EeseDharmaSanātana Library
884मण्डल 10 · सूक्त 47
8 shlokज॒गृ॒भ्मा ते॒ दक्षि॑णमिन्द्र॒ हस्तं॑ वसू॒यवो॑ वसुपते॒ वसू॑नाम् ।
वि॒द्मा हि त्वा॒ गोप॑तिं शूर॒ गोना॑म॒स्मभ्यं॑ चि॒त्रं वृष॑णं र॒यिं दा॑: ॥१॥
ja॒gṛ॒bhmā te॒ dakṣi॑ṇamindra॒ hastaṃ॑ vasū॒yavo॑ vasupate॒ vasū॑nām | vi॒dmā hi tvā॒ gopa॑tiṃ śūra॒ gonā॑ma॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || १ ||
स्वा॒यु॒धं स्वव॑सं सुनी॒थं चतु॑:समुद्रं ध॒रुणं॑ रयी॒णाम् ।
च॒र्कृत्यं॒ शंस्यं॒ भूरि॑वारम॒स्मभ्यं॑ चि॒त्रं वृष॑णं र॒यिं दा॑: ॥२॥
svā॒yu॒dhaṃ svava॑saṃ sunī॒thaṃ catu॑:samudraṃ dha॒ruṇaṃ॑ rayī॒ṇām | ca॒rkṛtyaṃ॒ śaṃsyaṃ॒ bhūri॑vārama॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || २ ||
सु॒ब्रह्मा॑णं दे॒वव॑न्तं बृ॒हन्त॑मु॒रुं ग॑भी॒रं पृ॒थुबु॑ध्नमिन्द्र ।
श्रु॒तऋ॑षिमु॒ग्रम॑भिमाति॒षाह॑म॒स्मभ्यं॑ चि॒त्रं वृष॑णं र॒यिं दा॑: ॥३॥
su॒brahmā॑ṇaṃ de॒vava॑ntaṃ bṛ॒hanta॑mu॒ruṃ ga॑bhī॒raṃ pṛ॒thubu॑dhnamindra | śru॒taṛ॑ṣimu॒grama॑bhimāti॒ṣāha॑ma॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ३ ||
स॒नद्वा॑जं॒ विप्र॑वीरं॒ तरु॑त्रं धन॒स्पृतं॑ शूशु॒वांसं॑ सु॒दक्ष॑म् ।
द॒स्यु॒हनं॑ पू॒र्भिद॑मिन्द्र स॒त्यम॒स्मभ्यं॑ चि॒त्रं वृष॑णं र॒यिं दा॑: ॥४॥
sa॒nadvā॑jaṃ॒ vipra॑vīraṃ॒ taru॑traṃ dhana॒spṛtaṃ॑ śūśu॒vāṃsaṃ॑ su॒dakṣa॑m | da॒syu॒hanaṃ॑ pū॒rbhida॑mindra sa॒tyama॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ४ ||
अश्वा॑वन्तं र॒थिनं॑ वी॒रव॑न्तं सह॒स्रिणं॑ श॒तिनं॒ वाज॑मिन्द्र ।
भ॒द्रव्रा॑तं॒ विप्र॑वीरं स्व॒र्षाम॒स्मभ्यं॑ चि॒त्रं वृष॑णं र॒यिं दा॑: ॥५॥
aśvā॑vantaṃ ra॒thinaṃ॑ vī॒rava॑ntaṃ saha॒sriṇaṃ॑ śa॒tinaṃ॒ vāja॑mindra | bha॒dravrā॑taṃ॒ vipra॑vīraṃ sva॒rṣāma॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ५ ||
प्र स॒प्तगु॑मृ॒तधी॑तिं सुमे॒धां बृह॒स्पतिं॑ म॒तिरच्छा॑ जिगाति ।
य आ॑ङ्गिर॒सो नम॑सोप॒सद्यो॒ऽस्मभ्यं॑ चि॒त्रं वृष॑णं र॒यिं दा॑: ॥६॥
pra sa॒ptagu॑mṛ॒tadhī॑tiṃ sume॒dhāṃ bṛha॒spatiṃ॑ ma॒tiracchā॑ jigāti | ya ā॑ṅgira॒so nama॑sopa॒sadyo॒’smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ६ ||
वनी॑वानो॒ मम॑ दू॒तास॒ इन्द्रं॒ स्तोमा॑श्चरन्ति सुम॒तीरि॑या॒नाः ।
हृ॒दि॒स्पृशो॒ मन॑सा व॒च्यमा॑ना अ॒स्मभ्यं॑ चि॒त्रं वृष॑णं र॒यिं दा॑: ॥७॥
vanī॑vāno॒ mama॑ dū॒tāsa॒ indraṃ॒ stomā॑ścaranti suma॒tīri॑yā॒nāḥ | hṛ॒di॒spṛśo॒ mana॑sā va॒cyamā॑nā a॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ७ ||
यत्त्वा॒ यामि॑ द॒द्धि तन्न॑ इन्द्र बृ॒हन्तं॒ क्षय॒मस॑मं॒ जना॑नाम् ।
अ॒भि तद्द्यावा॑पृथि॒वी गृ॑णीताम॒स्मभ्यं॑ चि॒त्रं वृष॑णं र॒यिं दा॑: ॥८॥
yattvā॒ yāmi॑ da॒ddhi tanna॑ indra bṛ॒hantaṃ॒ kṣaya॒masa॑maṃ॒ janā॑nām | a॒bhi taddyāvā॑pṛthi॒vī gṛ॑ṇītāma॒smabhyaṃ॑ ci॒traṃ vṛṣa॑ṇaṃ ra॒yiṃ dā॑: || ८ ||