EeseDharmaSanātana Library
982मण्डल 10 · सूक्त 145
6 shlokइ॒मां ख॑ना॒म्योष॑धिं वी॒रुधं॒ बल॑वत्तमाम् । यया॑ स॒पत्नीं॒ बाध॑ते॒ यया॑ संवि॒न्दते॒ पति॑म् ॥१॥
i॒māṃ kha॑nā॒myoṣa॑dhiṃ vī॒rudhaṃ॒ bala॑vattamām | yayā॑ sa॒patnīṃ॒ bādha॑te॒ yayā॑ saṃvi॒ndate॒ pati॑m || १ ||
उत्ता॑नपर्णे॒ सुभ॑गे॒ देव॑जूते॒ सह॑स्वति । स॒पत्नीं॑ मे॒ परा॑ धम॒ पतिं॑ मे॒ केव॑लं कुरु ॥२॥
uttā॑naparṇe॒ subha॑ge॒ deva॑jūte॒ saha॑svati | sa॒patnīṃ॑ me॒ parā॑ dhama॒ patiṃ॑ me॒ keva॑laṃ kuru || २ ||
उत्त॑रा॒हमु॑त्तर॒ उत्त॒रेदुत्त॑राभ्यः । अथा॑ स॒पत्नी॒ या ममाऽध॑रा॒ साध॑राभ्यः ॥३॥
utta॑rā॒hamu॑ttara॒ utta॒redutta॑rābhyaḥ | athā॑ sa॒patnī॒ yā mamā’dha॑rā॒ sādha॑rābhyaḥ || ३ ||
न॒ह्य॑स्या॒ नाम॑ गृ॒भ्णामि॒ नो अ॒स्मिन्र॑मते॒ जने॑ । परा॑मे॒व प॑रा॒वतं॑ स॒पत्नीं॑ गमयामसि ॥४॥
na॒hya॑syā॒ nāma॑ gṛ॒bhṇāmi॒ no a॒sminra॑mate॒ jane॑ | parā॑me॒va pa॑rā॒vataṃ॑ sa॒patnīṃ॑ gamayāmasi || ४ ||
अ॒हम॑स्मि॒ सह॑मा॒नाऽथ॒ त्वम॑सि सास॒हिः । उ॒भे सह॑स्वती भू॒त्वी स॒पत्नीं॑ मे सहावहै ॥५॥
a॒hama॑smi॒ saha॑mā॒nā’tha॒ tvama॑si sāsa॒hiḥ | u॒bhe saha॑svatī bhū॒tvī sa॒patnīṃ॑ me sahāvahai || ५ ||
उप॑ तेऽधां॒ सह॑मानाम॒भि त्वा॑धां॒ सही॑यसा ।
मामनु॒ प्र ते॒ मनो॑ व॒त्सं गौरि॑व धावतु प॒था वारि॑व धावतु ॥६॥
upa॑ te’dhāṃ॒ saha॑mānāma॒bhi tvā॑dhāṃ॒ sahī॑yasā | māmanu॒ pra te॒ mano॑ va॒tsaṃ gauri॑va dhāvatu pa॒thā vāri॑va dhāvatu || ६ ||