EeseDharmaSanātana Library
993मण्डल 10 · सूक्त 156
5 shlokअ॒ग्निं हि॑न्वन्तु नो॒ धिय॒: सप्ति॑मा॒शुमि॑वा॒जिषु॑ । तेन॑ जेष्म॒ धनं॑धनम् ॥१॥
a॒gniṃ hi॑nvantu no॒ dhiya॒: sapti॑mā॒śumi॑vā॒jiṣu॑ | tena॑ jeṣma॒ dhanaṃ॑dhanam || १ ||
यया॒ गा आ॒करा॑महे॒ सेन॑याग्ने॒ तवो॒त्या । तां नो॑ हिन्व म॒घत्त॑ये ॥२॥
yayā॒ gā ā॒karā॑mahe॒ sena॑yāgne॒ tavo॒tyā | tāṃ no॑ hinva ma॒ghatta॑ye || २ ||
आग्ने॑ स्थू॒रं र॒यिं भ॑र पृ॒थुं गोम॑न्तम॒श्विन॑म् । अ॒ङ्धि खं व॒र्तया॑ प॒णिम् ॥३॥
āgne॑ sthū॒raṃ ra॒yiṃ bha॑ra pṛ॒thuṃ goma॑ntama॒śvina॑m | a॒ṅdhi khaṃ va॒rtayā॑ pa॒ṇim || ३ ||
अग्ने॒ नक्ष॑त्रम॒जर॒मा सूर्यं॑ रोहयो दि॒वि । दध॒ज्ज्योति॒र्जने॑भ्यः ॥४॥
agne॒ nakṣa॑trama॒jara॒mā sūryaṃ॑ rohayo di॒vi | dadha॒jjyoti॒rjane॑bhyaḥ || ४ ||
अग्ने॑ के॒तुर्वि॒शाम॑सि॒ प्रेष्ठ॒: श्रेष्ठ॑ उपस्थ॒सत् । बोधा॑ स्तो॒त्रे वयो॒ दध॑त् ॥५॥
agne॑ ke॒turvi॒śāma॑si॒ preṣṭha॒: śreṣṭha॑ upastha॒sat | bodhā॑ sto॒tre vayo॒ dadha॑t || ५ ||