EeseDharmaSanātana Library
946मण्डल 10 · सूक्त 109
7 shlokते॑ऽवदन्प्रथ॒मा ब्र॑ह्मकिल्बि॒षेऽकू॑पारः सलि॒लो मा॑त॒रिश्वा॑ ।
वी॒ळुह॑रा॒स्तप॑ उ॒ग्रो म॑यो॒भूरापो॑ दे॒वीः प्र॑थम॒जा ऋ॒तेन॑ ॥१॥
te॑’vadanpratha॒mā bra॑hmakilbi॒ṣe’kū॑pāraḥ sali॒lo mā॑ta॒riśvā॑ | vī॒ḷuha॑rā॒stapa॑ u॒gro ma॑yo॒bhūrāpo॑ de॒vīḥ pra॑thama॒jā ṛ॒tena॑ || १ ||
सोमो॒ राजा॑ प्रथ॒मो ब्र॑ह्मजा॒यां पुन॒: प्राय॑च्छ॒दहृ॑णीयमानः ।
अ॒न्व॒र्ति॒ता वरु॑णो मि॒त्र आ॑सीद॒ग्निर्होता॑ हस्त॒गृह्या नि॑नाय ॥२॥
somo॒ rājā॑ pratha॒mo bra॑hmajā॒yāṃ puna॒: prāya॑ccha॒dahṛ॑ṇīyamānaḥ | a॒nva॒rti॒tā varu॑ṇo mi॒tra ā॑sīda॒gnirhotā॑ hasta॒gṛhyā ni॑nāya || २ ||
हस्ते॑नै॒व ग्रा॒ह्य॑ आ॒धिर॑स्या ब्रह्मजा॒येयमिति॒ चेदवो॑चन् ।
न दू॒ताय॑ प्र॒ह्ये॑ तस्थ ए॒षा तथा॑ रा॒ष्ट्रं गु॑पि॒तं क्ष॒त्रिय॑स्य ॥३॥
haste॑nai॒va grā॒hya॑ ā॒dhira॑syā brahmajā॒yeyamiti॒ cedavo॑can | na dū॒tāya॑ pra॒hye॑ tastha e॒ṣā tathā॑ rā॒ṣṭraṃ gu॑pi॒taṃ kṣa॒triya॑sya || ३ ||
दे॒वा ए॒तस्या॑मवदन्त॒ पूर्वे॑ सप्तऋ॒षय॒स्तप॑से॒ ये नि॑षे॒दुः ।
भी॒मा जा॒या ब्रा॑ह्म॒णस्योप॑नीता दु॒र्धां द॑धाति पर॒मे व्यो॑मन् ॥४॥
de॒vā e॒tasyā॑mavadanta॒ pūrve॑ saptaṛ॒ṣaya॒stapa॑se॒ ye ni॑ṣe॒duḥ | bhī॒mā jā॒yā brā॑hma॒ṇasyopa॑nītā du॒rdhāṃ da॑dhāti para॒me vyo॑man || ४ ||
ब्र॒ह्म॒चा॒री च॑रति॒ वेवि॑ष॒द्विष॒: स दे॒वानां॑ भव॒त्येक॒मङ्ग॑म् ।
तेन॑ जा॒यामन्व॑विन्द॒द्बृह॒स्पति॒: सोमे॑न नी॒तां जु॒ह्वं१ न दे॑वाः ॥५॥
bra॒hma॒cā॒rī ca॑rati॒ vevi॑ṣa॒dviṣa॒: sa de॒vānāṃ॑ bhava॒tyeka॒maṅga॑m | tena॑ jā॒yāmanva॑vinda॒dbṛha॒spati॒: some॑na nī॒tāṃ ju॒hvaṃ१ na de॑vāḥ || ५ ||
पुन॒र्वै दे॒वा अ॑ददु॒: पुन॑र्मनु॒ष्या॑ उ॒त । राजा॑नः स॒त्यं कृ॑ण्वा॒ना ब्र॑ह्मजा॒यां पुन॑र्ददुः ॥६॥
puna॒rvai de॒vā a॑dadu॒: puna॑rmanu॒ṣyā॑ u॒ta | rājā॑naḥ sa॒tyaṃ kṛ॑ṇvā॒nā bra॑hmajā॒yāṃ puna॑rdaduḥ || ६ ||
पु॒न॒र्दाय॑ ब्रह्मजा॒यां कृ॒त्वी दे॒वैर्नि॑किल्बि॒षम् । ऊर्जं॑ पृथि॒व्या भ॒क्त्वायो॑रुगा॒यमुपा॑सते ॥७॥
pu॒na॒rdāya॑ brahmajā॒yāṃ kṛ॒tvī de॒vairni॑kilbi॒ṣam | ūrjaṃ॑ pṛthi॒vyā bha॒ktvāyo॑rugā॒yamupā॑sate || ७ ||