EeseDharmaSanātana Library
997मण्डल 10 · सूक्त 160
5 shlokती॒व्रस्या॒भिव॑यसो अ॒स्य पा॑हि सर्वर॒था वि हरी॑ इ॒ह मु॑ञ्च ।
इन्द्र॒ मा त्वा॒ यज॑मानासो अ॒न्ये नि री॑रम॒न्तुभ्य॑मि॒मे सु॒तास॑: ॥१॥
tī॒vrasyā॒bhiva॑yaso a॒sya pā॑hi sarvara॒thā vi harī॑ i॒ha mu॑ñca | indra॒ mā tvā॒ yaja॑mānāso a॒nye ni rī॑rama॒ntubhya॑mi॒me su॒tāsa॑: || १ ||
तुभ्यं॑ सु॒तास्तुभ्य॑मु॒ सोत्वा॑स॒स्त्वां गिर॒: श्वात्र्या॒ आ ह्व॑यन्ति ।
इन्द्रे॒दम॒द्य सव॑नं जुषा॒णो विश्व॑स्य वि॒द्वाँ इ॒ह पा॑हि॒ सोम॑म् ॥२॥
tubhyaṃ॑ su॒tāstubhya॑mu॒ sotvā॑sa॒stvāṃ gira॒: śvātryā॒ ā hva॑yanti | indre॒dama॒dya sava॑naṃ juṣā॒ṇo viśva॑sya vi॒dvām̐ i॒ha pā॑hi॒ soma॑m || २ ||
य उ॑श॒ता मन॑सा॒ सोम॑मस्मै सर्वहृ॒दा दे॒वका॑मः सु॒नोति॑ ।
न गा इन्द्र॒स्तस्य॒ परा॑ ददाति प्रश॒स्तमिच्चारु॑मस्मै कृणोति ॥३॥
ya u॑śa॒tā mana॑sā॒ soma॑masmai sarvahṛ॒dā de॒vakā॑maḥ su॒noti॑ | na gā indra॒stasya॒ parā॑ dadāti praśa॒stamiccāru॑masmai kṛṇoti || ३ ||
अनु॑स्पष्टो भवत्ये॒षो अ॑स्य॒ यो अ॑स्मै रे॒वान्न सु॒नोति॒ सोम॑म् ।
निर॑र॒त्नौ म॒घवा॒ तं द॑धाति ब्रह्म॒द्विषो॑ ह॒न्त्यना॑नुदिष्टः ॥४॥
anu॑spaṣṭo bhavatye॒ṣo a॑sya॒ yo a॑smai re॒vānna su॒noti॒ soma॑m | nira॑ra॒tnau ma॒ghavā॒ taṃ da॑dhāti brahma॒dviṣo॑ ha॒ntyanā॑nudiṣṭaḥ || ४ ||
अ॒श्वा॒यन्तो॑ ग॒व्यन्तो॑ वा॒जय॑न्तो॒ हवा॑महे॒ त्वोप॑गन्त॒वा उ॑ ।
आ॒भूष॑न्तस्ते सुम॒तौ नवा॑यां व॒यमि॑न्द्र त्वा शु॒नं हु॑वेम ॥५॥
a॒śvā॒yanto॑ ga॒vyanto॑ vā॒jaya॑nto॒ havā॑mahe॒ tvopa॑ganta॒vā u॑ | ā॒bhūṣa॑ntaste suma॒tau navā॑yāṃ va॒yami॑ndra tvā śu॒naṃ hu॑vema || ५ ||