EeseDharmaSanātana Library
999मण्डल 10 · सूक्त 162
6 shlokब्रह्म॑णा॒ग्निः सं॑विदा॒नो र॑क्षो॒हा बा॑धतामि॒तः । अमी॑वा॒ यस्ते॒ गर्भं॑ दु॒र्णामा॒ योनि॑मा॒शये॑ ॥१॥
brahma॑ṇā॒gniḥ saṃ॑vidā॒no ra॑kṣo॒hā bā॑dhatāmi॒taḥ | amī॑vā॒ yaste॒ garbhaṃ॑ du॒rṇāmā॒ yoni॑mā॒śaye॑ || १ ||
यस्ते॒ गर्भ॒ममी॑वा दु॒र्णामा॒ योनि॑मा॒शये॑ । अ॒ग्निष्टं ब्रह्म॑णा स॒ह निष्क्र॒व्याद॑मनीनशत् ॥२॥
yaste॒ garbha॒mamī॑vā du॒rṇāmā॒ yoni॑mā॒śaye॑ | a॒gniṣṭaṃ brahma॑ṇā sa॒ha niṣkra॒vyāda॑manīnaśat || २ ||
यस्ते॒ हन्ति॑ प॒तय॑न्तं निष॒त्स्नुं यः स॑रीसृ॒पम् । जा॒तं यस्ते॒ जिघां॑सति॒ तमि॒तो ना॑शयामसि ॥३॥
yaste॒ hanti॑ pa॒taya॑ntaṃ niṣa॒tsnuṃ yaḥ sa॑rīsṛ॒pam | jā॒taṃ yaste॒ jighāṃ॑sati॒ tami॒to nā॑śayāmasi || ३ ||
यस्त॑ ऊ॒रू वि॒हर॑त्यन्त॒रा दम्प॑ती॒ शये॑ । योनिं॒ यो अ॒न्तरा॒रेळ्हि॒ तमि॒तो ना॑शयामसि ॥४॥
yasta॑ ū॒rū vi॒hara॑tyanta॒rā dampa॑tī॒ śaye॑ | yoniṃ॒ yo a॒ntarā॒reḷhi॒ tami॒to nā॑śayāmasi || ४ ||
यस्त्वा॒ भ्राता॒ पति॑र्भू॒त्वा जा॒रो भू॒त्वा नि॒पद्य॑ते । प्र॒जां यस्ते॒ जिघां॑सति॒ तमि॒तो ना॑शयामसि ॥५॥
yastvā॒ bhrātā॒ pati॑rbhū॒tvā jā॒ro bhū॒tvā ni॒padya॑te | pra॒jāṃ yaste॒ jighāṃ॑sati॒ tami॒to nā॑śayāmasi || ५ ||
यस्त्वा॒ स्वप्ने॑न॒ तम॑सा मोहयि॒त्वा नि॒पद्य॑ते । प्र॒जां यस्ते॒ जिघां॑सति॒ तमि॒तो ना॑शयामसि ॥६॥
yastvā॒ svapne॑na॒ tama॑sā mohayi॒tvā ni॒padya॑te | pra॒jāṃ yaste॒ jighāṃ॑sati॒ tami॒to nā॑śayāmasi || ६ ||