EeseDharmaSanātana Library
863मण्डल 10 · सूक्त 26
9 shlokप्र ह्यच्छा॑ मनी॒षा स्पा॒र्हा यन्ति॑ नि॒युत॑: । प्र द॒स्रा नि॒युद्र॑थः पू॒षा अ॑विष्टु॒ माहि॑नः ॥१॥
pra hyacchā॑ manī॒ṣā spā॒rhā yanti॑ ni॒yuta॑: | pra da॒srā ni॒yudra॑thaḥ pū॒ṣā a॑viṣṭu॒ māhi॑naḥ || १ ||
यस्य॒ त्यन्म॑हि॒त्वं वा॒ताप्य॑म॒यं जन॑: । विप्र॒ आ वं॑सद्धी॒तिभि॒श्चिके॑त सुष्टुती॒नाम् ॥२॥
yasya॒ tyanma॑hi॒tvaṃ vā॒tāpya॑ma॒yaṃ jana॑: | vipra॒ ā vaṃ॑saddhī॒tibhi॒ścike॑ta suṣṭutī॒nām || २ ||
स वे॑द सुष्टुती॒नामिन्दु॒र्न पू॒षा वृषा॑ । अ॒भि प्सुर॑: प्रुषायति व्र॒जं न॒ आ प्रु॑षायति ॥३॥
sa ve॑da suṣṭutī॒nāmindu॒rna pū॒ṣā vṛṣā॑ | a॒bhi psura॑: pruṣāyati vra॒jaṃ na॒ ā pru॑ṣāyati || ३ ||
मं॒सी॒महि॑ त्वा व॒यम॒स्माकं॑ देव पूषन् । म॒ती॒नां च॒ साध॑नं॒ विप्रा॑णां चाध॒वम् ॥४॥
maṃ॒sī॒mahi॑ tvā va॒yama॒smākaṃ॑ deva pūṣan | ma॒tī॒nāṃ ca॒ sādha॑naṃ॒ viprā॑ṇāṃ cādha॒vam || ४ ||
प्रत्य॑र्धिर्य॒ज्ञाना॑मश्वह॒यो रथा॑नाम् । ऋषि॒: स यो मनु॑र्हितो॒ विप्र॑स्य यावयत्स॒खः ॥५॥
pratya॑rdhirya॒jñānā॑maśvaha॒yo rathā॑nām | ṛṣi॒: sa yo manu॑rhito॒ vipra॑sya yāvayatsa॒khaḥ || ५ ||
आ॒धीष॑माणाया॒: पति॑: शु॒चाया॑श्च शु॒चस्य॑ च । वा॒सो॒वा॒योऽवी॑ना॒मा वासां॑सि॒ मर्मृ॑जत् ॥६॥
ā॒dhīṣa॑māṇāyā॒: pati॑: śu॒cāyā॑śca śu॒casya॑ ca | vā॒so॒vā॒yo’vī॑nā॒mā vāsāṃ॑si॒ marmṛ॑jat || ६ ||
इ॒नो वाजा॑नां॒ पति॑रि॒नः पु॑ष्टी॒नां सखा॑ । प्र श्मश्रु॑ हर्य॒तो दू॑धो॒द्वि वृथा॒ यो अदा॑भ्यः ॥७॥
i॒no vājā॑nāṃ॒ pati॑ri॒naḥ pu॑ṣṭī॒nāṃ sakhā॑ | pra śmaśru॑ harya॒to dū॑dho॒dvi vṛthā॒ yo adā॑bhyaḥ || ७ ||
आ ते॒ रथ॑स्य पूषन्न॒जा धुरं॑ ववृत्युः । विश्व॑स्या॒र्थिन॒: सखा॑ सनो॒जा अन॑पच्युतः ॥८॥
ā te॒ ratha॑sya pūṣanna॒jā dhuraṃ॑ vavṛtyuḥ | viśva॑syā॒rthina॒: sakhā॑ sano॒jā ana॑pacyutaḥ || ८ ||
अ॒स्माक॑मू॒र्जा रथं॑ पू॒षा अ॑विष्टु॒ माहि॑नः । भुव॒द्वाजा॑नां वृ॒ध इ॒मं न॑: शृणव॒द्धव॑म् ॥९॥
a॒smāka॑mū॒rjā rathaṃ॑ pū॒ṣā a॑viṣṭu॒ māhi॑naḥ | bhuva॒dvājā॑nāṃ vṛ॒dha i॒maṃ na॑: śṛṇava॒ddhava॑m || ९ ||