EeseDharmaSanātana Library
978मण्डल 10 · सूक्त 141
6 shlokअग्ने॒ अच्छा॑ वदे॒ह न॑: प्र॒त्यङ्न॑: सु॒मना॑ भव । प्र नो॑ यच्छ विशस्पते धन॒दा अ॑सि न॒स्त्वम् ॥१॥
agne॒ acchā॑ vade॒ha na॑: pra॒tyaṅna॑: su॒manā॑ bhava | pra no॑ yaccha viśaspate dhana॒dā a॑si na॒stvam || १ ||
प्र नो॑ यच्छत्वर्य॒मा प्र भग॒: प्र बृह॒स्पति॑: । प्र दे॒वाः प्रोत सू॒नृता॑ रा॒यो दे॒वी द॑दातु नः ॥२॥
pra no॑ yacchatvarya॒mā pra bhaga॒: pra bṛha॒spati॑: | pra de॒vāḥ prota sū॒nṛtā॑ rā॒yo de॒vī da॑dātu naḥ || २ ||
सोमं॒ राजा॑न॒मव॑से॒ऽग्निं गी॒र्भिर्ह॑वामहे । आ॒दि॒त्यान्विष्णुं॒ सूर्यं॑ ब्र॒ह्माणं॑ च॒ बृह॒स्पति॑म् ॥३॥
somaṃ॒ rājā॑na॒mava॑se॒’gniṃ gī॒rbhirha॑vāmahe | ā॒di॒tyānviṣṇuṃ॒ sūryaṃ॑ bra॒hmāṇaṃ॑ ca॒ bṛha॒spati॑m || ३ ||
इ॒न्द्र॒वा॒यू बृह॒स्पतिं॑ सु॒हवे॒ह ह॑वामहे । यथा॑ न॒: सर्व॒ इज्जन॒: संग॑त्यां सु॒मना॒ अस॑त् ॥४॥
i॒ndra॒vā॒yū bṛha॒spatiṃ॑ su॒have॒ha ha॑vāmahe | yathā॑ na॒: sarva॒ ijjana॒: saṃga॑tyāṃ su॒manā॒ asa॑t || ४ ||
अ॒र्य॒मणं॒ बृह॒स्पति॒मिन्द्रं॒ दाना॑य चोदय । वातं॒ विष्णुं॒ सर॑स्वतीं सवि॒तारं॑ च वा॒जिन॑म् ॥५॥
a॒rya॒maṇaṃ॒ bṛha॒spati॒mindraṃ॒ dānā॑ya codaya | vātaṃ॒ viṣṇuṃ॒ sara॑svatīṃ savi॒tāraṃ॑ ca vā॒jina॑m || ५ ||
त्वं नो॑ अग्ने अ॒ग्निभि॒र्ब्रह्म॑ य॒ज्ञं च॑ वर्धय । त्वं नो॑ दे॒वता॑तये रा॒यो दाना॑य चोदय ॥६॥
tvaṃ no॑ agne a॒gnibhi॒rbrahma॑ ya॒jñaṃ ca॑ vardhaya | tvaṃ no॑ de॒vatā॑taye rā॒yo dānā॑ya codaya || ६ ||