१० मधुच्छन्दा वैश्वामित्रः। १-३ इन्द्रः, ४,६,८,९ मरुतः, ५,७ मरुत इन्द्रश्च, १० इन्द्रः। गायत्री।
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुष॑:। रोच॑न्ते रोच॒ना दि॒वि॥१॥
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑। शोणा॑ धृ॒ष्णू नृ॒वाह॑सा॥२॥
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑। समु॒षद्भि॑रजायथाः॥३॥
आदह॑ स्व॒धामनु॒ पुन॑र्गर्भ॒त्वमे॑रि॒रे। दधा॑ना॒ नाम॑ य॒ज्ञिय॑म्॥४॥
वी॒ळु चि॑दारुज॒त्नुभि॒र्गुहा॑ चिदिन्द्र॒ वह्नि॑भिः। अवि॑न्द उ॒स्रिया॒ अनु॑॥५॥
दे॒व॒यन्तो॒ यथा॑ म॒तिमच्छा॑ वि॒दद्व॑सुं॒ गिर॑:। म॒हाम॑नूषत श्रु॒तम्॥६॥
इन्द्रे॑ण॒ सं हि दृक्ष॑से संजग्मा॒नो अबि॑भ्युषा। म॒न्दू स॑मा॒नव॑र्चसा॥७॥
अ॒न॒व॒द्यैर॒भिद्यु॑भिर्म॒खः सह॑स्वदर्चति। ग॒णैरिन्द्र॑स्य॒ काम्यै॑:॥८॥
अत॑: परिज्म॒न्ना ग॑हि दि॒वो वा॑ रोच॒नादधि॑। सम॑स्मिन्नृञ्जते॒ गिर॑:॥९॥
इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑। इन्द्रं॑ म॒हो वा॒ रज॑सः॥१०॥
१० madhucchandā vaiśvāmitraḥ | १-३ indraḥ, ४,६,८,९ marutaḥ, ५,७ maruta indraśca, १० indraḥ | gāyatrī | yu॒ñjanti॑ bra॒dhnama॑ru॒ṣaṃ cara॑ntaṃ॒ pari॑ ta॒sthuṣa॑: | roca॑nte roca॒nā di॒vi || १ || yu॒ñjantya॑sya॒ kāmyā॒ harī॒ vipa॑kṣasā॒ rathe॑ | śoṇā॑ dhṛ॒ṣṇū nṛ॒vāha॑sā || २ || ke॒tuṃ kṛ॒ṇvanna॑ke॒tave॒ peśo॑ maryā ape॒śase॑ | samu॒ṣadbhi॑rajāyathāḥ || ३ || ādaha॑ sva॒dhāmanu॒ puna॑rgarbha॒tvame॑ri॒re | dadhā॑nā॒ nāma॑ ya॒jñiya॑m || ४ || vī॒ḷu ci॑dāruja॒tnubhi॒rguhā॑ cidindra॒ vahni॑bhiḥ | avi॑nda u॒sriyā॒ anu॑ || ५ || de॒va॒yanto॒ yathā॑ ma॒timacchā॑ vi॒dadva॑suṃ॒ gira॑: | ma॒hāma॑nūṣata śru॒tam || ६ || indre॑ṇa॒ saṃ hi dṛkṣa॑se saṃjagmā॒no abi॑bhyuṣā | ma॒ndū sa॑mā॒nava॑rcasā || ७ || a॒na॒va॒dyaira॒bhidyu॑bhirma॒khaḥ saha॑svadarcati | ga॒ṇairindra॑sya॒ kāmyai॑: || ८ || ata॑: parijma॒nnā ga॑hi di॒vo vā॑ roca॒nādadhi॑ | sama॑sminnṛñjate॒ gira॑: || ९ || i॒to vā॑ sā॒timīma॑he di॒vo vā॒ pārthi॑vā॒dadhi॑ | indraṃ॑ ma॒ho vā॒ raja॑saḥ || १० ||