EeseDharmaSanātana Library
996मण्डल 10 · सूक्त 159
6 shlokउद॒सौ सूर्यो॑ अगा॒दुद॒यं मा॑म॒को भग॑: । अ॒हं तद्वि॑द्व॒ला पति॑म॒भ्य॑साक्षि विषास॒हिः ॥१॥
uda॒sau sūryo॑ agā॒duda॒yaṃ mā॑ma॒ko bhaga॑: | a॒haṃ tadvi॑dva॒lā pati॑ma॒bhya॑sākṣi viṣāsa॒hiḥ || १ ||
अ॒हं के॒तुर॒हं मू॒र्धाऽहमु॒ग्रा वि॒वाच॑नी । ममेदनु॒ क्रतुं॒ पति॑: सेहा॒नाया॑ उ॒पाच॑रेत् ॥२॥
a॒haṃ ke॒tura॒haṃ mū॒rdhā’hamu॒grā vi॒vāca॑nī | mamedanu॒ kratuṃ॒ pati॑: sehā॒nāyā॑ u॒pāca॑ret || २ ||
मम॑ पु॒त्राः श॑त्रु॒हणोऽथो॑ मे दुहि॒ता वि॒राट् । उ॒ताहम॑स्मि संज॒या पत्यौ॑ मे॒ श्लोक॑ उत्त॒मः ॥३॥
mama॑ pu॒trāḥ śa॑tru॒haṇo’tho॑ me duhi॒tā vi॒rāṭ | u॒tāhama॑smi saṃja॒yā patyau॑ me॒ śloka॑ utta॒maḥ || ३ ||
येनेन्द्रो॑ ह॒विषा॑ कृ॒त्व्यभ॑वद्द्यु॒म्न्यु॑त्त॒मः । इ॒दं तद॑क्रि देवा असप॒त्ना किला॑भुवम् ॥४॥
yenendro॑ ha॒viṣā॑ kṛ॒tvyabha॑vaddyu॒mnyu॑tta॒maḥ | i॒daṃ tada॑kri devā asapa॒tnā kilā॑bhuvam || ४ ||
अ॒स॒प॒त्ना स॑पत्न॒घ्नी जय॑न्त्यभि॒भूव॑री । आवृ॑क्षम॒न्यासां॒ वर्चो॒ राधो॒ अस्थे॑यसामिव ॥५॥
a॒sa॒pa॒tnā sa॑patna॒ghnī jaya॑ntyabhi॒bhūva॑rī | āvṛ॑kṣama॒nyāsāṃ॒ varco॒ rādho॒ asthe॑yasāmiva || ५ ||
सम॑जैषमि॒मा अ॒हं स॒पत्नी॑रभि॒भूव॑री । यथा॒हम॒स्य वी॒रस्य॑ वि॒राजा॑नि॒ जन॑स्य च ॥६॥
sama॑jaiṣami॒mā a॒haṃ sa॒patnī॑rabhi॒bhūva॑rī | yathā॒hama॒sya vī॒rasya॑ vi॒rājā॑ni॒ jana॑sya ca || ६ ||