EeseDharmaSanātana Library
986मण्डल 10 · सूक्त 149
5 shlokस॒वि॒ता य॒न्त्रैः पृ॑थि॒वीम॑रम्णादस्कम्भ॒ने स॑वि॒ता द्याम॑दृंहत् ।
अश्व॑मिवाधुक्ष॒द्धुनि॑म॒न्तरि॑क्षम॒तूर्ते॑ ब॒द्धं स॑वि॒ता स॑मु॒द्रम् ॥१॥
sa॒vi॒tā ya॒ntraiḥ pṛ॑thi॒vīma॑ramṇādaskambha॒ne sa॑vi॒tā dyāma॑dṛṃhat | aśva॑mivādhukṣa॒ddhuni॑ma॒ntari॑kṣama॒tūrte॑ ba॒ddhaṃ sa॑vi॒tā sa॑mu॒dram || १ ||
यत्रा॑ समु॒द्रः स्क॑भि॒तो व्यौन॒दपां॑ नपात्सवि॒ता तस्य॑ वेद ।
अतो॒ भूरत॑ आ॒ उत्थि॑तं॒ रजोऽतो॒ द्यावा॑पृथि॒वी अ॑प्रथेताम् ॥२॥
yatrā॑ samu॒draḥ ska॑bhi॒to vyauna॒dapāṃ॑ napātsavi॒tā tasya॑ veda | ato॒ bhūrata॑ ā॒ utthi॑taṃ॒ rajo’to॒ dyāvā॑pṛthi॒vī a॑prathetām || २ ||
प॒श्चेदम॒न्यद॑भव॒द्यज॑त्र॒मम॑र्त्यस्य॒ भुव॑नस्य भू॒ना ।
सु॒प॒र्णो अ॒ङ्ग स॑वि॒तुर्ग॒रुत्मा॒न्पूर्वो॑ जा॒तः स उ॑ अ॒स्यानु॒ धर्म॑ ॥३॥
pa॒ścedama॒nyada॑bhava॒dyaja॑tra॒mama॑rtyasya॒ bhuva॑nasya bhū॒nā | su॒pa॒rṇo a॒ṅga sa॑vi॒turga॒rutmā॒npūrvo॑ jā॒taḥ sa u॑ a॒syānu॒ dharma॑ || ३ ||
गाव॑ इव॒ ग्रामं॒ यूयु॑धिरि॒वाश्वा॑न्वा॒श्रेव॑ व॒त्सं सु॒मना॒ दुहा॑ना ।
पति॑रिव जा॒याम॒भि नो॒ न्ये॑तु ध॒र्ता दि॒वः स॑वि॒ता वि॒श्ववा॑रः ॥४॥
gāva॑ iva॒ grāmaṃ॒ yūyu॑dhiri॒vāśvā॑nvā॒śreva॑ va॒tsaṃ su॒manā॒ duhā॑nā | pati॑riva jā॒yāma॒bhi no॒ nye॑tu dha॒rtā di॒vaḥ sa॑vi॒tā vi॒śvavā॑raḥ || ४ ||
हिर॑ण्यस्तूपः सवित॒र्यथा॑ त्वाऽऽङ्गिर॒सो जु॒ह्वे वाजे॑ अ॒स्मिन् ।
ए॒वा त्वार्च॒न्नव॑से॒ वन्द॑मान॒: सोम॑स्येवां॒शुं प्रति॑ जागरा॒हम् ॥५॥
hira॑ṇyastūpaḥ savita॒ryathā॑ tvā’’ṅgira॒so ju॒hve vāje॑ a॒smin | e॒vā tvārca॒nnava॑se॒ vanda॑māna॒: soma॑syevāṃ॒śuṃ prati॑ jāgarā॒ham || ५ ||