EeseDharmaSanātana Library
963मण्डल 10 · सूक्त 126
8 shlokन तमंहो॒ न दु॑रि॒तं देवा॑सो अष्ट॒ मर्त्य॑म् । स॒जोष॑सो॒ यम॑र्य॒मा मि॒त्रो नय॑न्ति॒ वरु॑णो॒ अति॒ द्विष॑: ॥१॥
na tamaṃho॒ na du॑ri॒taṃ devā॑so aṣṭa॒ martya॑m | sa॒joṣa॑so॒ yama॑rya॒mā mi॒tro naya॑nti॒ varu॑ṇo॒ ati॒ dviṣa॑: || १ ||
तद्धि व॒यं वृ॑णी॒महे॒ वरु॑ण॒ मित्रार्य॑मन् । येना॒ निरंह॑सो यू॒यं पा॒थ ने॒था च॒ मर्त्य॒मति॒ द्विष॑: ॥२॥
taddhi va॒yaṃ vṛ॑ṇī॒mahe॒ varu॑ṇa॒ mitrārya॑man | yenā॒ niraṃha॑so yū॒yaṃ pā॒tha ne॒thā ca॒ martya॒mati॒ dviṣa॑: || २ ||
ते नू॒नं नो॒ऽयमू॒तये॒ वरु॑णो मि॒त्रो अ॑र्य॒मा । नयि॑ष्ठा उ नो ने॒षणि॒ पर्षि॑ष्ठा उ नः प॒र्षण्यति॒ द्विष॑: ॥३॥
te nū॒naṃ no॒’yamū॒taye॒ varu॑ṇo mi॒tro a॑rya॒mā | nayi॑ṣṭhā u no ne॒ṣaṇi॒ parṣi॑ṣṭhā u naḥ pa॒rṣaṇyati॒ dviṣa॑: || ३ ||
यू॒यं विश्वं॒ परि॑ पाथ॒ वरु॑णो मि॒त्रो अ॑र्य॒मा । यु॒ष्माकं॒ शर्म॑णि प्रि॒ये स्याम॑ सुप्रणीत॒योऽति॒ द्विष॑: ॥४॥
yū॒yaṃ viśvaṃ॒ pari॑ pātha॒ varu॑ṇo mi॒tro a॑rya॒mā | yu॒ṣmākaṃ॒ śarma॑ṇi pri॒ye syāma॑ supraṇīta॒yo’ti॒ dviṣa॑: || ४ ||
आ॒दि॒त्यासो॒ अति॒ स्रिधो॒ वरु॑णो मि॒त्रो अ॑र्य॒मा । उ॒ग्रं म॒रुद्भी॑ रु॒द्रं हु॑वे॒मेन्द्र॑म॒ग्निं स्व॒स्तयेऽति॒ द्विष॑: ॥५॥
ā॒di॒tyāso॒ ati॒ sridho॒ varu॑ṇo mi॒tro a॑rya॒mā | u॒graṃ ma॒rudbhī॑ ru॒draṃ hu॑ve॒mendra॑ma॒gniṃ sva॒staye’ti॒ dviṣa॑: || ५ ||
नेता॑र ऊ॒ षु ण॑स्ति॒रो वरु॑णो मि॒त्रो अ॑र्य॒मा । अति॒ विश्वा॑नि दुरि॒ता राजा॑नश्चर्षणी॒नामति॒ द्विष॑: ॥६॥
netā॑ra ū॒ ṣu ṇa॑sti॒ro varu॑ṇo mi॒tro a॑rya॒mā | ati॒ viśvā॑ni duri॒tā rājā॑naścarṣaṇī॒nāmati॒ dviṣa॑: || ६ ||
शु॒नम॒स्मभ्य॑मू॒तये॒ वरु॑णो मि॒त्रो अ॑र्य॒मा । शर्म॑ यच्छन्तु स॒प्रथ॑ आदि॒त्यासो॒ यदीम॑हे॒ अति॒ द्विष॑: ॥७॥
śu॒nama॒smabhya॑mū॒taye॒ varu॑ṇo mi॒tro a॑rya॒mā | śarma॑ yacchantu sa॒pratha॑ ādi॒tyāso॒ yadīma॑he॒ ati॒ dviṣa॑: || ७ ||
यथा॑ ह॒ त्यद्व॑सवो गौ॒र्यं॑ चित्प॒दि षि॒ताममु॑ञ्चता यजत्राः ।
ए॒वो ष्व१स्मन्मु॑ञ्चता॒ व्यंह॒: प्र ता॑र्यग्ने प्रत॒रं न॒ आयु॑: ॥८॥
yathā॑ ha॒ tyadva॑savo gau॒ryaṃ॑ citpa॒di ṣi॒tāmamu॑ñcatā yajatrāḥ | e॒vo ṣva१smanmu॑ñcatā॒ vyaṃha॒: pra tā॑ryagne prata॒raṃ na॒ āyu॑: || ८ ||