EeseDharmaSanātana Library
842मण्डल 10 · सूक्त 5
7 shlokएक॑: समु॒द्रो ध॒रुणो॑ रयी॒णाम॒स्मद्धृ॒दो भूरि॑जन्मा॒ वि च॑ष्टे ।
सिष॒क्त्यूध॑र्नि॒ण्योरु॒पस्थ॒ उत्स॑स्य॒ मध्ये॒ निहि॑तं प॒दं वेः ॥१॥
eka॑: samu॒dro dha॒ruṇo॑ rayī॒ṇāma॒smaddhṛ॒do bhūri॑janmā॒ vi ca॑ṣṭe | siṣa॒ktyūdha॑rni॒ṇyoru॒pastha॒ utsa॑sya॒ madhye॒ nihi॑taṃ pa॒daṃ veḥ || १ ||
स॒मा॒नं नी॒ळं वृष॑णो॒ वसा॑ना॒: सं ज॑ग्मिरे महि॒षा अर्व॑तीभिः ।
ऋ॒तस्य॑ प॒दं क॒वयो॒ नि पा॑न्ति॒ गुहा॒ नामा॑नि दधिरे॒ परा॑णि ॥२॥
sa॒mā॒naṃ nī॒ḷaṃ vṛṣa॑ṇo॒ vasā॑nā॒: saṃ ja॑gmire mahi॒ṣā arva॑tībhiḥ | ṛ॒tasya॑ pa॒daṃ ka॒vayo॒ ni pā॑nti॒ guhā॒ nāmā॑ni dadhire॒ parā॑ṇi || २ ||
ऋ॒ता॒यिनी॑ मा॒यिनी॒ सं द॑धाते मि॒त्वा शिशुं॑ जज्ञतुर्व॒र्धय॑न्ती ।
विश्व॑स्य॒ नाभिं॒ चर॑तो ध्रु॒वस्य॑ क॒वेश्चि॒त्तन्तुं॒ मन॑सा वि॒यन्त॑: ॥३॥
ṛ॒tā॒yinī॑ mā॒yinī॒ saṃ da॑dhāte mi॒tvā śiśuṃ॑ jajñaturva॒rdhaya॑ntī | viśva॑sya॒ nābhiṃ॒ cara॑to dhru॒vasya॑ ka॒veści॒ttantuṃ॒ mana॑sā vi॒yanta॑: || ३ ||
ऋ॒तस्य॒ हि व॑र्त॒नय॒: सुजा॑त॒मिषो॒ वाजा॑य प्र॒दिव॒: सच॑न्ते ।
अ॒धी॒वा॒सं रोद॑सी वावसा॒ने घृ॒तैरन्नै॑र्वावृधाते॒ मधू॑नाम् ॥४॥
ṛ॒tasya॒ hi va॑rta॒naya॒: sujā॑ta॒miṣo॒ vājā॑ya pra॒diva॒: saca॑nte | a॒dhī॒vā॒saṃ roda॑sī vāvasā॒ne ghṛ॒tairannai॑rvāvṛdhāte॒ madhū॑nām || ४ ||
स॒प्त स्वसॄ॒ररु॑षीर्वावशा॒नो वि॒द्वान्मध्व॒ उज्ज॑भारा दृ॒शे कम् ।
अ॒न्तर्ये॑मे अ॒न्तरि॑क्षे पुरा॒जा इ॒च्छन्व॒व्रिम॑विदत्पूष॒णस्य॑ ॥५॥
sa॒pta svasṝ॒raru॑ṣīrvāvaśā॒no vi॒dvānmadhva॒ ujja॑bhārā dṛ॒śe kam | a॒ntarye॑me a॒ntari॑kṣe purā॒jā i॒cchanva॒vrima॑vidatpūṣa॒ṇasya॑ || ५ ||
स॒प्त म॒र्यादा॑: क॒वय॑स्ततक्षु॒स्तासा॒मेका॒मिद॒भ्यं॑हु॒रो गा॑त् ।
आ॒योर्ह॑ स्क॒म्भ उ॑प॒मस्य॑ नी॒ळे प॒थां वि॑स॒र्गे ध॒रुणे॑षु तस्थौ ॥६॥
sa॒pta ma॒ryādā॑: ka॒vaya॑statakṣu॒stāsā॒mekā॒mida॒bhyaṃ॑hu॒ro gā॑t | ā॒yorha॑ ska॒mbha u॑pa॒masya॑ nī॒ḷe pa॒thāṃ vi॑sa॒rge dha॒ruṇe॑ṣu tasthau || ६ ||
अस॑च्च॒ सच्च॑ पर॒मे व्यो॑म॒न्दक्ष॑स्य॒ जन्म॒न्नदि॑तेरु॒पस्थे॑ ।
अ॒ग्निर्ह॑ नः प्रथम॒जा ऋ॒तस्य॒ पूर्व॒ आयु॑नि वृष॒भश्च॑ धे॒नुः ॥७॥
asa॑cca॒ sacca॑ para॒me vyo॑ma॒ndakṣa॑sya॒ janma॒nnadi॑teru॒pasthe॑ | a॒gnirha॑ naḥ prathama॒jā ṛ॒tasya॒ pūrva॒ āyu॑ni vṛṣa॒bhaśca॑ dhe॒nuḥ || ७ ||