EeseDharmaSanātana Library
991मण्डल 10 · सूक्त 154
5 shlokसोम॒ एके॑भ्यः पवते घृ॒तमेक॒ उपा॑सते । येभ्यो॒ मधु॑ प्र॒धाव॑ति॒ ताँश्चि॑दे॒वापि॑ गच्छतात् ॥१॥
soma॒ eke॑bhyaḥ pavate ghṛ॒tameka॒ upā॑sate | yebhyo॒ madhu॑ pra॒dhāva॑ti॒ tām̐ści॑de॒vāpi॑ gacchatāt || १ ||
तप॑सा॒ ये अ॑नाधृ॒ष्यास्तप॑सा॒ ये स्व॑र्य॒युः । तपो॒ ये च॑क्रि॒रे मह॒स्ताँश्चि॑दे॒वापि॑ गच्छतात् ॥२॥
tapa॑sā॒ ye a॑nādhṛ॒ṣyāstapa॑sā॒ ye sva॑rya॒yuḥ | tapo॒ ye ca॑kri॒re maha॒stām̐ści॑de॒vāpi॑ gacchatāt || २ ||
ये युध्य॑न्ते प्र॒धने॑षु॒ शूरा॑सो॒ ये त॑नू॒त्यज॑: । ये वा॑ स॒हस्र॑दक्षिणा॒स्ताँश्चि॑दे॒वापि॑ गच्छतात् ॥३॥
ye yudhya॑nte pra॒dhane॑ṣu॒ śūrā॑so॒ ye ta॑nū॒tyaja॑: | ye vā॑ sa॒hasra॑dakṣiṇā॒stām̐ści॑de॒vāpi॑ gacchatāt || ३ ||
ये चि॒त्पूर्व॑ ऋत॒साप॑ ऋ॒तावा॑न ऋता॒वृध॑: । पि॒तॄन्तप॑स्वतो यम॒ ताँश्चि॑दे॒वापि॑ गच्छतात् ॥४॥
ye ci॒tpūrva॑ ṛta॒sāpa॑ ṛ॒tāvā॑na ṛtā॒vṛdha॑: | pi॒tṝntapa॑svato yama॒ tām̐ści॑de॒vāpi॑ gacchatāt || ४ ||
स॒हस्र॑णीथाः क॒वयो॒ ये गो॑पा॒यन्ति॒ सूर्य॑म् । ऋषी॒न्तप॑स्वतो यम तपो॒जाँ अपि॑ गच्छतात् ॥५॥
sa॒hasra॑ṇīthāḥ ka॒vayo॒ ye go॑pā॒yanti॒ sūrya॑m | ṛṣī॒ntapa॑svato yama tapo॒jām̐ api॑ gacchatāt || ५ ||