EeseDharmaSanātana Library
941मण्डल 10 · सूक्त 104
11 shlokअसा॑वि॒ सोम॑: पुरुहूत॒ तुभ्यं॒ हरि॑भ्यां य॒ज्ञमुप॑ याहि॒ तूय॑म् ।
तुभ्यं॒ गिरो॒ विप्र॑वीरा इया॒ना द॑धन्वि॒र इ॑न्द्र॒ पिबा॑ सु॒तस्य॑ ॥१॥
asā॑vi॒ soma॑: puruhūta॒ tubhyaṃ॒ hari॑bhyāṃ ya॒jñamupa॑ yāhi॒ tūya॑m | tubhyaṃ॒ giro॒ vipra॑vīrā iyā॒nā da॑dhanvi॒ra i॑ndra॒ pibā॑ su॒tasya॑ || १ ||
अ॒प्सु धू॒तस्य॑ हरिव॒: पिबे॒ह नृभि॑: सु॒तस्य॑ ज॒ठरं॑ पृणस्व ।
मि॒मि॒क्षुर्यमद्र॑य इन्द्र॒ तुभ्यं॒ तेभि॑र्वर्धस्व॒ मद॑मुक्थवाहः ॥२॥
a॒psu dhū॒tasya॑ hariva॒: pibe॒ha nṛbhi॑: su॒tasya॑ ja॒ṭharaṃ॑ pṛṇasva | mi॒mi॒kṣuryamadra॑ya indra॒ tubhyaṃ॒ tebhi॑rvardhasva॒ mada॑mukthavāhaḥ || २ ||
प्रोग्रां पी॒तिं वृष्ण॑ इयर्मि स॒त्यां प्र॒यै सु॒तस्य॑ हर्यश्व॒ तुभ्य॑म् ।
इन्द्र॒ धेना॑भिरि॒ह मा॑दयस्व धी॒भिर्विश्वा॑भि॒: शच्या॑ गृणा॒नः ॥३॥
progrāṃ pī॒tiṃ vṛṣṇa॑ iyarmi sa॒tyāṃ pra॒yai su॒tasya॑ haryaśva॒ tubhya॑m | indra॒ dhenā॑bhiri॒ha mā॑dayasva dhī॒bhirviśvā॑bhi॒: śacyā॑ gṛṇā॒naḥ || ३ ||
ऊ॒ती श॑चीव॒स्तव॑ वी॒र्ये॑ण॒ वयो॒ दधा॑ना उ॒शिज॑ ऋत॒ज्ञाः ।
प्र॒जाव॑दिन्द्र॒ मनु॑षो दुरो॒णे त॒स्थुर्गृ॒णन्त॑: सध॒माद्या॑सः ॥४॥
ū॒tī śa॑cīva॒stava॑ vī॒rye॑ṇa॒ vayo॒ dadhā॑nā u॒śija॑ ṛta॒jñāḥ | pra॒jāva॑dindra॒ manu॑ṣo duro॒ṇe ta॒sthurgṛ॒ṇanta॑: sadha॒mādyā॑saḥ || ४ ||
प्रणी॑तिभिष्टे हर्यश्व सु॒ष्टोः सु॑षु॒म्नस्य॑ पुरु॒रुचो॒ जना॑सः ।
मंहि॑ष्ठामू॒तिं वि॒तिरे॒ दधा॑ना स्तो॒तार॑ इन्द्र॒ तव॑ सू॒नृता॑भिः ॥५॥
praṇī॑tibhiṣṭe haryaśva su॒ṣṭoḥ su॑ṣu॒mnasya॑ puru॒ruco॒ janā॑saḥ | maṃhi॑ṣṭhāmū॒tiṃ vi॒tire॒ dadhā॑nā sto॒tāra॑ indra॒ tava॑ sū॒nṛtā॑bhiḥ || ५ ||
उप॒ ब्रह्मा॑णि हरिवो॒ हरि॑भ्यां॒ सोम॑स्य याहि पी॒तये॑ सु॒तस्य॑ ।
इन्द्र॑ त्वा य॒ज्ञः क्षम॑माणमानड्दा॒श्वाँ अ॑स्यध्व॒रस्य॑ प्रके॒तः ॥६॥
upa॒ brahmā॑ṇi harivo॒ hari॑bhyāṃ॒ soma॑sya yāhi pī॒taye॑ su॒tasya॑ | indra॑ tvā ya॒jñaḥ kṣama॑māṇamānaḍdā॒śvām̐ a॑syadhva॒rasya॑ prake॒taḥ || ६ ||
स॒हस्र॑वाजमभिमाति॒षाहं॑ सु॒तेर॑णं म॒घवा॑नं सुवृ॒क्तिम् ।
उप॑ भूषन्ति॒ गिरो॒ अप्र॑तीत॒मिन्द्रं॑ नम॒स्या ज॑रि॒तुः प॑नन्त ॥७॥
sa॒hasra॑vājamabhimāti॒ṣāhaṃ॑ su॒tera॑ṇaṃ ma॒ghavā॑naṃ suvṛ॒ktim | upa॑ bhūṣanti॒ giro॒ apra॑tīta॒mindraṃ॑ nama॒syā ja॑ri॒tuḥ pa॑nanta || ७ ||
स॒प्तापो॑ दे॒वीः सु॒रणा॒ अमृ॑क्ता॒ याभि॒: सिन्धु॒मत॑र इन्द्र पू॒र्भित् ।
न॒व॒तिं स्रो॒त्या नव॑ च॒ स्रव॑न्तीर्दे॒वेभ्यो॑ गा॒तुं मनु॑षे च विन्दः ॥८॥
sa॒ptāpo॑ de॒vīḥ su॒raṇā॒ amṛ॑ktā॒ yābhi॒: sindhu॒mata॑ra indra pū॒rbhit | na॒va॒tiṃ sro॒tyā nava॑ ca॒ srava॑ntīrde॒vebhyo॑ gā॒tuṃ manu॑ṣe ca vindaḥ || ८ ||
अ॒पो म॒हीर॒भिश॑स्तेरमु॒ञ्चोऽजा॑गरा॒स्वधि॑ दे॒व एक॑: ।
इन्द्र॒ यास्त्वं वृ॑त्र॒तूर्ये॑ च॒कर्थ॒ ताभि॑र्वि॒श्वायु॑स्त॒न्वं॑ पुपुष्याः ॥९॥
a॒po ma॒hīra॒bhiśa॑steramu॒ñco’jā॑garā॒svadhi॑ de॒va eka॑: | indra॒ yāstvaṃ vṛ॑tra॒tūrye॑ ca॒kartha॒ tābhi॑rvi॒śvāyu॑sta॒nvaṃ॑ pupuṣyāḥ || ९ ||
वी॒रेण्य॒: क्रतु॒रिन्द्र॑: सुश॒स्तिरु॒तापि॒ धेना॑ पुरुहू॒तमी॑ट्टे ।
आर्द॑यद्वृ॒त्रमकृ॑णोदु लो॒कं स॑सा॒हे श॒क्रः पृत॑ना अभि॒ष्टिः ॥१०॥
vī॒reṇya॒: kratu॒rindra॑: suśa॒stiru॒tāpi॒ dhenā॑ puruhū॒tamī॑ṭṭe | ārda॑yadvṛ॒tramakṛ॑ṇodu lo॒kaṃ sa॑sā॒he śa॒kraḥ pṛta॑nā abhi॒ṣṭiḥ || १० ||
शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥११॥
śu॒naṃ hu॑vema ma॒ghavā॑na॒mindra॑ma॒sminbhare॒ nṛta॑maṃ॒ vāja॑sātau | śṛ॒ṇvanta॑mu॒gramū॒taye॑ sa॒matsu॒ ghnantaṃ॑ vṛ॒trāṇi॑ saṃ॒jitaṃ॒ dhanā॑nām || ११ ||