EeseDharmaSanātana Library
839मण्डल 10 · सूक्त 2
7 shlokपि॒प्री॒हि दे॒वाँ उ॑श॒तो य॑विष्ठ वि॒द्वाँ ऋ॒तूँॠ॑तुपते यजे॒ह ।
ये दैव्या॑ ऋ॒त्विज॒स्तेभि॑रग्ने॒ त्वं होतॄ॑णाम॒स्याय॑जिष्ठः ॥१॥
pi॒prī॒hi de॒vām̐ u॑śa॒to ya॑viṣṭha vi॒dvām̐ ṛ॒tūm̐ṝ॑tupate yaje॒ha | ye daivyā॑ ṛ॒tvija॒stebhi॑ragne॒ tvaṃ hotṝ॑ṇāma॒syāya॑jiṣṭhaḥ || १ ||
वेषि॑ हो॒त्रमु॒त पो॒त्रं जना॑नां मन्धा॒तासि॑ द्रविणो॒दा ऋ॒तावा॑ ।
स्वाहा॑ व॒यं कृ॒णवा॑मा ह॒वींषि॑ दे॒वो दे॒वान्य॑जत्व॒ग्निरर्ह॑न् ॥२॥
veṣi॑ ho॒tramu॒ta po॒traṃ janā॑nāṃ mandhā॒tāsi॑ draviṇo॒dā ṛ॒tāvā॑ | svāhā॑ va॒yaṃ kṛ॒ṇavā॑mā ha॒vīṃṣi॑ de॒vo de॒vānya॑jatva॒gnirarha॑n || २ ||
आ दे॒वाना॒मपि॒ पन्था॑मगन्म॒ यच्छ॒क्नवा॑म॒ तदनु॒ प्रवो॑ळ्हुम् ।
अ॒ग्निर्वि॒द्वान्त्स य॑जा॒त्सेदु॒ होता॒ सो अ॑ध्व॒रान्त्स ऋ॒तून्क॑ल्पयाति ॥३॥
ā de॒vānā॒mapi॒ panthā॑maganma॒ yaccha॒knavā॑ma॒ tadanu॒ pravo॑ḷhum | a॒gnirvi॒dvāntsa ya॑jā॒tsedu॒ hotā॒ so a॑dhva॒rāntsa ṛ॒tūnka॑lpayāti || ३ ||
यद्वो॑ व॒यं प्र॑मि॒नाम॑ व्र॒तानि॑ वि॒दुषां॑ देवा॒ अवि॑दुष्टरासः ।
अ॒ग्निष्टद्विश्व॒मा पृ॑णाति वि॒द्वान्येभि॑र्दे॒वाँ ऋ॒तुभि॑: क॒ल्पया॑ति ॥४॥
yadvo॑ va॒yaṃ pra॑mi॒nāma॑ vra॒tāni॑ vi॒duṣāṃ॑ devā॒ avi॑duṣṭarāsaḥ | a॒gniṣṭadviśva॒mā pṛ॑ṇāti vi॒dvānyebhi॑rde॒vām̐ ṛ॒tubhi॑: ka॒lpayā॑ti || ४ ||
यत्पा॑क॒त्रा मन॑सा दी॒नद॑क्षा॒ न य॒ज्ञस्य॑ मन्व॒ते मर्त्या॑सः ।
अ॒ग्निष्टद्धोता॑ क्रतु॒विद्वि॑जा॒नन्यजि॑ष्ठो दे॒वाँ ऋ॑तु॒शो य॑जाति ॥५॥
yatpā॑ka॒trā mana॑sā dī॒nada॑kṣā॒ na ya॒jñasya॑ manva॒te martyā॑saḥ | a॒gniṣṭaddhotā॑ kratu॒vidvi॑jā॒nanyaji॑ṣṭho de॒vām̐ ṛ॑tu॒śo ya॑jāti || ५ ||
विश्वे॑षां॒ ह्य॑ध्व॒राणा॒मनी॑कं चि॒त्रं के॒तुं जनि॑ता त्वा ज॒जान॑ ।
स आ य॑जस्व नृ॒वती॒रनु॒ क्षा: स्पा॒र्हा इष॑: क्षु॒मती॑र्वि॒श्वज॑न्याः ॥६॥
viśve॑ṣāṃ॒ hya॑dhva॒rāṇā॒manī॑kaṃ ci॒traṃ ke॒tuṃ jani॑tā tvā ja॒jāna॑ | sa ā ya॑jasva nṛ॒vatī॒ranu॒ kṣā: spā॒rhā iṣa॑: kṣu॒matī॑rvi॒śvaja॑nyāḥ || ६ ||
यं त्वा॒ द्यावा॑पृथि॒वी यं त्वाप॒स्त्वष्टा॒ यं त्वा॑ सु॒जनि॑मा ज॒जान॑ ।
पन्था॒मनु॑ प्रवि॒द्वान्पि॑तृ॒याणं॑ द्यु॒मद॑ग्ने समिधा॒नो वि भा॑हि ॥७॥
yaṃ tvā॒ dyāvā॑pṛthi॒vī yaṃ tvāpa॒stvaṣṭā॒ yaṃ tvā॑ su॒jani॑mā ja॒jāna॑ | panthā॒manu॑ pravi॒dvānpi॑tṛ॒yāṇaṃ॑ dyu॒mada॑gne samidhā॒no vi bhā॑hi || ७ ||