EeseDharmaSanātana Library
869मण्डल 10 · सूक्त 32
9 shlokप्र सु ग्मन्ता॑ धियसा॒नस्य॑ स॒क्षणि॑ व॒रेभि॑र्व॒राँ अ॒भि षु प्र॒सीद॑तः ।
अ॒स्माक॒मिन्द्र॑ उ॒भयं॑ जुजोषति॒ यत्सो॒म्यस्यान्ध॑सो॒ बुबो॑धति ॥१॥
pra su gmantā॑ dhiyasā॒nasya॑ sa॒kṣaṇi॑ va॒rebhi॑rva॒rām̐ a॒bhi ṣu pra॒sīda॑taḥ | a॒smāka॒mindra॑ u॒bhayaṃ॑ jujoṣati॒ yatso॒myasyāndha॑so॒ bubo॑dhati || १ ||
वी॑न्द्र यासि दि॒व्यानि॑ रोच॒ना वि पार्थि॑वानि॒ रज॑सा पुरुष्टुत ।
ये त्वा॒ वह॑न्ति॒ मुहु॑रध्व॒राँ उप॒ ते सु व॑न्वन्तु वग्व॒नाँ अ॑रा॒धस॑: ॥२॥
vī॑ndra yāsi di॒vyāni॑ roca॒nā vi pārthi॑vāni॒ raja॑sā puruṣṭuta | ye tvā॒ vaha॑nti॒ muhu॑radhva॒rām̐ upa॒ te su va॑nvantu vagva॒nām̐ a॑rā॒dhasa॑: || २ ||
तदिन्मे॑ छन्त्स॒द्वपु॑षो॒ वपु॑ष्टरं पु॒त्रो यज्जानं॑ पि॒त्रोर॒धीय॑ति ।
जा॒या पतिं॑ वहति व॒ग्नुना॑ सु॒मत्पुं॒स इद्भ॒द्रो व॑ह॒तुः परि॑ष्कृतः ॥३॥
tadinme॑ chantsa॒dvapu॑ṣo॒ vapu॑ṣṭaraṃ pu॒tro yajjānaṃ॑ pi॒trora॒dhīya॑ti | jā॒yā patiṃ॑ vahati va॒gnunā॑ su॒matpuṃ॒sa idbha॒dro va॑ha॒tuḥ pari॑ṣkṛtaḥ || ३ ||
तदित्स॒धस्थ॑म॒भि चारु॑ दीधय॒ गावो॒ यच्छास॑न्वह॒तुं न धे॒नव॑: ।
मा॒ता यन्मन्तु॑र्यू॒थस्य॑ पू॒र्व्याऽभि वा॒णस्य॑ स॒प्तधा॑तु॒रिज्जन॑: ॥४॥
taditsa॒dhastha॑ma॒bhi cāru॑ dīdhaya॒ gāvo॒ yacchāsa॑nvaha॒tuṃ na dhe॒nava॑: | mā॒tā yanmantu॑ryū॒thasya॑ pū॒rvyā’bhi vā॒ṇasya॑ sa॒ptadhā॑tu॒rijjana॑: || ४ ||
प्र वोऽच्छा॑ रिरिचे देव॒युष्प॒दमेको॑ रु॒द्रेभि॑र्याति तु॒र्वणि॑: ।
ज॒रा वा॒ येष्व॒मृते॑षु दा॒वने॒ परि॑ व॒ ऊमे॑भ्यः सिञ्चता॒ मधु॑ ॥५॥
pra vo’cchā॑ ririce deva॒yuṣpa॒dameko॑ ru॒drebhi॑ryāti tu॒rvaṇi॑: | ja॒rā vā॒ yeṣva॒mṛte॑ṣu dā॒vane॒ pari॑ va॒ ūme॑bhyaḥ siñcatā॒ madhu॑ || ५ ||
नि॒धी॒यमा॑न॒मप॑गूळ्हम॒प्सु प्र मे॑ दे॒वानां॑ व्रत॒पा उ॑वाच ।
इन्द्रो॑ वि॒द्वाँ अनु॒ हि त्वा॑ च॒चक्ष॒ तेना॒हम॑ग्ने॒ अनु॑शिष्ट॒ आगा॑म् ॥६॥
ni॒dhī॒yamā॑na॒mapa॑gūḷhama॒psu pra me॑ de॒vānāṃ॑ vrata॒pā u॑vāca | indro॑ vi॒dvām̐ anu॒ hi tvā॑ ca॒cakṣa॒ tenā॒hama॑gne॒ anu॑śiṣṭa॒ āgā॑m || ६ ||
अक्षे॑त्रवित्क्षेत्र॒विदं॒ ह्यप्रा॒ट् स प्रैति॑ क्षेत्र॒विदानु॑शिष्टः ।
ए॒तद्वै भ॒द्रम॑नु॒शास॑नस्यो॒त स्रु॒तिं वि॑न्दत्यञ्ज॒सीना॑म् ॥७॥
akṣe॑travitkṣetra॒vidaṃ॒ hyaprā॒ṭ sa praiti॑ kṣetra॒vidānu॑śiṣṭaḥ | e॒tadvai bha॒drama॑nu॒śāsa॑nasyo॒ta sru॒tiṃ vi॑ndatyañja॒sīnā॑m || ७ ||
अ॒द्येदु॒ प्राणी॒दम॑मन्नि॒माहाऽपी॑वृतो अधयन्मा॒तुरूध॑: ।
एमे॑नमाप जरि॒मा युवा॑न॒महे॑ळ॒न्वसु॑: सु॒मना॑ बभूव ॥८॥
a॒dyedu॒ prāṇī॒dama॑manni॒māhā’pī॑vṛto adhayanmā॒turūdha॑: | eme॑namāpa jari॒mā yuvā॑na॒mahe॑ḷa॒nvasu॑: su॒manā॑ babhūva || ८ ||
ए॒तानि॑ भ॒द्रा क॑लश क्रियाम॒ कुरु॑श्रवण॒ दद॑तो म॒घानि॑ ।
दा॒न इद्वो॑ मघवान॒: सो अ॑स्त्व॒यं च॒ सोमो॑ हृ॒दि यं बिभ॑र्मि ॥९॥
e॒tāni॑ bha॒drā ka॑laśa kriyāma॒ kuru॑śravaṇa॒ dada॑to ma॒ghāni॑ | dā॒na idvo॑ maghavāna॒: so a॑stva॒yaṃ ca॒ somo॑ hṛ॒di yaṃ bibha॑rmi || ९ ||