EeseDharmaSanātana Library
850मण्डल 10 · सूक्त 13
5 shlokयु॒जे वां॒ ब्रह्म॑ पू॒र्व्यं नमो॑भि॒र्वि श्लोक॑ एतु प॒थ्ये॑व सू॒रेः ।
शृ॒ण्वन्तु॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः ॥१॥
yu॒je vāṃ॒ brahma॑ pū॒rvyaṃ namo॑bhi॒rvi śloka॑ etu pa॒thye॑va sū॒reḥ | śṛ॒ṇvantu॒ viśve॑ a॒mṛta॑sya pu॒trā ā ye dhāmā॑ni di॒vyāni॑ ta॒sthuḥ || १ ||
य॒मे इ॑व॒ यत॑माने॒ यदैतं॒ प्र वां॑ भर॒न्मानु॑षा देव॒यन्त॑: ।
आ सी॑दतं॒ स्वमु॑ लो॒कं विदा॑ने स्वास॒स्थे भ॑वत॒मिन्द॑वे नः ॥२॥
ya॒me i॑va॒ yata॑māne॒ yadaitaṃ॒ pra vāṃ॑ bhara॒nmānu॑ṣā deva॒yanta॑: | ā sī॑dataṃ॒ svamu॑ lo॒kaṃ vidā॑ne svāsa॒sthe bha॑vata॒minda॑ve naḥ || २ ||
पञ्च॑ प॒दानि॑ रु॒पो अन्व॑रोहं॒ चतु॑ष्पदी॒मन्वे॑मि व्र॒तेन॑ ।
अ॒क्षरे॑ण॒ प्रति॑ मिम ए॒तामृ॒तस्य॒ नाभा॒वधि॒ सं पु॑नामि ॥३॥
pañca॑ pa॒dāni॑ ru॒po anva॑rohaṃ॒ catu॑ṣpadī॒manve॑mi vra॒tena॑ | a॒kṣare॑ṇa॒ prati॑ mima e॒tāmṛ॒tasya॒ nābhā॒vadhi॒ saṃ pu॑nāmi || ३ ||
दे॒वेभ्य॒: कम॑वृणीत मृ॒त्युं प्र॒जायै॒ कम॒मृतं॒ नावृ॑णीत ।
बृह॒स्पतिं॑ य॒ज्ञम॑कृण्वत॒ ऋषिं॑ प्रि॒यां य॒मस्त॒न्वं१ प्रारि॑रेचीत् ॥४॥
de॒vebhya॒: kama॑vṛṇīta mṛ॒tyuṃ pra॒jāyai॒ kama॒mṛtaṃ॒ nāvṛ॑ṇīta | bṛha॒spatiṃ॑ ya॒jñama॑kṛṇvata॒ ṛṣiṃ॑ pri॒yāṃ ya॒masta॒nvaṃ१ prāri॑recīt || ४ ||
स॒प्त क्ष॑रन्ति॒ शिश॑वे म॒रुत्व॑ते पि॒त्रे पु॒त्रासो॒ अप्य॑वीवतन्नृ॒तम् ।
उ॒भे इद॑स्यो॒भय॑स्य राजत उ॒भे य॑तेते उ॒भय॑स्य पुष्यतः ॥५॥
sa॒pta kṣa॑ranti॒ śiśa॑ve ma॒rutva॑te pi॒tre pu॒trāso॒ apya॑vīvatannṛ॒tam | u॒bhe ida॑syo॒bhaya॑sya rājata u॒bhe ya॑tete u॒bhaya॑sya puṣyataḥ || ५ ||