EeseDharmaSanātana Library
980मण्डल 10 · सूक्त 143
6 shlokत्यं चि॒दत्रि॑मृत॒जुर॒मर्थ॒मश्वं॒ न यात॑वे । क॒क्षीव॑न्तं॒ यदी॒ पुना॒ रथं॒ न कृ॑णु॒थो नव॑म् ॥१॥
tyaṃ ci॒datri॑mṛta॒jura॒martha॒maśvaṃ॒ na yāta॑ve | ka॒kṣīva॑ntaṃ॒ yadī॒ punā॒ rathaṃ॒ na kṛ॑ṇu॒tho nava॑m || १ ||
त्यं चि॒दश्वं॒ न वा॒जिन॑मरे॒णवो॒ यमत्न॑त । दृ॒ळ्हं ग्र॒न्थिं न वि ष्य॑त॒मत्रिं॒ यवि॑ष्ठ॒मा रज॑: ॥२॥
tyaṃ ci॒daśvaṃ॒ na vā॒jina॑mare॒ṇavo॒ yamatna॑ta | dṛ॒ḷhaṃ gra॒nthiṃ na vi ṣya॑ta॒matriṃ॒ yavi॑ṣṭha॒mā raja॑: || २ ||
नरा॒ दंसि॑ष्ठा॒वत्र॑ये॒ शुभ्रा॒ सिषा॑सतं॒ धिय॑: । अथा॒ हि वां॑ दि॒वो न॑रा॒ पुन॒ स्तोमो॒ न वि॒शसे॑ ॥३॥
narā॒ daṃsi॑ṣṭhā॒vatra॑ye॒ śubhrā॒ siṣā॑sataṃ॒ dhiya॑: | athā॒ hi vāṃ॑ di॒vo na॑rā॒ puna॒ stomo॒ na vi॒śase॑ || ३ ||
चि॒ते तद्वां॑ सुराधसा रा॒तिः सु॑म॒तिर॑श्विना । आ यन्न॒: सद॑ने पृ॒थौ सम॑ने॒ पर्ष॑थो नरा ॥४॥
ci॒te tadvāṃ॑ surādhasā rā॒tiḥ su॑ma॒tira॑śvinā | ā yanna॒: sada॑ne pṛ॒thau sama॑ne॒ parṣa॑tho narā || ४ ||
यु॒वं भु॒ज्युं स॑मु॒द्र आ रज॑सः पा॒र ई॑ङ्खि॒तम् । या॒तमच्छा॑ पत॒त्रिभि॒र्नास॑त्या सा॒तये॑ कृतम् ॥५॥
yu॒vaṃ bhu॒jyuṃ sa॑mu॒dra ā raja॑saḥ pā॒ra ī॑ṅkhi॒tam | yā॒tamacchā॑ pata॒tribhi॒rnāsa॑tyā sā॒taye॑ kṛtam || ५ ||
आ वां॑ सु॒म्नैः शं॒यू इ॑व॒ मंहि॑ष्ठा॒ विश्व॑वेदसा । सम॒स्मे भू॑षतं न॒रोत्सं॒ न पि॒प्युषी॒रिष॑: ॥६॥
ā vāṃ॑ su॒mnaiḥ śaṃ॒yū i॑va॒ maṃhi॑ṣṭhā॒ viśva॑vedasā | sama॒sme bhū॑ṣataṃ na॒rotsaṃ॒ na pi॒pyuṣī॒riṣa॑: || ६ ||