EeseDharmaSanātana Library
954मण्डल 10 · सूक्त 117
9 shlokन वा उ॑ दे॒वाः क्षुध॒मिद्व॒धं द॑दुरु॒ताशि॑त॒मुप॑ गच्छन्ति मृ॒त्यव॑: ।
उ॒तो र॒यिः पृ॑ण॒तो नोप॑ दस्यत्यु॒तापृ॑णन्मर्डि॒तारं॒ न वि॑न्दते ॥१॥
na vā u॑ de॒vāḥ kṣudha॒midva॒dhaṃ da॑duru॒tāśi॑ta॒mupa॑ gacchanti mṛ॒tyava॑: | u॒to ra॒yiḥ pṛ॑ṇa॒to nopa॑ dasyatyu॒tāpṛ॑ṇanmarḍi॒tāraṃ॒ na vi॑ndate || १ ||
य आ॒ध्राय॑ चकमा॒नाय॑ पि॒त्वोऽन्न॑वा॒न्त्सन्र॑फि॒तायो॑पज॒ग्मुषे॑ ।
स्थि॒रं मन॑: कृणु॒ते सेव॑ते पु॒रोतो चि॒त्स म॑र्डि॒तारं॒ न वि॑न्दते ॥२॥
ya ā॒dhrāya॑ cakamā॒nāya॑ pi॒tvo’nna॑vā॒ntsanra॑phi॒tāyo॑paja॒gmuṣe॑ | sthi॒raṃ mana॑: kṛṇu॒te seva॑te pu॒roto ci॒tsa ma॑rḍi॒tāraṃ॒ na vi॑ndate || २ ||
स इद्भो॒जो यो गृ॒हवे॒ ददा॒त्यन्न॑कामाय॒ चर॑ते कृ॒शाय॑ ।
अर॑मस्मै भवति॒ याम॑हूता उ॒ताप॒रीषु॑ कृणुते॒ सखा॑यम् ॥३॥
sa idbho॒jo yo gṛ॒have॒ dadā॒tyanna॑kāmāya॒ cara॑te kṛ॒śāya॑ | ara॑masmai bhavati॒ yāma॑hūtā u॒tāpa॒rīṣu॑ kṛṇute॒ sakhā॑yam || ३ ||
न स सखा॒ यो न ददा॑ति॒ सख्ये॑ सचा॒भुवे॒ सच॑मानाय पि॒त्वः ।
अपा॑स्मा॒त्प्रेया॒न्न तदोको॑ अस्ति पृ॒णन्त॑म॒न्यमर॑णं चिदिच्छेत् ॥४॥
na sa sakhā॒ yo na dadā॑ti॒ sakhye॑ sacā॒bhuve॒ saca॑mānāya pi॒tvaḥ | apā॑smā॒tpreyā॒nna tadoko॑ asti pṛ॒ṇanta॑ma॒nyamara॑ṇaṃ cidicchet || ४ ||
पृ॒णी॒यादिन्नाध॑मानाय॒ तव्या॒न्द्राघी॑यांस॒मनु॑ पश्येत॒ पन्था॑म् ।
ओ हि वर्त॑न्ते॒ रथ्ये॑व च॒क्राऽन्यम॑न्य॒मुप॑ तिष्ठन्त॒ राय॑: ॥५॥
pṛ॒ṇī॒yādinnādha॑mānāya॒ tavyā॒ndrāghī॑yāṃsa॒manu॑ paśyeta॒ panthā॑m | o hi varta॑nte॒ rathye॑va ca॒krā’nyama॑nya॒mupa॑ tiṣṭhanta॒ rāya॑: || ५ ||
मोघ॒मन्नं॑ विन्दते॒ अप्र॑चेताः स॒त्यं ब्र॑वीमि व॒ध इत्स तस्य॑ ।
नार्य॒मणं॒ पुष्य॑ति॒ नो सखा॑यं॒ केव॑लाघो भवति केवला॒दी ॥६॥
mogha॒mannaṃ॑ vindate॒ apra॑cetāḥ sa॒tyaṃ bra॑vīmi va॒dha itsa tasya॑ | nārya॒maṇaṃ॒ puṣya॑ti॒ no sakhā॑yaṃ॒ keva॑lāgho bhavati kevalā॒dī || ६ ||
कृ॒षन्नित्फाल॒ आशि॑तं कृणोति॒ यन्नध्वा॑न॒मप॑ वृङ्क्ते च॒रित्रै॑: ।
वद॑न्ब्र॒ह्माव॑दतो॒ वनी॑यान्पृ॒णन्ना॒पिरपृ॑णन्तम॒भि ष्या॑त् ॥७॥
kṛ॒ṣannitphāla॒ āśi॑taṃ kṛṇoti॒ yannadhvā॑na॒mapa॑ vṛṅkte ca॒ritrai॑: | vada॑nbra॒hmāva॑dato॒ vanī॑yānpṛ॒ṇannā॒pirapṛ॑ṇantama॒bhi ṣyā॑t || ७ ||
एक॑पा॒द्भूयो॑ द्वि॒पदो॒ वि च॑क्रमे द्वि॒पात्त्रि॒पाद॑म॒भ्ये॑ति प॒श्चात् ।
चतु॑ष्पादेति द्वि॒पदा॑मभिस्व॒रे स॒म्पश्य॑न्प॒ङ्क्तीरु॑प॒तिष्ठ॑मानः ॥८॥
eka॑pā॒dbhūyo॑ dvi॒pado॒ vi ca॑krame dvi॒pāttri॒pāda॑ma॒bhye॑ti pa॒ścāt | catu॑ṣpādeti dvi॒padā॑mabhisva॒re sa॒mpaśya॑npa॒ṅktīru॑pa॒tiṣṭha॑mānaḥ || ८ ||
स॒मौ चि॒द्धस्तौ॒ न स॒मं वि॑विष्टः सम्मा॒तरा॑ चि॒न्न स॒मं दु॑हाते ।
य॒मयो॑श्चि॒न्न स॒मा वी॒र्या॑णि ज्ञा॒ती चि॒त्सन्तौ॒ न स॒मं पृ॑णीतः ॥९॥
sa॒mau ci॒ddhastau॒ na sa॒maṃ vi॑viṣṭaḥ sammā॒tarā॑ ci॒nna sa॒maṃ du॑hāte | ya॒mayo॑ści॒nna sa॒mā vī॒ryā॑ṇi jñā॒tī ci॒tsantau॒ na sa॒maṃ pṛ॑ṇītaḥ || ९ ||