६ सव्य आङ्गिरसः। इन्द्रः। जगती।
ए॒ष प्र पू॒र्वीरव॒ तस्य॑ च॒म्रिषो ऽत्यो॒ न योषा॒मुद॑यंस्त भु॒र्वणि॑: ।
दक्षं॑ म॒हे पा॑ययते हिर॒ण्ययं॒ रथ॑मा॒वृत्या॒ हरि॑योग॒मृभ्व॑सम् ॥१॥
तं गू॒र्तयो॑ नेम॒न्निष॒: परी॑णसः समु॒द्रं न सं॒चर॑णे सनि॒ष्यव॑: ।
पतिं॒ दक्ष॑स्य वि॒दथ॑स्य॒ नू सहो॑ गि॒रिं न वे॒ना अधि॑ रोह॒ तेज॑सा ॥२॥
स तु॒र्वणि॑र्म॒हाँ अ॑रे॒णु पौंस्ये॑ गि॒रेर्भृ॒ष्टिर्न भ्रा॑जते तु॒जा शव॑: ।
येन॒ शुष्णं॑ मा॒यिन॑माय॒सो मदे॑ दु॒ध्र आ॒भूषु॑ रा॒मय॒न्नि दाम॑नि ॥३॥
दे॒वी यदि॒ तवि॑षी॒ त्वावृ॑धो॒तय॒ इन्द्रं॒ सिष॑क्त्यु॒षसं॒ न सूर्य॑: ।
यो धृ॒ष्णुना॒ शव॑सा॒ बाध॑ते॒ तम॒ इय॑र्ति रे॒णुं बृ॒हद॑र्हरि॒ष्वणि॑: ॥४॥
वि यत् ति॒रो ध॒रुण॒मच्यु॑तं॒ रजो ऽति॑ष्ठिपो दि॒व आता॑सु ब॒र्हणा॑ ।
स्व॑र्मीह्ले॒ यन्मद॑ इन्द्र॒ हर्ष्याह॑न् वृ॒त्रं निर॒पामौ॑ब्जो अर्ण॒वम् ॥५॥
त्वं दि॒वो ध॒रुणं॑ धिष॒ ओज॑सा पृथि॒व्या इ॑न्द्र॒ सद॑नेषु॒ माहि॑नः ।
त्वं सु॒तस्य॒ मदे॑ अरिणा अ॒पो वि वृ॒त्रस्य॑ स॒मया॑ पा॒ष्या॑रुजः ॥६॥
६ savya āṅgirasaḥ | indraḥ | jagatī | e॒ṣa pra pū॒rvīrava॒ tasya॑ ca॒mriṣo ’tyo॒ na yoṣā॒muda॑yaṃsta bhu॒rvaṇi॑: | dakṣaṃ॑ ma॒he pā॑yayate hira॒ṇyayaṃ॒ ratha॑mā॒vṛtyā॒ hari॑yoga॒mṛbhva॑sam || १ || taṃ gū॒rtayo॑ nema॒nniṣa॒: parī॑ṇasaḥ samu॒draṃ na saṃ॒cara॑ṇe sani॒ṣyava॑: | patiṃ॒ dakṣa॑sya vi॒datha॑sya॒ nū saho॑ gi॒riṃ na ve॒nā adhi॑ roha॒ teja॑sā || २ || sa tu॒rvaṇi॑rma॒hām̐ a॑re॒ṇu pauṃsye॑ gi॒rerbhṛ॒ṣṭirna bhrā॑jate tu॒jā śava॑: | yena॒ śuṣṇaṃ॑ mā॒yina॑māya॒so made॑ du॒dhra ā॒bhūṣu॑ rā॒maya॒nni dāma॑ni || ३ || de॒vī yadi॒ tavi॑ṣī॒ tvāvṛ॑dho॒taya॒ indraṃ॒ siṣa॑ktyu॒ṣasaṃ॒ na sūrya॑: | yo dhṛ॒ṣṇunā॒ śava॑sā॒ bādha॑te॒ tama॒ iya॑rti re॒ṇuṃ bṛ॒hada॑rhari॒ṣvaṇi॑: || ४ || vi yat ti॒ro dha॒ruṇa॒macyu॑taṃ॒ rajo ’ti॑ṣṭhipo di॒va ātā॑su ba॒rhaṇā॑ | sva॑rmīhle॒ yanmada॑ indra॒ harṣyāha॑n vṛ॒traṃ nira॒pāmau॑bjo arṇa॒vam || ५ || tvaṃ di॒vo dha॒ruṇaṃ॑ dhiṣa॒ oja॑sā pṛthi॒vyā i॑ndra॒ sada॑neṣu॒ māhi॑naḥ | tvaṃ su॒tasya॒ made॑ ariṇā a॒po vi vṛ॒trasya॑ sa॒mayā॑ pā॒ṣyā॑rujaḥ || ६ ||