१५ सव्य आङ्गिरसः। इन्द्रः। जगती, १४-१५ त्रिष्टुप्।
अ॒भि त्यं मे॒षं पु॑रुहू॒तमृ॒ग्मिय॒मिन्द्रं॑ गी॒र्भिर्म॑दता॒ वस्वो॑ अर्ण॒वम् ।
यस्य॒ द्यावो॒ न वि॒चर॑न्ति॒ मानु॑षा भु॒जे मंहि॑ष्ठम॒भि विप्र॑मर्चत ॥१॥
अ॒भीम॑वन्वन्त्स्वभि॒ष्टिमू॒तयो॑ ऽन्तरिक्ष॒प्रां तवि॑षीभि॒रावृ॑तम् ।
इन्द्रं॒ दक्षा॑स ऋ॒भवो॑ मद॒च्युतं॑ श॒तक्र॑तुं॒ जव॑नी सू॒नृतारु॑हत् ॥२॥
त्वं गो॒त्रमङ्गि॑रोभ्योऽवृणो॒रपो॒तात्र॑ये श॒तदु॑रेषु गातु॒वित् ।
स॒सेन॑ चिद् विम॒दाया॑वहो॒ वस्वा॒जावद्रिं॑ वावसा॒नस्य॑ न॒र्तय॑न् ॥३॥
त्वम॒पाम॑पि॒धाना॑वृणो॒रपाधा॑रय॒: पर्व॑ते॒ दानु॑म॒द्वसु॑ ।
वृ॒त्रं यदि॑न्द्र॒ शव॒साव॑धी॒रहि॒मादित् सूर्यं॑ दि॒व्यारो॑हयो दृ॒शे ॥४॥
त्वं मा॒याभि॒रप॑ मा॒यिनो॑ऽधमः स्व॒धाभि॒र्ये अधि॒ शुप्ता॒वजु॑ह्वत ।
त्वं पिप्रो॑र्नृमण॒: प्रारु॑ज॒: पुर॒: प्र ऋ॒जिश्वा॑नं दस्यु॒हत्ये॑ष्वाविथ ॥५॥
त्वं कुत्सं॑ शुष्ण॒हत्ये॑ष्वावि॒थार॑न्धयोऽतिथि॒ग्वाय॒ शम्ब॑रम् ।
म॒हान्तं॑ चिदर्बु॒दं नि क्र॑मीः प॒दा स॒नादे॒व द॑स्यु॒हत्या॑य जज्ञिषे ॥६॥
त्वे विश्वा॒ तवि॑षी स॒ध्र्य॑ग्घि॒ता तव॒ राध॑: सोमपी॒थाय॑ हर्षते ।
तव॒ वज्र॑श्चिकिते बा॒ह्वोर्हि॒तो वृ॒श्चा शत्रो॒रव॒ विश्वा॑नि॒ वृष्ण्या॑ ॥७॥
वि जा॑नी॒ह्यार्या॒न्ये च॒ दस्य॑वो ब॒र्हिष्म॑ते रन्धया॒ शास॑दव्र॒तान् ।
शाकी॑ भव॒ यज॑मानस्य चोदि॒ता विश्वेत् ता ते॑ सध॒मादे॑षु चाकन ॥८॥
अनु॑व्रताय र॒न्धय॒न्नप॑व्रताना॒भूभि॒रिन्द्र॑: श्न॒थय॒न्नना॑भुवः ।
वृ॒द्धस्य॑ चि॒द् वर्ध॑तो॒ द्यामिन॑क्षत॒: स्तवा॑नो व॒म्रो वि ज॑घान सं॒दिह॑: ॥९॥
तक्ष॒द् यत्त॑ उ॒शना॒ सह॑सा॒ सहो॒ वि रोद॑सी म॒ज्मना॑ बाधते॒ शव॑: ।
आ त्वा॒ वात॑स्य नृमणो मनो॒युज॒ आ पूर्य॑माणमवहन्न॒भि श्रव॑: ॥१०॥
मन्दि॑ष्ट॒ यदु॒शने॑ का॒व्ये सचाँ॒ इन्द्रो॑ व॒ङ्कू व॑ङ्कु॒तराधि॑ तिष्ठति ।
उ॒ग्रो य॒यिं निर॒पः स्रोत॑सासृज॒द्वि शुष्ण॑स्य दृंहि॒ता ऐ॑रय॒त्पुर॑: ॥११॥
आ स्मा॒ रथं॑ वृष॒पाणे॑षु तिष्ठसि शार्या॒तस्य॒ प्रभृ॑ता॒ येषु॒ मन्द॑से ।
इन्द्र॒ यथा॑ सु॒तसो॑मेषु चा॒कनो॑ऽन॒र्वाणं॒ श्लोक॒मा रो॑हसे दि॒वि ॥१२॥
अद॑दा॒ अर्भां॑ मह॒ते व॑च॒स्यवे॑ क॒क्षीव॑ते वृच॒यामि॑न्द्र सुन्व॒ते ।
मेना॑भवो वृषण॒श्वस्य॑ सुक्रतो॒ विश्वेत् ता ते॒ सव॑नेषु प्र॒वाच्या॑ ॥१३॥
इन्द्रो॑ अश्रायि सु॒ध्यो॑ निरे॒के प॒ज्रेषु॒ स्तोमो॒ दुर्यो॒ न यूप॑: ।
अ॒श्व॒युर्ग॒व्यू र॑थ॒युर्व॑सू॒युरिन्द्र॒ इद्रा॒यः क्ष॑यति प्रय॒न्ता ॥१४॥
इ॒दं नमो॑ वृष॒भाय॑ स्व॒राजे॑ स॒त्यशु॑ष्माय त॒वसे॑ऽवाचि ।
अ॒स्मिन्नि॑न्द्र वृ॒जने॒ सर्व॑वीरा॒: स्मत्सू॒रिभि॒स्तव॒ शर्म॑न्त्स्याम ॥१५॥
१५ savya āṅgirasaḥ | indraḥ | jagatī, १४-१५ triṣṭup | a॒bhi tyaṃ me॒ṣaṃ pu॑ruhū॒tamṛ॒gmiya॒mindraṃ॑ gī॒rbhirma॑datā॒ vasvo॑ arṇa॒vam | yasya॒ dyāvo॒ na vi॒cara॑nti॒ mānu॑ṣā bhu॒je maṃhi॑ṣṭhama॒bhi vipra॑marcata || १ || a॒bhīma॑vanvantsvabhi॒ṣṭimū॒tayo॑ ’ntarikṣa॒prāṃ tavi॑ṣībhi॒rāvṛ॑tam | indraṃ॒ dakṣā॑sa ṛ॒bhavo॑ mada॒cyutaṃ॑ śa॒takra॑tuṃ॒ java॑nī sū॒nṛtāru॑hat || २ || tvaṃ go॒tramaṅgi॑robhyo’vṛṇo॒rapo॒tātra॑ye śa॒tadu॑reṣu gātu॒vit | sa॒sena॑ cid vima॒dāyā॑vaho॒ vasvā॒jāvadriṃ॑ vāvasā॒nasya॑ na॒rtaya॑n || ३ || tvama॒pāma॑pi॒dhānā॑vṛṇo॒rapādhā॑raya॒: parva॑te॒ dānu॑ma॒dvasu॑ | vṛ॒traṃ yadi॑ndra॒ śava॒sāva॑dhī॒rahi॒mādit sūryaṃ॑ di॒vyāro॑hayo dṛ॒śe || ४ || tvaṃ mā॒yābhi॒rapa॑ mā॒yino॑’dhamaḥ sva॒dhābhi॒rye adhi॒ śuptā॒vaju॑hvata | tvaṃ pipro॑rnṛmaṇa॒: prāru॑ja॒: pura॒: pra ṛ॒jiśvā॑naṃ dasyu॒hatye॑ṣvāvitha || ५ || tvaṃ kutsaṃ॑ śuṣṇa॒hatye॑ṣvāvi॒thāra॑ndhayo’tithi॒gvāya॒ śamba॑ram | ma॒hāntaṃ॑ cidarbu॒daṃ ni kra॑mīḥ pa॒dā sa॒nāde॒va da॑syu॒hatyā॑ya jajñiṣe || ६ || tve viśvā॒ tavi॑ṣī sa॒dhrya॑gghi॒tā tava॒ rādha॑: somapī॒thāya॑ harṣate | tava॒ vajra॑ścikite bā॒hvorhi॒to vṛ॒ścā śatro॒rava॒ viśvā॑ni॒ vṛṣṇyā॑ || ७ || vi jā॑nī॒hyāryā॒nye ca॒ dasya॑vo ba॒rhiṣma॑te randhayā॒ śāsa॑davra॒tān | śākī॑ bhava॒ yaja॑mānasya codi॒tā viśvet tā te॑ sadha॒māde॑ṣu cākana || ८ || anu॑vratāya ra॒ndhaya॒nnapa॑vratānā॒bhūbhi॒rindra॑: śna॒thaya॒nnanā॑bhuvaḥ | vṛ॒ddhasya॑ ci॒d vardha॑to॒ dyāmina॑kṣata॒: stavā॑no va॒mro vi ja॑ghāna saṃ॒diha॑: || ९ || takṣa॒d yatta॑ u॒śanā॒ saha॑sā॒ saho॒ vi roda॑sī ma॒jmanā॑ bādhate॒ śava॑: | ā tvā॒ vāta॑sya nṛmaṇo mano॒yuja॒ ā pūrya॑māṇamavahanna॒bhi śrava॑: || १० || mandi॑ṣṭa॒ yadu॒śane॑ kā॒vye sacām॒̐ indro॑ va॒ṅkū va॑ṅku॒tarādhi॑ tiṣṭhati | u॒gro ya॒yiṃ nira॒paḥ srota॑sāsṛja॒dvi śuṣṇa॑sya dṛṃhi॒tā ai॑raya॒tpura॑: || ११ || ā smā॒ rathaṃ॑ vṛṣa॒pāṇe॑ṣu tiṣṭhasi śāryā॒tasya॒ prabhṛ॑tā॒ yeṣu॒ manda॑se | indra॒ yathā॑ su॒taso॑meṣu cā॒kano॑’na॒rvāṇaṃ॒ śloka॒mā ro॑hase di॒vi || १२ || ada॑dā॒ arbhāṃ॑ maha॒te va॑ca॒syave॑ ka॒kṣīva॑te vṛca॒yāmi॑ndra sunva॒te | menā॑bhavo vṛṣaṇa॒śvasya॑ sukrato॒ viśvet tā te॒ sava॑neṣu pra॒vācyā॑ || १३ || indro॑ aśrāyi su॒dhyo॑ nire॒ke pa॒jreṣu॒ stomo॒ duryo॒ na yūpa॑: | a॒śva॒yurga॒vyū ra॑tha॒yurva॑sū॒yurindra॒ idrā॒yaḥ kṣa॑yati praya॒ntā || १४ || i॒daṃ namo॑ vṛṣa॒bhāya॑ sva॒rāje॑ sa॒tyaśu॑ṣmāya ta॒vase॑’vāci | a॒sminni॑ndra vṛ॒jane॒ sarva॑vīrā॒: smatsū॒ribhi॒stava॒ śarma॑ntsyāma || १५ ||