EeseDharmaSanātana Library
838मण्डल 10 · सूक्त 1
7 shlokअग्रे॑ बृ॒हन्नु॒षसा॑मू॒र्ध्वो अ॑स्थान्निर्जग॒न्वान्तम॑सो॒ ज्योति॒षागा॑त् ।
अ॒ग्निर्भा॒नुना॒ रुश॑ता॒ स्वङ्ग॒ आ जा॒तो विश्वा॒ सद्मा॑न्यप्राः ॥१॥
agre॑ bṛ॒hannu॒ṣasā॑mū॒rdhvo a॑sthānnirjaga॒nvāntama॑so॒ jyoti॒ṣāgā॑t | a॒gnirbhā॒nunā॒ ruśa॑tā॒ svaṅga॒ ā jā॒to viśvā॒ sadmā॑nyaprāḥ || १ ||
स जा॒तो गर्भो॑ असि॒ रोद॑स्यो॒रग्ने॒ चारु॒र्विभृ॑त॒ ओष॑धीषु ।
चि॒त्रः शिशु॒: परि॒ तमां॑स्य॒क्तून्प्र मा॒तृभ्यो॒ अधि॒ कनि॑क्रदद्गाः ॥२॥
sa jā॒to garbho॑ asi॒ roda॑syo॒ragne॒ cāru॒rvibhṛ॑ta॒ oṣa॑dhīṣu | ci॒traḥ śiśu॒: pari॒ tamāṃ॑sya॒ktūnpra mā॒tṛbhyo॒ adhi॒ kani॑kradadgāḥ || २ ||
विष्णु॑रि॒त्था प॑र॒मम॑स्य वि॒द्वाञ्जा॒तो बृ॒हन्न॒भि पा॑ति तृ॒तीय॑म् ।
आ॒सा यद॑स्य॒ पयो॒ अक्र॑त॒ स्वं सचे॑तसो अ॒भ्य॑र्च॒न्त्यत्र॑ ॥३॥
viṣṇu॑ri॒tthā pa॑ra॒mama॑sya vi॒dvāñjā॒to bṛ॒hanna॒bhi pā॑ti tṛ॒tīya॑m | ā॒sā yada॑sya॒ payo॒ akra॑ta॒ svaṃ sace॑taso a॒bhya॑rca॒ntyatra॑ || ३ ||
अत॑ उ त्वा पितु॒भृतो॒ जनि॑त्रीरन्ना॒वृधं॒ प्रति॑ चर॒न्त्यन्नै॑: ।
ता ईं॒ प्रत्ये॑षि॒ पुन॑र॒न्यरू॑पा॒ असि॒ त्वं वि॒क्षु मानु॑षीषु॒ होता॑ ॥४॥
ata॑ u tvā pitu॒bhṛto॒ jani॑trīrannā॒vṛdhaṃ॒ prati॑ cara॒ntyannai॑: | tā īṃ॒ pratye॑ṣi॒ puna॑ra॒nyarū॑pā॒ asi॒ tvaṃ vi॒kṣu mānu॑ṣīṣu॒ hotā॑ || ४ ||
होता॑रं चि॒त्रर॑थमध्व॒रस्य॑ य॒ज्ञस्य॑यज्ञस्य के॒तुं रुश॑न्तम् ।
प्रत्य॑र्धिं दे॒वस्य॑देवस्य म॒ह्ना श्रि॒या त्व१ग्निमति॑थिं॒ जना॑नाम् ॥५॥
hotā॑raṃ ci॒trara॑thamadhva॒rasya॑ ya॒jñasya॑yajñasya ke॒tuṃ ruśa॑ntam | pratya॑rdhiṃ de॒vasya॑devasya ma॒hnā śri॒yā tva१gnimati॑thiṃ॒ janā॑nām || ५ ||
स तु वस्त्रा॒ण्यध॒ पेश॑नानि॒ वसा॑नो अ॒ग्निर्नाभा॑ पृथि॒व्याः ।
अ॒रु॒षो जा॒तः प॒द इळा॑याः पु॒रोहि॑तो राजन्यक्षी॒ह दे॒वान् ॥६॥
sa tu vastrā॒ṇyadha॒ peśa॑nāni॒ vasā॑no a॒gnirnābhā॑ pṛthi॒vyāḥ | a॒ru॒ṣo jā॒taḥ pa॒da iḷā॑yāḥ pu॒rohi॑to rājanyakṣī॒ha de॒vān || ६ ||
आ हि द्यावा॑पृथि॒वी अ॑ग्न उ॒भे सदा॑ पु॒त्रो न मा॒तरा॑ त॒तन्थ॑ ।
प्र या॒ह्यच्छो॑श॒तो य॑वि॒ष्ठाऽथा व॑ह सहस्ये॒ह दे॒वान् ॥७॥
ā hi dyāvā॑pṛthi॒vī a॑gna u॒bhe sadā॑ pu॒tro na mā॒tarā॑ ta॒tantha॑ | pra yā॒hyaccho॑śa॒to ya॑vi॒ṣṭhā’thā va॑ha sahasye॒ha de॒vān || ७ ||