EeseDharmaSanātana Library
859मण्डल 10 · सूक्त 22
15 shlokकुह॑ श्रु॒त इन्द्र॒: कस्मि॑न्न॒द्य जने॑ मि॒त्रो न श्रू॑यते । ऋषी॑णां वा॒ यः क्षये॒ गुहा॑ वा॒ चर्कृ॑षे गि॒रा ॥१॥
kuha॑ śru॒ta indra॒: kasmi॑nna॒dya jane॑ mi॒tro na śrū॑yate | ṛṣī॑ṇāṃ vā॒ yaḥ kṣaye॒ guhā॑ vā॒ carkṛ॑ṣe gi॒rā || १ ||
इ॒ह श्रु॒त इन्द्रो॑ अ॒स्मे अ॒द्य स्तवे॑ व॒ज्र्यृची॑षमः । मि॒त्रो न यो जने॒ष्वा यश॑श्च॒क्रे असा॒म्या ॥२॥
i॒ha śru॒ta indro॑ a॒sme a॒dya stave॑ va॒jryṛcī॑ṣamaḥ | mi॒tro na yo jane॒ṣvā yaśa॑śca॒kre asā॒myā || २ ||
म॒हो यस्पति॒: शव॑सो॒ असा॒म्या म॒हो नृ॒म्णस्य॑ तूतु॒जिः । भ॒र्ता वज्र॑स्य धृ॒ष्णोः पि॒ता पु॒त्रमि॑व प्रि॒यम् ॥३॥
ma॒ho yaspati॒: śava॑so॒ asā॒myā ma॒ho nṛ॒mṇasya॑ tūtu॒jiḥ | bha॒rtā vajra॑sya dhṛ॒ṣṇoḥ pi॒tā pu॒trami॑va pri॒yam || ३ ||
यु॒जा॒नो अश्वा॒ वात॑स्य॒ धुनी॑ दे॒वो दे॒वस्य॑ वज्रिवः । स्यन्ता॑ प॒था वि॒रुक्म॑ता सृजा॒नः स्तो॒ष्यध्व॑नः ॥४॥
yu॒jā॒no aśvā॒ vāta॑sya॒ dhunī॑ de॒vo de॒vasya॑ vajrivaḥ | syantā॑ pa॒thā vi॒rukma॑tā sṛjā॒naḥ sto॒ṣyadhva॑naḥ || ४ ||
त्वं त्या चि॒द्वात॒स्याश्वागा॑ ऋ॒ज्रा त्मना॒ वह॑ध्यै । ययो॑र्दे॒वो न मर्त्यो॑ य॒न्ता नकि॑र्वि॒दाय्य॑: ॥५॥
tvaṃ tyā ci॒dvāta॒syāśvāgā॑ ṛ॒jrā tmanā॒ vaha॑dhyai | yayo॑rde॒vo na martyo॑ ya॒ntā naki॑rvi॒dāyya॑: || ५ ||
अध॒ ग्मन्तो॒शना॑ पृच्छते वां॒ कद॑र्था न॒ आ गृ॒हम् । आ ज॑ग्मथुः परा॒काद्दि॒वश्च॒ ग्मश्च॒ मर्त्य॑म् ॥६॥
adha॒ gmanto॒śanā॑ pṛcchate vāṃ॒ kada॑rthā na॒ ā gṛ॒ham | ā ja॑gmathuḥ parā॒kāddi॒vaśca॒ gmaśca॒ martya॑m || ६ ||
आ न॑ इन्द्र पृक्षसे॒ऽस्माकं॒ ब्रह्मोद्य॑तम् । तत्त्वा॑ याचाम॒हेऽव॒: शुष्णं॒ यद्धन्नमा॑नुषम् ॥७॥
ā na॑ indra pṛkṣase॒’smākaṃ॒ brahmodya॑tam | tattvā॑ yācāma॒he’va॒: śuṣṇaṃ॒ yaddhannamā॑nuṣam || ७ ||
अ॒क॒र्मा दस्यु॑र॒भि नो॑ अम॒न्तुर॒न्यव्र॑तो॒ अमा॑नुषः । त्वं तस्या॑मित्रह॒न्वध॑र्दा॒सस्य॑ दम्भय ॥८॥
a॒ka॒rmā dasyu॑ra॒bhi no॑ ama॒ntura॒nyavra॑to॒ amā॑nuṣaḥ | tvaṃ tasyā॑mitraha॒nvadha॑rdā॒sasya॑ dambhaya || ८ ||
त्वं न॑ इन्द्र शूर॒ शूरै॑रु॒त त्वोता॑सो ब॒र्हणा॑ । पु॒रु॒त्रा ते॒ वि पू॒र्तयो॒ नव॑न्त क्षो॒णयो॑ यथा ॥९॥
tvaṃ na॑ indra śūra॒ śūrai॑ru॒ta tvotā॑so ba॒rhaṇā॑ | pu॒ru॒trā te॒ vi pū॒rtayo॒ nava॑nta kṣo॒ṇayo॑ yathā || ९ ||
त्वं तान्वृ॑त्र॒हत्ये॑ चोदयो॒ नॄन्का॑र्पा॒णे शू॑र वज्रिवः । गुहा॒ यदी॑ कवी॒नां वि॒शां नक्ष॑त्रशवसाम् ॥१०॥
tvaṃ tānvṛ॑tra॒hatye॑ codayo॒ nṝnkā॑rpā॒ṇe śū॑ra vajrivaḥ | guhā॒ yadī॑ kavī॒nāṃ vi॒śāṃ nakṣa॑traśavasām || १० ||
म॒क्षू ता त॑ इन्द्र दा॒नाप्न॑स आक्षा॒णे शू॑र वज्रिवः । यद्ध॒ शुष्ण॑स्य द॒म्भयो॑ जा॒तं विश्वं॑ स॒याव॑भिः ॥११॥
ma॒kṣū tā ta॑ indra dā॒nāpna॑sa ākṣā॒ṇe śū॑ra vajrivaḥ | yaddha॒ śuṣṇa॑sya da॒mbhayo॑ jā॒taṃ viśvaṃ॑ sa॒yāva॑bhiḥ || ११ ||
माकु॒ध्र्य॑गिन्द्र शूर॒ वस्वी॑र॒स्मे भू॑वन्न॒भिष्ट॑यः । व॒यंव॑यं त आसां सु॒म्ने स्या॑म वज्रिवः ॥१२॥
māku॒dhrya॑gindra śūra॒ vasvī॑ra॒sme bhū॑vanna॒bhiṣṭa॑yaḥ | va॒yaṃva॑yaṃ ta āsāṃ su॒mne syā॑ma vajrivaḥ || १२ ||
अ॒स्मे ता त॑ इन्द्र सन्तु स॒त्याऽहिं॑सन्तीरुप॒स्पृश॑: । वि॒द्याम॒ यासां॒ भुजो॑ धेनू॒नां न व॑ज्रिवः ॥१३॥
a॒sme tā ta॑ indra santu sa॒tyā’hiṃ॑santīrupa॒spṛśa॑: | vi॒dyāma॒ yāsāṃ॒ bhujo॑ dhenū॒nāṃ na va॑jrivaḥ || १३ ||
अ॒ह॒स्ता यद॒पदी॒ वर्ध॑त॒ क्षाः शची॑भिर्वे॒द्याना॑म् । शुष्णं॒ परि॑ प्रदक्षि॒णिद्वि॒श्वाय॑वे॒ नि शि॑श्नथः ॥१४॥
a॒ha॒stā yada॒padī॒ vardha॑ta॒ kṣāḥ śacī॑bhirve॒dyānā॑m | śuṣṇaṃ॒ pari॑ pradakṣi॒ṇidvi॒śvāya॑ve॒ ni śi॑śnathaḥ || १४ ||
पिबा॑पि॒बेदि॑न्द्र शूर॒ सोमं॒ मा रि॑षण्यो वसवान॒ वसु॒: सन् ।
उ॒त त्रा॑यस्व गृण॒तो म॒घोनो॑ म॒हश्च॑ रा॒यो रे॒वत॑स्कृधी नः ॥१५॥
pibā॑pi॒bedi॑ndra śūra॒ somaṃ॒ mā ri॑ṣaṇyo vasavāna॒ vasu॒: san | u॒ta trā॑yasva gṛṇa॒to ma॒ghono॑ ma॒haśca॑ rā॒yo re॒vata॑skṛdhī naḥ || १५ ||