EeseDharmaSanātana Library
940मण्डल 10 · सूक्त 103
13 shlokआ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम् ।
सं॒क्रन्द॑नोऽनिमि॒ष ए॑कवी॒रः श॒तं सेना॑ अजयत्सा॒कमिन्द्र॑: ॥१॥
ā॒śuḥ śiśā॑no vṛṣa॒bho na bhī॒mo gha॑nāgha॒naḥ kṣobha॑ṇaścarṣaṇī॒nām | saṃ॒kranda॑no’nimi॒ṣa e॑kavī॒raḥ śa॒taṃ senā॑ ajayatsā॒kamindra॑: || १ ||
सं॒क्रन्द॑नेनानिमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना॑ ।
तदिन्द्रे॑ण जयत॒ तत्स॑हध्वं॒ युधो॑ नर॒ इषु॑हस्तेन॒ वृष्णा॑ ॥२॥
saṃ॒kranda॑nenānimi॒ṣeṇa॑ ji॒ṣṇunā॑ yutkā॒reṇa॑ duścyava॒nena॑ dhṛ॒ṣṇunā॑ | tadindre॑ṇa jayata॒ tatsa॑hadhvaṃ॒ yudho॑ nara॒ iṣu॑hastena॒ vṛṣṇā॑ || २ ||
स इषु॑हस्तै॒: स नि॑ष॒ङ्गिभि॑र्व॒शी संस्र॑ष्टा॒ स युध॒ इन्द्रो॑ ग॒णेन॑ ।
सं॒सृ॒ष्ट॒जित्सो॑म॒पा बा॑हुश॒र्ध्यु१ग्रध॑न्वा॒ प्रति॑हिताभि॒रस्ता॑ ॥३॥
sa iṣu॑hastai॒: sa ni॑ṣa॒ṅgibhi॑rva॒śī saṃsra॑ṣṭā॒ sa yudha॒ indro॑ ga॒ṇena॑ | saṃ॒sṛ॒ṣṭa॒jitso॑ma॒pā bā॑huśa॒rdhyu१gradha॑nvā॒ prati॑hitābhi॒rastā॑ || ३ ||
बृह॑स्पते॒ परि॑ दीया॒ रथे॑न रक्षो॒हामित्राँ॑ अप॒बाध॑मानः ।
प्र॒भ॒ञ्जन्त्सेना॑: प्रमृ॒णो यु॒धा जय॑न्न॒स्माक॑मेध्यवि॒ता रथा॑नाम् ॥४॥
bṛha॑spate॒ pari॑ dīyā॒ rathe॑na rakṣo॒hāmitrām̐॑ apa॒bādha॑mānaḥ | pra॒bha॒ñjantsenā॑: pramṛ॒ṇo yu॒dhā jaya॑nna॒smāka॑medhyavi॒tā rathā॑nām || ४ ||
ब॒ल॒वि॒ज्ञा॒यः स्थवि॑र॒: प्रवी॑र॒: सह॑स्वान्वा॒जी सह॑मान उ॒ग्रः ।
अ॒भिवी॑रो अ॒भिस॑त्वा सहो॒जा जैत्र॑मिन्द्र॒ रथ॒मा ति॑ष्ठ गो॒वित् ॥५॥
ba॒la॒vi॒jñā॒yaḥ sthavi॑ra॒: pravī॑ra॒: saha॑svānvā॒jī saha॑māna u॒graḥ | a॒bhivī॑ro a॒bhisa॑tvā saho॒jā jaitra॑mindra॒ ratha॒mā ti॑ṣṭha go॒vit || ५ ||
गो॒त्र॒भिदं॑ गो॒विदं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ।
इ॒मं स॑जाता॒ अनु॑ वीरयध्व॒मिन्द्रं॑ सखायो॒ अनु॒ सं र॑भध्वम् ॥६॥
go॒tra॒bhidaṃ॑ go॒vidaṃ॒ vajra॑bāhuṃ॒ jaya॑nta॒majma॑ pramṛ॒ṇanta॒moja॑sā | i॒maṃ sa॑jātā॒ anu॑ vīrayadhva॒mindraṃ॑ sakhāyo॒ anu॒ saṃ ra॑bhadhvam || ६ ||
अ॒भि गो॒त्राणि॒ सह॑सा॒ गाह॑मानोऽद॒यो वी॒रः श॒तम॑न्यु॒रिन्द्र॑: ।
दु॒श्च्य॒व॒नः पृ॑तना॒षाळ॑यु॒ध्यो॒३ऽस्माकं॒ सेना॑ अवतु॒ प्र यु॒त्सु ॥७॥
a॒bhi go॒trāṇi॒ saha॑sā॒ gāha॑māno’da॒yo vī॒raḥ śa॒tama॑nyu॒rindra॑: | du॒ścya॒va॒naḥ pṛ॑tanā॒ṣāḷa॑yu॒dhyo॒३’smākaṃ॒ senā॑ avatu॒ pra yu॒tsu || ७ ||
इन्द्र॑ आसां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोम॑: ।
दे॒व॒से॒नाना॑मभिभञ्जती॒नां जय॑न्तीनां म॒रुतो॑ य॒न्त्वग्र॑म् ॥८॥
indra॑ āsāṃ ne॒tā bṛha॒spati॒rdakṣi॑ṇā ya॒jñaḥ pu॒ra e॑tu॒ soma॑: | de॒va॒se॒nānā॑mabhibhañjatī॒nāṃ jaya॑ntīnāṃ ma॒ruto॑ ya॒ntvagra॑m || ८ ||
इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुतां॒ शर्ध॑ उ॒ग्रम् ।
म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ॥९॥
indra॑sya॒ vṛṣṇo॒ varu॑ṇasya॒ rājña॑ ādi॒tyānāṃ॑ ma॒rutāṃ॒ śardha॑ u॒gram | ma॒hāma॑nasāṃ bhuvanacya॒vānāṃ॒ ghoṣo॑ de॒vānāṃ॒ jaya॑tā॒muda॑sthāt || ९ ||
उद्ध॑र्षय मघव॒न्नायु॑धा॒न्युत्सत्व॑नां माम॒कानां॒ मनां॑सि ।
उद्वृ॑त्रहन्वा॒जिनां॒ वाजि॑ना॒न्युद्रथा॑नां॒ जय॑तां यन्तु॒ घोषा॑: ॥१०॥
uddha॑rṣaya maghava॒nnāyu॑dhā॒nyutsatva॑nāṃ māma॒kānāṃ॒ manāṃ॑si | udvṛ॑trahanvā॒jināṃ॒ vāji॑nā॒nyudrathā॑nāṃ॒ jaya॑tāṃ yantu॒ ghoṣā॑: || १० ||
अ॒स्माक॒मिन्द्र॒: समृ॑तेषु ध्व॒जेष्व॒स्माकं॒ या इष॑व॒स्ता ज॑यन्तु ।
अ॒स्माकं॑ वी॒रा उत्त॑रे भवन्त्व॒स्माँ उ॑ देवा अवता॒ हवे॑षु ॥११॥
a॒smāka॒mindra॒: samṛ॑teṣu dhva॒jeṣva॒smākaṃ॒ yā iṣa॑va॒stā ja॑yantu | a॒smākaṃ॑ vī॒rā utta॑re bhavantva॒smām̐ u॑ devā avatā॒ have॑ṣu || ११ ||
अ॒मीषां॑ चि॒त्तं प्र॑तिलो॒भय॑न्ती गृहा॒णाङ्गा॑न्यप्वे॒ परे॑हि ।
अ॒भि प्रेहि॒ निर्द॑ह हृ॒त्सु शोकै॑र॒न्धेना॒मित्रा॒स्तम॑सा सचन्ताम् ॥१२॥
a॒mīṣāṃ॑ ci॒ttaṃ pra॑tilo॒bhaya॑ntī gṛhā॒ṇāṅgā॑nyapve॒ pare॑hi | a॒bhi prehi॒ nirda॑ha hṛ॒tsu śokai॑ra॒ndhenā॒mitrā॒stama॑sā sacantām || १२ ||
प्रेता॒ जय॑ता नर॒ इन्द्रो॑ व॒: शर्म॑ यच्छतु । उ॒ग्रा व॑: सन्तु बा॒हवो॑ऽनाधृ॒ष्या यथास॑थ ॥१३॥
pretā॒ jaya॑tā nara॒ indro॑ va॒: śarma॑ yacchatu | u॒grā va॑: santu bā॒havo॑’nādhṛ॒ṣyā yathāsa॑tha || १३ ||