EeseDharmaSanātana Library
987मण्डल 10 · सूक्त 150
5 shlokसमि॑द्धश्चि॒त्समि॑ध्यसे दे॒वेभ्यो॑ हव्यवाहन । आ॒दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि ॥१॥
sami॑ddhaści॒tsami॑dhyase de॒vebhyo॑ havyavāhana | ā॒di॒tyai ru॒drairvasu॑bhirna॒ ā ga॑hi mṛḷī॒kāya॑ na॒ ā ga॑hi || १ ||
इ॒मं य॒ज्ञमि॒दं वचो॑ जुजुषा॒ण उ॒पाग॑हि । मर्ता॑सस्त्वा समिधान हवामहे मृळी॒काय॑ हवामहे ॥२॥
i॒maṃ ya॒jñami॒daṃ vaco॑ jujuṣā॒ṇa u॒pāga॑hi | martā॑sastvā samidhāna havāmahe mṛḷī॒kāya॑ havāmahe || २ ||
त्वामु॑ जा॒तवे॑दसं वि॒श्ववा॑रं गृणे धि॒या । अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान् ॥३॥
tvāmu॑ jā॒tave॑dasaṃ vi॒śvavā॑raṃ gṛṇe dhi॒yā | agne॑ de॒vām̐ ā va॑ha naḥ pri॒yavra॑tānmṛḷī॒kāya॑ pri॒yavra॑tān || ३ ||
अ॒ग्निर्दे॒वो दे॒वाना॑मभवत्पु॒रोहि॑तो॒ऽग्निं म॑नु॒ष्या॒३ ऋष॑य॒: समी॑धिरे ।
अ॒ग्निं म॒हो धन॑साताव॒हं हु॑वे मृळी॒कं धन॑सातये ॥४॥
a॒gnirde॒vo de॒vānā॑mabhavatpu॒rohi॑to॒’gniṃ ma॑nu॒ṣyā॒३ ṛṣa॑ya॒: samī॑dhire | a॒gniṃ ma॒ho dhana॑sātāva॒haṃ hu॑ve mṛḷī॒kaṃ dhana॑sātaye || ४ ||
अ॒ग्निरत्रिं॑ भ॒रद्वा॑जं॒ गवि॑ष्ठिरं॒ प्राव॑न्न॒: कण्वं॑ त्र॒सद॑स्युमाह॒वे ।
अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः ॥५॥
a॒gniratriṃ॑ bha॒radvā॑jaṃ॒ gavi॑ṣṭhiraṃ॒ prāva॑nna॒: kaṇvaṃ॑ tra॒sada॑syumāha॒ve | a॒gniṃ vasi॑ṣṭho havate pu॒rohi॑to mṛḷī॒kāya॑ pu॒rohi॑taḥ || ५ ||