EeseDharmaSanātana Library
1000मण्डल 10 · सूक्त 163
6 shlokअ॒क्षीभ्यां॑ ते॒ नासि॑काभ्यां॒ कर्णा॑भ्यां॒ छुबु॑का॒दधि॑ । यक्ष्मं॑ शीर्ष॒ण्यं॑ म॒स्तिष्का॑ज्जि॒ह्वाया॒ वि वृ॑हामि ते ॥१॥
a॒kṣībhyāṃ॑ te॒ nāsi॑kābhyāṃ॒ karṇā॑bhyāṃ॒ chubu॑kā॒dadhi॑ | yakṣmaṃ॑ śīrṣa॒ṇyaṃ॑ ma॒stiṣkā॑jji॒hvāyā॒ vi vṛ॑hāmi te || १ ||
ग्री॒वाभ्य॑स्त उ॒ष्णिहा॑भ्य॒: कीक॑साभ्यो अनू॒क्या॑त् । यक्ष्मं॑ दोष॒ण्य१मंसा॑भ्यां बा॒हुभ्यां॒ वि वृ॑हामि ते ॥२॥
grī॒vābhya॑sta u॒ṣṇihā॑bhya॒: kīka॑sābhyo anū॒kyā॑t | yakṣmaṃ॑ doṣa॒ṇya१maṃsā॑bhyāṃ bā॒hubhyāṃ॒ vi vṛ॑hāmi te || २ ||
आ॒न्त्रेभ्य॑स्ते॒ गुदा॑भ्यो वनि॒ष्ठोर्हृद॑या॒दधि॑ । यक्ष्मं॒ मत॑स्नाभ्यां य॒क्नः प्ला॒शिभ्यो॒ वि वृ॑हामि ते ॥३॥
ā॒ntrebhya॑ste॒ gudā॑bhyo vani॒ṣṭhorhṛda॑yā॒dadhi॑ | yakṣmaṃ॒ mata॑snābhyāṃ ya॒knaḥ plā॒śibhyo॒ vi vṛ॑hāmi te || ३ ||
ऊ॒रुभ्यां॑ ते अष्ठी॒वद्भ्यां॒ पार्ष्णि॑भ्यां॒ प्रप॑दाभ्याम् । यक्ष्मं॒ श्रोणि॑भ्यां॒ भास॑दा॒द्भंस॑सो॒ वि वृ॑हामि ते ॥४॥
ū॒rubhyāṃ॑ te aṣṭhī॒vadbhyāṃ॒ pārṣṇi॑bhyāṃ॒ prapa॑dābhyām | yakṣmaṃ॒ śroṇi॑bhyāṃ॒ bhāsa॑dā॒dbhaṃsa॑so॒ vi vṛ॑hāmi te || ४ ||
मेह॑नाद्वनं॒कर॑णा॒ल्लोम॑भ्यस्ते न॒खेभ्य॑: । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥५॥
meha॑nādvanaṃ॒kara॑ṇā॒lloma॑bhyaste na॒khebhya॑: | yakṣmaṃ॒ sarva॑smādā॒tmana॒stami॒daṃ vi vṛ॑hāmi te || ५ ||
अङ्गा॑दङ्गा॒ल्लोम्नो॑लोम्नो जा॒तं पर्व॑णिपर्वणि । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥६॥
aṅgā॑daṅgā॒llomno॑lomno jā॒taṃ parva॑ṇiparvaṇi | yakṣmaṃ॒ sarva॑smādā॒tmana॒stami॒daṃ vi vṛ॑hāmi te || ६ ||