EeseDharmaSanātana Library
867मण्डल 10 · सूक्त 30
15 shlokप्र दे॑व॒त्रा ब्रह्म॑णे गा॒तुरे॑त्व॒पो अच्छा॒ मन॑सो॒ न प्रयु॑क्ति ।
म॒हीं मि॒त्रस्य॒ वरु॑णस्य धा॒सिं पृ॑थु॒ज्रय॑से रीरधा सुवृ॒क्तिम् ॥१॥
pra de॑va॒trā brahma॑ṇe gā॒ture॑tva॒po acchā॒ mana॑so॒ na prayu॑kti | ma॒hīṃ mi॒trasya॒ varu॑ṇasya dhā॒siṃ pṛ॑thu॒jraya॑se rīradhā suvṛ॒ktim || १ ||
अध्व॑र्यवो ह॒विष्म॑न्तो॒ हि भू॒ताऽच्छा॒प इ॑तोश॒तीरु॑शन्तः ।
अव॒ याश्चष्टे॑ अरु॒णः सु॑प॒र्णस्तमास्य॑ध्वमू॒र्मिम॒द्या सु॑हस्ताः ॥२॥
adhva॑ryavo ha॒viṣma॑nto॒ hi bhū॒tā’cchā॒pa i॑tośa॒tīru॑śantaḥ | ava॒ yāścaṣṭe॑ aru॒ṇaḥ su॑pa॒rṇastamāsya॑dhvamū॒rmima॒dyā su॑hastāḥ || २ ||
अध्व॑र्यवो॒ऽप इ॑ता समु॒द्रम॒पां नपा॑तं ह॒विषा॑ यजध्वम् ।
स वो॑ दददू॒र्मिम॒द्या सुपू॑तं॒ तस्मै॒ सोमं॒ मधु॑मन्तं सुनोत ॥३॥
adhva॑ryavo॒’pa i॑tā samu॒drama॒pāṃ napā॑taṃ ha॒viṣā॑ yajadhvam | sa vo॑ dadadū॒rmima॒dyā supū॑taṃ॒ tasmai॒ somaṃ॒ madhu॑mantaṃ sunota || ३ ||
यो अ॑नि॒ध्मो दीद॑यद॒प्स्व१न्तर्यं विप्रा॑स॒ ईळ॑ते अध्व॒रेषु॑ ।
अपां॑ नपा॒न्मधु॑मतीर॒पो दा॒ याभि॒रिन्द्रो॑ वावृ॒धे वी॒र्या॑य ॥४॥
yo a॑ni॒dhmo dīda॑yada॒psva१ntaryaṃ viprā॑sa॒ īḷa॑te adhva॒reṣu॑ | apāṃ॑ napā॒nmadhu॑matīra॒po dā॒ yābhi॒rindro॑ vāvṛ॒dhe vī॒ryā॑ya || ४ ||
याभि॒: सोमो॒ मोद॑ते॒ हर्ष॑ते च कल्या॒णीभि॑र्युव॒तिभि॒र्न मर्य॑: ।
ता अ॑ध्वर्यो अ॒पो अच्छा॒ परे॑हि॒ यदा॑सि॒ञ्चा ओष॑धीभिः पुनीतात् ॥५॥
yābhi॒: somo॒ moda॑te॒ harṣa॑te ca kalyā॒ṇībhi॑ryuva॒tibhi॒rna marya॑: | tā a॑dhvaryo a॒po acchā॒ pare॑hi॒ yadā॑si॒ñcā oṣa॑dhībhiḥ punītāt || ५ ||
ए॒वेद्यूने॑ युव॒तयो॑ नमन्त॒ यदी॑मु॒शन्नु॑श॒तीरेत्यच्छ॑ ।
सं जा॑नते॒ मन॑सा॒ सं चि॑कित्रेऽध्व॒र्यवो॑ धि॒षणाप॑श्च दे॒वीः ॥६॥
e॒vedyūne॑ yuva॒tayo॑ namanta॒ yadī॑mu॒śannu॑śa॒tīretyaccha॑ | saṃ jā॑nate॒ mana॑sā॒ saṃ ci॑kitre’dhva॒ryavo॑ dhi॒ṣaṇāpa॑śca de॒vīḥ || ६ ||
यो वो॑ वृ॒ताभ्यो॒ अकृ॑णोदु लो॒कं यो वो॑ म॒ह्या अ॒भिश॑स्ते॒रमु॑ञ्चत् ।
तस्मा॒ इन्द्रा॑य॒ मधु॑मन्तमू॒र्मिं दे॑व॒माद॑नं॒ प्र हि॑णोतनापः ॥७॥
yo vo॑ vṛ॒tābhyo॒ akṛ॑ṇodu lo॒kaṃ yo vo॑ ma॒hyā a॒bhiśa॑ste॒ramu॑ñcat | tasmā॒ indrā॑ya॒ madhu॑mantamū॒rmiṃ de॑va॒māda॑naṃ॒ pra hi॑ṇotanāpaḥ || ७ ||
प्रास्मै॑ हिनोत॒ मधु॑मन्तमू॒र्मिं गर्भो॒ यो व॑: सिन्धवो॒ मध्व॒ उत्स॑: ।
घृ॒तपृ॑ष्ठ॒मीड्य॑मध्व॒रेष्वाऽऽपो॑ रेवतीः शृणु॒ता हवं॑ मे ॥८॥
prāsmai॑ hinota॒ madhu॑mantamū॒rmiṃ garbho॒ yo va॑: sindhavo॒ madhva॒ utsa॑: | ghṛ॒tapṛ॑ṣṭha॒mīḍya॑madhva॒reṣvā’’po॑ revatīḥ śṛṇu॒tā havaṃ॑ me || ८ ||
तं सि॑न्धवो मत्स॒रमि॑न्द्र॒पान॑मू॒र्मिं प्र हे॑त॒ य उ॒भे इय॑र्ति ।
म॒द॒च्युत॑मौशा॒नं न॑भो॒जां परि॑ त्रि॒तन्तुं॑ वि॒चर॑न्त॒मुत्स॑म् ॥९॥
taṃ si॑ndhavo matsa॒rami॑ndra॒pāna॑mū॒rmiṃ pra he॑ta॒ ya u॒bhe iya॑rti | ma॒da॒cyuta॑mauśā॒naṃ na॑bho॒jāṃ pari॑ tri॒tantuṃ॑ vi॒cara॑nta॒mutsa॑m || ९ ||
आ॒वर्वृ॑तती॒रध॒ नु द्वि॒धारा॑ गोषु॒युधो॒ न नि॑य॒वं चर॑न्तीः ।
ऋषे॒ जनि॑त्री॒र्भुव॑नस्य॒ पत्नी॑र॒पो व॑न्दस्व स॒वृध॒: सयो॑नीः ॥१०॥
ā॒varvṛ॑tatī॒radha॒ nu dvi॒dhārā॑ goṣu॒yudho॒ na ni॑ya॒vaṃ cara॑ntīḥ | ṛṣe॒ jani॑trī॒rbhuva॑nasya॒ patnī॑ra॒po va॑ndasva sa॒vṛdha॒: sayo॑nīḥ || १० ||
हि॒नोता॑ नो अध्व॒रं दे॑वय॒ज्या हि॒नोत॒ ब्रह्म॑ स॒नये॒ धना॑नाम् ।
ऋ॒तस्य॒ योगे॒ वि ष्य॑ध्व॒मूध॑: श्रुष्टी॒वरी॑र्भूतना॒स्मभ्य॑मापः ॥११॥
hi॒notā॑ no adhva॒raṃ de॑vaya॒jyā hi॒nota॒ brahma॑ sa॒naye॒ dhanā॑nām | ṛ॒tasya॒ yoge॒ vi ṣya॑dhva॒mūdha॑: śruṣṭī॒varī॑rbhūtanā॒smabhya॑māpaḥ || ११ ||
आपो॑ रेवती॒: क्षय॑था॒ हि वस्व॒: क्रतुं॑ च भ॒द्रं बि॑भृ॒थामृतं॑ च ।
रा॒यश्च॒ स्थ स्व॑प॒त्यस्य॒ पत्नी॒: सर॑स्वती॒ तद्गृ॑ण॒ते वयो॑ धात् ॥१२॥
āpo॑ revatī॒: kṣaya॑thā॒ hi vasva॒: kratuṃ॑ ca bha॒draṃ bi॑bhṛ॒thāmṛtaṃ॑ ca | rā॒yaśca॒ stha sva॑pa॒tyasya॒ patnī॒: sara॑svatī॒ tadgṛ॑ṇa॒te vayo॑ dhāt || १२ ||
प्रति॒ यदापो॒ अदृ॑श्रमाय॒तीर्घृ॒तं पयां॑सि॒ बिभ्र॑ती॒र्मधू॑नि ।
अ॒ध्व॒र्युभि॒र्मन॑सा संविदा॒ना इन्द्रा॑य॒ सोमं॒ सुषु॑तं॒ भर॑न्तीः ॥१३॥
prati॒ yadāpo॒ adṛ॑śramāya॒tīrghṛ॒taṃ payāṃ॑si॒ bibhra॑tī॒rmadhū॑ni | a॒dhva॒ryubhi॒rmana॑sā saṃvidā॒nā indrā॑ya॒ somaṃ॒ suṣu॑taṃ॒ bhara॑ntīḥ || १३ ||
एमा अ॑ग्मन्रे॒वती॑र्जी॒वध॑न्या॒ अध्व॑र्यवः सा॒दय॑ता सखायः ।
नि ब॒र्हिषि॑ धत्तन सोम्यासो॒ऽपां नप्त्रा॑ संविदा॒नास॑ एनाः ॥१४॥
emā a॑gmanre॒vatī॑rjī॒vadha॑nyā॒ adhva॑ryavaḥ sā॒daya॑tā sakhāyaḥ | ni ba॒rhiṣi॑ dhattana somyāso॒’pāṃ naptrā॑ saṃvidā॒nāsa॑ enāḥ || १४ ||
आग्म॒न्नाप॑ उश॒तीर्ब॒र्हिरेदं न्य॑ध्व॒रे अ॑सदन्देव॒यन्ती॑: ।
अध्व॑र्यवः सुनु॒तेन्द्रा॑य॒ सोम॒मभू॑दु वः सु॒शका॑ देवय॒ज्या ॥१५॥
āgma॒nnāpa॑ uśa॒tīrba॒rhiredaṃ nya॑dhva॒re a॑sadandeva॒yantī॑: | adhva॑ryavaḥ sunu॒tendrā॑ya॒ soma॒mabhū॑du vaḥ su॒śakā॑ devaya॒jyā || १५ ||