१२ गोतमो राहूगणः। अग्निषोमौ। १-३ अनुष्टुप्, ४-७, १२ त्रिष्टुप्, ८ जगती त्रिष्टुब्वा, ९-११ गायत्री ।
अग्नी॑षोमावि॒मं सु मे॑ शृणु॒तं वृ॑षणा॒ हव॑म् ।
प्रति॑ सू॒क्तानि॑ हर्यतं॒ भव॑तं दा॒शुषे॒ मय॑: ॥१॥
अग्नी॑षोमा॒ यो अ॒द्य वा॑मि॒दं वच॑: सप॒र्यति॑ ।
तस्मै॑ धत्तं सु॒वीर्यं॒ गवां॒ पोषं॒ स्वश्व्य॑म् ॥२॥
अग्नी॑षोमा॒ य आहु॑तिं॒ यो वां॒ दाशा॑द्ध॒विष्कृ॑तिम् ।
स प्र॒जया॑ सु॒वीर्यं॒ विश्व॒मायु॒र्व्य॑श्नवत् ॥३॥
अग्नी॑षोमा॒ चेति॒ तद् वी॒र्यं॑ वां॒ यदमु॑ष्णीतमव॒सं प॒णिं गाः ।
अवा॑तिरतं॒ बृस॑यस्य॒ शेषो ऽवि॑न्दतं॒ ज्योति॒रेकं॑ ब॒हुभ्य॑: ॥४॥
यु॒वमे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तम् ।
यु॒वं सिन्धूँ॑र॒भिश॑स्तेरव॒द्यादग्नी॑षोमा॒वमु॑ञ्चतं गृभी॒तान् ॥५॥
आन्यं दि॒वो मा॑त॒रिश्वा॑ जभा॒राम॑थ्नाद॒न्यं परि॑ श्ये॒नो अद्रे॑: ।
अग्नी॑षोमा॒ ब्रह्म॑णा वावृधा॒नोरुं य॒ज्ञाय॑ चक्रथुरु लो॒कम् ॥६॥
अग्नी॑षोमा ह॒विष॒: प्रस्थि॑तस्य वी॒तं हर्य॑तं वृषणा जु॒षेथा॑म् ।
सु॒शर्मा॑णा॒ स्वव॑सा॒ हि भू॒तमथा॑ धत्तं॒ यज॑मानाय॒ शं योः ॥७॥
यो अ॒ग्नीषोमा॑ ह॒विषा॑ सप॒र्याद् दे॑व॒द्रीचा॒ मन॑सा॒ यो घृ॒तेन॑ ।
तस्य॑ व्र॒तं र॑क्षतं पा॒तमंह॑सो वि॒शे जना॑य॒ महि॒ शर्म॑ यच्छतम् ॥८॥
अग्नी॑षोमा॒ सवे॑दसा॒ सहू॑ती वनतं॒ गिर॑: । सं दे॑व॒त्रा ब॑भूवथुः ॥९॥
अग्नी॑षोमाव॒नेन॑ वां॒ यो वां॑ घृ॒तेन॒ दाश॑ति । तस्मै॑ दीदयतं बृ॒हत् ॥१०॥
अग्नी॑षोमावि॒मानि॑ नो यु॒वं ह॒व्या जु॑जोषतम् । आ या॑त॒मुप॑ न॒: सचा॑ ॥११॥
अग्नी॑षोमा पिपृ॒तमर्व॑तो न॒ आ प्या॑यन्तामु॒स्रिया॑ हव्य॒सूद॑: ।
अ॒स्मे बला॑नि म॒घव॑त्सु धत्तं कृणु॒तं नो॑ अध्व॒रं श्रु॑ष्टि॒मन्त॑म् ॥१२॥
१२ gotamo rāhūgaṇaḥ | agniṣomau | १-३ anuṣṭup, ४-७, १२ triṣṭup, ८ jagatī triṣṭubvā, ९-११ gāyatrī | agnī॑ṣomāvi॒maṃ su me॑ śṛṇu॒taṃ vṛ॑ṣaṇā॒ hava॑m | prati॑ sū॒ktāni॑ haryataṃ॒ bhava॑taṃ dā॒śuṣe॒ maya॑: || १ || agnī॑ṣomā॒ yo a॒dya vā॑mi॒daṃ vaca॑: sapa॒ryati॑ | tasmai॑ dhattaṃ su॒vīryaṃ॒ gavāṃ॒ poṣaṃ॒ svaśvya॑m || २ || agnī॑ṣomā॒ ya āhu॑tiṃ॒ yo vāṃ॒ dāśā॑ddha॒viṣkṛ॑tim | sa pra॒jayā॑ su॒vīryaṃ॒ viśva॒māyu॒rvya॑śnavat || ३ || agnī॑ṣomā॒ ceti॒ tad vī॒ryaṃ॑ vāṃ॒ yadamu॑ṣṇītamava॒saṃ pa॒ṇiṃ gāḥ | avā॑tirataṃ॒ bṛsa॑yasya॒ śeṣo ’vi॑ndataṃ॒ jyoti॒rekaṃ॑ ba॒hubhya॑: || ४ || yu॒vame॒tāni॑ di॒vi ro॑ca॒nānya॒gniśca॑ soma॒ sakra॑tū adhattam | yu॒vaṃ sindhūm̐॑ra॒bhiśa॑sterava॒dyādagnī॑ṣomā॒vamu॑ñcataṃ gṛbhī॒tān || ५ || ānyaṃ di॒vo mā॑ta॒riśvā॑ jabhā॒rāma॑thnāda॒nyaṃ pari॑ śye॒no adre॑: | agnī॑ṣomā॒ brahma॑ṇā vāvṛdhā॒noruṃ ya॒jñāya॑ cakrathuru lo॒kam || ६ || agnī॑ṣomā ha॒viṣa॒: prasthi॑tasya vī॒taṃ harya॑taṃ vṛṣaṇā ju॒ṣethā॑m | su॒śarmā॑ṇā॒ svava॑sā॒ hi bhū॒tamathā॑ dhattaṃ॒ yaja॑mānāya॒ śaṃ yoḥ || ७ || yo a॒gnīṣomā॑ ha॒viṣā॑ sapa॒ryād de॑va॒drīcā॒ mana॑sā॒ yo ghṛ॒tena॑ | tasya॑ vra॒taṃ ra॑kṣataṃ pā॒tamaṃha॑so vi॒śe janā॑ya॒ mahi॒ śarma॑ yacchatam || ८ || agnī॑ṣomā॒ save॑dasā॒ sahū॑tī vanataṃ॒ gira॑: | saṃ de॑va॒trā ba॑bhūvathuḥ || ९ || agnī॑ṣomāva॒nena॑ vāṃ॒ yo vāṃ॑ ghṛ॒tena॒ dāśa॑ti | tasmai॑ dīdayataṃ bṛ॒hat || १० || agnī॑ṣomāvi॒māni॑ no yu॒vaṃ ha॒vyā ju॑joṣatam | ā yā॑ta॒mupa॑ na॒: sacā॑ || ११ || agnī॑ṣomā pipṛ॒tamarva॑to na॒ ā pyā॑yantāmu॒sriyā॑ havya॒sūda॑: | a॒sme balā॑ni ma॒ghava॑tsu dhattaṃ kṛṇu॒taṃ no॑ adhva॒raṃ śru॑ṣṭi॒manta॑m || १२ ||