११ सव्य आङ्गिरसः। इन्द्रः। जगती, १०-११ त्रिष्टुप्।
न्यू॒ ३ षु वाचं॒ प्र म॒हे भ॑रामहे॒ गिर॒ इन्द्रा॑य॒ सद॑ने वि॒वस्व॑तः ।
नू चि॒द्धि रत्नं॑ सस॒तामि॒वावि॑द॒न्न दु॑ष्टु॒तिर्द्र॑विणो॒देषु॑ शस्यते ॥१॥
दु॒रो अश्व॑स्य दु॒र इ॑न्द्र॒ गोर॑सि दु॒रो यव॑स्य॒ वसु॑न इ॒नस्पति॑: ।
शि॒क्षा॒न॒रः प्र॒दिवो॒ अका॑मकर्शन॒: सखा॒ सखि॑भ्य॒स्तमि॒दं गृ॑णीमसि ॥२॥
शची॑व इन्द्र पुरुकृद् द्युमत्तम॒ तवेदि॒दम॒भित॑श्चेकिते॒ वसु॑ ।
अत॑: सं॒गृभ्या॑भिभूत॒ आ भ॑र॒ मा त्वा॑य॒तो ज॑रि॒तुः काम॑मूनयीः ॥३॥
ए॒भिर्द्युभि॑: सु॒मना॑ ए॒भिरिन्दु॑भिर्निरुन्धा॒नो अम॑तिं॒ गोभि॑र॒श्विना॑ ।
इन्द्रे॑ण॒ दस्युं॑ द॒रय॑न्त॒ इन्दु॑भिर्यु॒तद्वे॑षस॒: समि॒षा र॑भेमहि ॥४॥
समि॑न्द्र रा॒या समि॒षा र॑भेमहि॒ सं वाजे॑भिः पुरुश्च॒न्द्रैर॒भिद्यु॑भिः ।
सं दे॒व्या प्रम॑त्या वी॒रशु॑ष्मया॒ गोअ॑ग्र॒याश्वा॑वत्या रभेमहि ॥५॥
ते त्वा॒ मदा॑ अमद॒न् तानि॒ वृष्ण्या॒ ते सोमा॑सो वृत्र॒हत्ये॑षु सत्पते ।
यत् का॒रवे॒ दश॑ वृ॒त्राण्य॑प्र॒ति ब॒र्हिष्म॑ते॒ नि स॒हस्रा॑णि ब॒र्हय॑: ॥६॥
यु॒धा युध॒मुप॒ घेदे॑षि धृष्णु॒या पु॒रा पुरं॒ समि॒दं हं॒स्योज॑सा ।
नम्या॒ यदि॑न्द्र॒ सख्या॑ परा॒वति॑ निब॒र्हयो॒ नमु॑चिं॒ नाम॑ मा॒यिन॑म् ॥७॥
त्वं कर॑ञ्जमु॒त प॒र्णयं॑ वधी॒स्तेजि॑ष्ठयातिथि॒ग्वस्य॑ वर्त॒नी ।
त्वं श॒ता वङ्गृ॑दस्याभिन॒त् पुरो॑ ऽनानु॒दः परि॑षूता ऋ॒जिश्व॑ना ॥८॥
त्वमे॒ताञ्ज॑न॒राज्ञो॒ द्विर्दशा॑ऽब॒न्धुना॑ सु॒श्रव॑सोपज॒ग्मुष॑: ।
ष॒ष्टिं स॒हस्रा॑ नव॒तिं नव॑ श्रु॒तो नि च॒क्रेण॒ रथ्या॑ दु॒ष्पदा॑वृणक् ॥९॥
त्वमा॑विथ सु॒श्रव॑सं॒ तवो॒तिभि॒स्तव॒ त्राम॑भिरिन्द्र॒ तूर्व॑याणम् ।
त्वम॑स्मै॒ कुत्स॑मतिथि॒ग्वमा॒युं म॒हे राज्ञे॒ यूने॑ अरन्धनायः ॥१०॥
य उ॒दृची॑न्द्र दे॒वगो॑पा॒: सखा॑यस्ते शि॒वत॑मा॒ असा॑म ।
त्वां स्तो॑षाम॒ त्वया॑ सु॒वीरा॒ द्राघी॑य॒ आयु॑: प्रत॒रं दधा॑नाः ॥११॥
११ savya āṅgirasaḥ | indraḥ | jagatī, १०-११ triṣṭup | nyū॒ ३ ṣu vācaṃ॒ pra ma॒he bha॑rāmahe॒ gira॒ indrā॑ya॒ sada॑ne vi॒vasva॑taḥ | nū ci॒ddhi ratnaṃ॑ sasa॒tāmi॒vāvi॑da॒nna du॑ṣṭu॒tirdra॑viṇo॒deṣu॑ śasyate || १ || du॒ro aśva॑sya du॒ra i॑ndra॒ gora॑si du॒ro yava॑sya॒ vasu॑na i॒naspati॑: | śi॒kṣā॒na॒raḥ pra॒divo॒ akā॑makarśana॒: sakhā॒ sakhi॑bhya॒stami॒daṃ gṛ॑ṇīmasi || २ || śacī॑va indra purukṛd dyumattama॒ tavedi॒dama॒bhita॑ścekite॒ vasu॑ | ata॑: saṃ॒gṛbhyā॑bhibhūta॒ ā bha॑ra॒ mā tvā॑ya॒to ja॑ri॒tuḥ kāma॑mūnayīḥ || ३ || e॒bhirdyubhi॑: su॒manā॑ e॒bhirindu॑bhirnirundhā॒no ama॑tiṃ॒ gobhi॑ra॒śvinā॑ | indre॑ṇa॒ dasyuṃ॑ da॒raya॑nta॒ indu॑bhiryu॒tadve॑ṣasa॒: sami॒ṣā ra॑bhemahi || ४ || sami॑ndra rā॒yā sami॒ṣā ra॑bhemahi॒ saṃ vāje॑bhiḥ puruśca॒ndraira॒bhidyu॑bhiḥ | saṃ de॒vyā prama॑tyā vī॒raśu॑ṣmayā॒ goa॑gra॒yāśvā॑vatyā rabhemahi || ५ || te tvā॒ madā॑ amada॒n tāni॒ vṛṣṇyā॒ te somā॑so vṛtra॒hatye॑ṣu satpate | yat kā॒rave॒ daśa॑ vṛ॒trāṇya॑pra॒ti ba॒rhiṣma॑te॒ ni sa॒hasrā॑ṇi ba॒rhaya॑: || ६ || yu॒dhā yudha॒mupa॒ ghede॑ṣi dhṛṣṇu॒yā pu॒rā puraṃ॒ sami॒daṃ haṃ॒syoja॑sā | namyā॒ yadi॑ndra॒ sakhyā॑ parā॒vati॑ niba॒rhayo॒ namu॑ciṃ॒ nāma॑ mā॒yina॑m || ७ || tvaṃ kara॑ñjamu॒ta pa॒rṇayaṃ॑ vadhī॒steji॑ṣṭhayātithi॒gvasya॑ varta॒nī | tvaṃ śa॒tā vaṅgṛ॑dasyābhina॒t puro॑ ’nānu॒daḥ pari॑ṣūtā ṛ॒jiśva॑nā || ८ || tvame॒tāñja॑na॒rājño॒ dvirdaśā॑’ba॒ndhunā॑ su॒śrava॑sopaja॒gmuṣa॑: | ṣa॒ṣṭiṃ sa॒hasrā॑ nava॒tiṃ nava॑ śru॒to ni ca॒kreṇa॒ rathyā॑ du॒ṣpadā॑vṛṇak || ९ || tvamā॑vitha su॒śrava॑saṃ॒ tavo॒tibhi॒stava॒ trāma॑bhirindra॒ tūrva॑yāṇam | tvama॑smai॒ kutsa॑matithi॒gvamā॒yuṃ ma॒he rājñe॒ yūne॑ arandhanāyaḥ || १० || ya u॒dṛcī॑ndra de॒vago॑pā॒: sakhā॑yaste śi॒vata॑mā॒ asā॑ma | tvāṃ sto॑ṣāma॒ tvayā॑ su॒vīrā॒ drāghī॑ya॒ āyu॑: prata॒raṃ dadhā॑nāḥ || ११ ||