EeseDharmaSanātana Library
985मण्डल 10 · सूक्त 148
5 shlokसु॒ष्वा॒णास॑ इन्द्र स्तु॒मसि॑ त्वा सस॒वांस॑श्च तुविनृम्ण॒ वाज॑म् ।
आ नो॑ भर सुवि॒तं यस्य॑ चा॒कन्त्मना॒ तना॑ सनुयाम॒ त्वोता॑: ॥१॥
su॒ṣvā॒ṇāsa॑ indra stu॒masi॑ tvā sasa॒vāṃsa॑śca tuvinṛmṇa॒ vāja॑m | ā no॑ bhara suvi॒taṃ yasya॑ cā॒kantmanā॒ tanā॑ sanuyāma॒ tvotā॑: || १ ||
ऋ॒ष्वस्त्वमि॑न्द्र शूर जा॒तो दासी॒र्विश॒: सूर्ये॑ण सह्याः ।
गुहा॑ हि॒तं गुह्यं॑ गू॒ळ्हम॒प्सु बि॑भृ॒मसि॑ प्र॒स्रव॑णे॒ न सोम॑म् ॥२॥
ṛ॒ṣvastvami॑ndra śūra jā॒to dāsī॒rviśa॒: sūrye॑ṇa sahyāḥ | guhā॑ hi॒taṃ guhyaṃ॑ gū॒ḷhama॒psu bi॑bhṛ॒masi॑ pra॒srava॑ṇe॒ na soma॑m || २ ||
अ॒र्यो वा॒ गिरो॑ अ॒भ्य॑र्च वि॒द्वानृषी॑णां॒ विप्र॑: सुम॒तिं च॑का॒नः ।
ते स्या॑म॒ ये र॒णय॑न्त॒ सोमै॑रे॒नोत तुभ्यं॑ रथोळ्ह भ॒क्षैः ॥३॥
a॒ryo vā॒ giro॑ a॒bhya॑rca vi॒dvānṛṣī॑ṇāṃ॒ vipra॑: suma॒tiṃ ca॑kā॒naḥ | te syā॑ma॒ ye ra॒ṇaya॑nta॒ somai॑re॒nota tubhyaṃ॑ rathoḷha bha॒kṣaiḥ || ३ ||
इ॒मा ब्रह्मे॑न्द्र॒ तुभ्यं॑ शंसि॒ दा नृभ्यो॑ नृ॒णां शू॑र॒ शव॑: ।
तेभि॑र्भव॒ सक्र॑तु॒र्येषु॑ चा॒कन्नु॒त त्रा॑यस्व गृण॒त उ॒त स्तीन् ॥४॥
i॒mā brahme॑ndra॒ tubhyaṃ॑ śaṃsi॒ dā nṛbhyo॑ nṛ॒ṇāṃ śū॑ra॒ śava॑: | tebhi॑rbhava॒ sakra॑tu॒ryeṣu॑ cā॒kannu॒ta trā॑yasva gṛṇa॒ta u॒ta stīn || ४ ||
श्रु॒धी हव॑मिन्द्र शूर॒ पृथ्या॑ उ॒त स्त॑वसे वे॒न्यस्या॒र्कैः ।
आ यस्ते॒ योनिं॑ घृ॒तव॑न्त॒मस्वा॑रू॒र्मिर्न निम्नैर्द्र॑वयन्त॒ वक्वा॑: ॥५॥
śru॒dhī hava॑mindra śūra॒ pṛthyā॑ u॒ta sta॑vase ve॒nyasyā॒rkaiḥ | ā yaste॒ yoniṃ॑ ghṛ॒tava॑nta॒masvā॑rū॒rmirna nimnairdra॑vayanta॒ vakvā॑: || ५ ||