्याम॒भीके॒ भ्रातु॑: पु॒त्रान्म॑घवन्तित्विषा॒णः ॥१॥
dū॒re tannāma॒ guhyaṃ॑ parā॒cairyattvā॑ bhī॒te ahva॑yetāṃ vayo॒dhai | uda॑stabhnāḥ pṛthi॒vīṃ dyāma॒bhīke॒ bhrātu॑: pu॒trānma॑ghavantitviṣā॒ṇaḥ || १ ||
म॒हत्तन्नाम॒ गुह्यं॑ पुरु॒स्पृग्येन॑ भू॒तं ज॒नयो॒ येन॒ भव्य॑म् ।
प्र॒त्नं जा॒तं ज्योति॒र्यद॑स्य प्रि॒यं प्रि॒याः सम॑विशन्त॒ पञ्च॑ ॥२॥
ma॒hattannāma॒ guhyaṃ॑ puru॒spṛgyena॑ bhū॒taṃ ja॒nayo॒ yena॒ bhavya॑m | pra॒tnaṃ jā॒taṃ jyoti॒ryada॑sya pri॒yaṃ pri॒yāḥ sama॑viśanta॒ pañca॑ || २ ||
आ रोद॑सी अपृणा॒दोत मध्यं॒ पञ्च॑ दे॒वाँ ऋ॑तु॒शः स॒प्तस॑प्त ।
चतु॑स्त्रिंशता पुरु॒धा वि च॑ष्टे॒ सरू॑पेण॒ ज्योति॑षा॒ विव्र॑तेन ॥३॥
ā roda॑sī apṛṇā॒dota madhyaṃ॒ pañca॑ de॒vām̐ ṛ॑tu॒śaḥ sa॒ptasa॑pta | catu॑striṃśatā puru॒dhā vi ca॑ṣṭe॒ sarū॑peṇa॒ jyoti॑ṣā॒ vivra॑tena || ३ ||
यदु॑ष॒ औच्छ॑: प्रथ॒मा वि॒भाना॒मज॑नयो॒ येन॑ पु॒ष्टस्य॑ पु॒ष्टम् ।
यत्ते॑ जामि॒त्वमव॑रं॒ पर॑स्या म॒हन्म॑ह॒त्या अ॑सुर॒त्वमेक॑म् ॥४॥
yadu॑ṣa॒ auccha॑: pratha॒mā vi॒bhānā॒maja॑nayo॒ yena॑ pu॒ṣṭasya॑ pu॒ṣṭam | yatte॑ jāmi॒tvamava॑raṃ॒ para॑syā ma॒hanma॑ha॒tyā a॑sura॒tvameka॑m || ४ ||
वि॒धुं द॑द्रा॒णं सम॑ने बहू॒नां युवा॑नं॒ सन्तं॑ पलि॒तो ज॑गार ।
दे॒वस्य॑ पश्य॒ काव्यं॑ महि॒त्वाऽद्या म॒मार॒ स ह्यः समा॑न ॥५॥
vi॒dhuṃ da॑drā॒ṇaṃ sama॑ne bahū॒nāṃ yuvā॑naṃ॒ santaṃ॑ pali॒to ja॑gāra | de॒vasya॑ paśya॒ kāvyaṃ॑ mahi॒tvā’dyā ma॒māra॒ sa hyaḥ samā॑na || ५ ||
शाक्म॑ना शा॒को अ॑रु॒णः सु॑प॒र्ण आ यो म॒हः शूर॑: स॒नादनी॑ळः ।
यच्चि॒केत॑ स॒त्यमित्तन्न मोघं॒ वसु॑ स्पा॒र्हमु॒त जेतो॒त दाता॑ ॥६॥
śākma॑nā śā॒ko a॑ru॒ṇaḥ su॑pa॒rṇa ā yo ma॒haḥ śūra॑: sa॒nādanī॑ḷaḥ | yacci॒keta॑ sa॒tyamittanna moghaṃ॒ vasu॑ spā॒rhamu॒ta jeto॒ta dātā॑ || ६ ||
ऐभि॑र्ददे॒ वृष्ण्या॒ पौंस्या॑नि॒ येभि॒रौक्ष॑द्वृत्र॒हत्या॑य व॒ज्री ।
ये कर्म॑णः क्रि॒यमा॑णस्य म॒ह्न ऋ॑तेक॒र्ममु॒दजा॑यन्त दे॒वाः ॥७॥
aibhi॑rdade॒ vṛṣṇyā॒ pauṃsyā॑ni॒ yebhi॒raukṣa॑dvṛtra॒hatyā॑ya va॒jrī | ye karma॑ṇaḥ kri॒yamā॑ṇasya ma॒hna ṛ॑teka॒rmamu॒dajā॑yanta de॒vāḥ || ७ ||
यु॒जा कर्मा॑णि ज॒नय॑न्वि॒श्वौजा॑ अशस्ति॒हा वि॒श्वम॑नास्तुरा॒षाट् ।
पी॒त्वी सोम॑स्य दि॒व आ वृ॑धा॒नः शूरो॒ निर्यु॒धाध॑म॒द्दस्यू॑न् ॥८॥
yu॒jā karmā॑ṇi ja॒naya॑nvi॒śvaujā॑ aśasti॒hā vi॒śvama॑nāsturā॒ṣāṭ | pī॒tvī soma॑sya di॒va ā vṛ॑dhā॒naḥ śūro॒ niryu॒dhādha॑ma॒ddasyū॑n || ८ ||